فوتو: اشىق دەرەككوز
ەڭبەك كودەكسىنىڭ 82-بابى «اۋىسىمىشىلىك جانە ارنايى ۇزىلىستەر» دەپ اتالادى. دەسە دە اتالعان باپتا ىستىق نە سۋىق مەزگىلدە اشىق اۋادا, كەڭسەدە ىستەيتىن قىزمەتكەرلەردىڭ قانشا گرادۋس ايازدا جۇمىسقا شىقپاۋى جونىندە ناقتى اقپارات كورسەتىلمەگەن.
اتالعان باپتا:
«جىلدىڭ سۋىق نەمەسە ىستىق مەزگىلىندە اشىق اۋادا, جىلىتىلمايتىن جابىق ءۇي-جايلاردا جۇمىس ىستەيتىن, سونداي-اق تيەۋ-ءتۇسىرۋ جۇمىستارىندا ىستەيتىن جۇمىسكەرلەرگە جىلىنۋ نە سالقىنداۋ جانە تىنىعۋ ءۇشىن جۇمىس ۋاقىتىنا قوسىلاتىن ارنايى ۇزىلىستەر بەرىلەدى. جۇمىس بەرۋشى جۇمىسكەرلەردىڭ جىلىنۋىنا, سالقىنداۋىنا جانە تىنىعۋىنا ارنالعان ءۇي-جايلاردىڭ جابدىقتالۋىن قامتاماسىز ەتۋگە مىندەتتى», دەپ جازىلعان.
ەلىمىزدىڭ بىرقاتار وڭىرلەرىندەگى اۋا رايىنىڭ قولايسىزدىعى مەن ايازدى تەمپەتاتۋرانىڭ ارتۋىنا بايلانىستى «قىسقارتىلعان جۇمىس كۇنى» نەمەسە قاشىقتان جۇمىس ىستەۋ ماسەلەسى وزەكتى بولىپ تۇر. دەگەنمەن ەلىمىزدىڭ ەڭبەك زاڭناماسىندا قىس مەزگىلىندەگى ايازدى اۋا رايىنا بايلانىستى قانداي جاعدايلاردا جۇمىس توقتاتىلاتىنى تۋرالى تىكەلەي نۇسقاۋلىق جوق.
«جۇمىس بەرۋشى ءوز قىزمەتكەرلەرىن جىلىتۋعا, سالقىنداتۋعا جانە دەمالۋعا ارنالعان بولمەمەن قامتاماسىز ەتۋگە مىندەتتى. سونداي-اق كۇن ءتارتىبىنىڭ ەرەجەلەرىندە اۋا رايىنا بايلانىستى جۇمىس كۇنىن جانە ونىڭ ۇزاقتىعىن قىسقارتۋدى قاراستىرۋعا بولادى. مۇنى جۇمىس بەرۋشىنىڭ ءوزى جاسايدى», دەلىنگەن ەڭبەك جانە حالىقتى الەۋمەتتىك قورعاۋ مينيسترلىگىنىڭ رەسمي جاۋابىندا.
قىستاعى قولايسىز اۋا رايى, بوران مەن تۇمان نەگىزىنەن سىرتتا جۇمىس ىستەيتىن جۇمىسشىلاردىڭ ىسىنە كوپ كەدەرگى. اسىرەسە, قۇرىلىستا ىستەيتىن الپينيستەر مەن كران تىزگىنىندەگى جۇمىسشىلاردىڭ قىزمەتى اۋا رايىنا بايلانىستى قاتاڭ قاداعالانادى. تەحنيكالىق رەگلامەنتكە ساي جەل جىلدامدىعىنا بايلانىستى اتالعان ەكى مامان يەلەرىنىڭ جۇمىسىن ءجيى توقتاتۋعا تۋرا كەلەدى.
