سۋرەتتى تۇسىرگەن – اۆتور
بيىل شىعىستا 7,7 ملرد تەڭگەگە 392 كم جول جوندەلسە, كەلەر جىلى جولدىڭ جاعدايىن جاقسارتۋعا بولىنەتىن قارجى ەكى ەسەگە كوبەيتىلىپ, 15 ملرد تەڭگەگە 600 كيلومەتر جول جوندەلەدى. شىعىس قازاقستان وبلىسىنىڭ جولاۋشى كولىگى جانە اۆتوموبيل جولدارى باسقارماسىنىڭ باسشىسى نۇرجان ءجۇمادىلوۆتىڭ ايتۋىنشا, 2024 جىلى رەسپۋبليكالىق بيۋدجەتتەن بولىنگەن 7,7 ملرد تەڭگەگە قوسا وبلىستىق بيۋدجەتتەن تاعى 7,5 ملرد تەڭگە شاماسىندا قاراجات ءبولىنىپ, وبلىستىق جانە اۋداندىق ماڭىزداعى جولداردى ورتا جودەۋدەن وتكىزۋگە جۇمسالماق.
بۇدان باسقا «اۋىل – ەل بەسىگى» باعدارلاماسى بويىنشا قاراستىرىلعان, اۋداندار مەن قالالار بيۋدجەتىنەن بولىنەتىن جانە جولداردى كۇتىپ ۇستاۋعا بولىنەتىن 13 ملرد تەڭگە كولەمىندەگى قارجىعا وبلىس, اۋدان كولەمىندەگى جانە ەلدى مەكەندەردىڭ جولى ورتا جوندەۋدەن ءوتىپ, وبلىستا جەرگىلىكتى جولداردى جوندەۋگە بارلىعى 28 ملرد تەڭگە اقشا جۇمسالادى. الداعى جىلى ءار اۋدانعا 800-900 ملن تەڭگە ءبولىنىپ, ونىڭ جارتىسىنا جۋىعى اۋدان ورتالىقتارىنىڭ كوشەلەرىن اسفالتتاۋعا باعىتتالادى.
وبلىستاعى اۆتوكولىك جولدارىنىڭ جالپى ۇزىدىعى – 5 265 كم. ونىڭ ىشىندە رەسپۋبليكالىق ماڭىزى بار جول – 1238 كم. وڭىردەگى جولداردى, ونىڭ ىشىندە كىرمە جولداردى جوندەۋدە جەرگىلىكتى تۇرعىنداردىڭ جولداردىڭ ساپاسىنا قاتىستى ايتىلىپ كەلە جاتقان سىنى ەسكەرىلىپ وتىر. كوزدەلگەن قارجىنى يگەرۋ ءۇشىن جوبالىق-سمەتالىق قۇجاتتامالاردى دايىنداۋ جۇمىستارىن مەرزىمىندە جۇرگىزۋ قاجەت. قۇزىرلى ۇيىمدار جول جوندەۋ جۇمىستارىنىڭ ساپاسىن باقىلاپ وتىرماق.
وبلىستا جول جوندەۋ جۇمىستارى «جول جىلىمەن» اياقتالىپ قالماق ەمەس. اۆتوموبيل جولدارى كوميتەتىمەن بىرلەسىپ, 2029 جىلعا دەيىن جۇزەگە اسىرىلاتىن نەگىزگى باسىم جوبالاردىڭ تىزبەسى ازىرلەنۋدە. شىعىستا جالپى قۇنى 392 ملرد تەڭگە بولاتىن ۇزىندىعى 684 شاقىرىم جولدى قايتا جاڭارتۋ جانە كۇردەلى جوندەۋدەن وتكىزۋگە 7 جوبا تاڭدالىپ وتىر.
بۇگىنگى كۇنى وبلىستاعى ءىرى ينفراقۇرىلىمدىق جوبالاردى ىسكە اسىرۋ ودان ءارى جالعاسىپ جاتىر. بۇقتىرما سۋ قويماسى ارقىلى وتەتىن كوپىر قۇرىلىسى بويىنشا 27,4 ملرد تەڭگە يگەرىلگەن. جوبانىڭ جالپى قۇنى – 61,4 ملرد تەڭگە. 21 كوپىر تىرەگىنىڭ 11-ءى ورناتىلىپ, 7 كوپىر تىرەگىنىڭ جۇمىسى جالعاسۋدا. كوپىر ارالىقتارىنىڭ 20 مەتالل كونسترۋكتسياسىنىڭ 14-ءى رەسەيدىڭ قورعان قالاسىندا دايىندالىپ, ۋچاسكەگە جەتكىزىلگەن. ولاردىڭ التاۋى ورناتىلعان. ەل كۇتىپ جۇرگەن كوپىر كەلەر جىلدىڭ اياعىندا تەحنيكالىق تۇرعىدا ىسكە قوسىلىپ, 2025 جىلدىڭ العاشقى توقسانىندا پايدالانۋعا بەرىلەدى.
وبلىستا رەسپۋبليكالىق ماڭىزى بار قالباتاۋ – مايقاپشاعاي اۆتوموبيل جولدارىن قايتا جاڭارتۋ جۇمىستارى جۇرگىزىلىپ جاتىر (بارلىعى – 415 كم, شىعىس قازاقستان وبلىسى بويىنشا – 218 كم, ورىندالعانى – 211 كم, قالعانى – 7 كم). جولاۋشىلاردىڭ ءتوزىمىن تاۋىسقان تالدىقورعان – قالباتاۋ – وسكەمەن باعىتى (بارلىعى – 454 كم, شىعىس قازاقستان وبلىسى بويىنشا 60 كم) بويىنشا جولدىڭ شىعىس قازاقستان وبلىسى اۋماعىنداعى بولىگى تولىق جوندەلىپ بىتكەن. اباي وبلىسى بولىگىندە جوندەۋ جالعاسىپ جاتىر. دەگەنمەن قازىر اياگوز, جارما, ءۇرجار اۋداندارى تۇسىنداعى اينالما جولدار الىنىپ, ول جاقتا دا كولىكتەر ءىشىنارا اسفالت جولمەن ءجۇرىپ جاتىر. بىرنەشە رەت كەيىنگە شەگەرىلگەن تالدىقورعان – قالباتاۋ –وسكەمەن باعىتىنداعى جول جوندەۋ جۇمىستارى تۇزەتىلگەن جوبا بويىنشا كەلەر جىلى اياقتالۋعا ءتيىس.
بىرنەشە جىلعا سوزىلىپ, سالىنىپ بىتپەي كەلە جاتقان وسينوۆ اسۋىن اينالىپ وتەتىن وسكەمەن – التاي – راحمان قاينارى اۆتوجولىن قايتا جاڭارتۋ (56-72 كم ۋچاسكەسى) بويىنشا مەردىگەر بولىپ بيىلعى ءساۋىر ايىندا «Kurylys Group RK» جشس انىقتالعان. جولدى ەندى وسى كومپانيا سالىپ شىقپاق. كەلىسىمشارت جاسالعان.
2024 جىلعا 5 ملرد تەڭگە قاراستىرىلعان 72-88 كم ۋچاسكەسى بويىنشا جسق تۇزەتۋ جالعاسۋدا (جسق تۇزەتۋدى اياقتاۋدىڭ بولجامدى مەرزىمى 2024 جىلدىڭ شىلدەسى). سونىمەن قاتار بيىل رەسپۋبليكالىق ماڭىزى بار وسكەمەن – التاي – ۇلكەن نارىن – راحمان قاينارى اۆتوكولىك جولىندا ورنالاسقان ءتورت كوپىرگە كۇردەلى جوندەۋ جۇمىسى جۇرگىزىلىپ جاتىر. كوپىرلەردى جوندەۋ كەلەر جىلى اياقتالادى.
شىعىس قازاقستان وبلىسى
