اتان تۇيەنى الىپ جىعاتىن اياز كۇشىنە ءمىنىپ, اق قار, كوك مۇز تابان استىن قۇرساۋلاپ تۇرسا دا, جىر وتىمەن جىلىنعالى كەلگەن جالپاق جۇرت شاحمەت قۇسايىنوۆ اتىنداعى اقمولا وبلىستىق قازاق مۋزىكالىق-دراما تەاترىندا ينە شانشار ورىن قالدىرماي, ءيىن تىرەسىپ وتىردى. وسىدان-اق كوكشەتاۋلىق قاۋىمنىڭ ءسوز پاتشاسى – ولەڭگە دەگەن, اق سامالداي اڭقىلداعان اقجارما قورعانبەك اقىنعا دەگەن شىنايى كوڭىل, ءىلتيپاتتى قۇرمەتىن اڭعارۋعا بولادى. تەاتر ۇجىمى كورگەن جاننىڭ كوڭىلىن توعايتاتىن كورىنىس ازىرلەگەن ەكەن. ونە بويى قورعانبەك اقىننىڭ جاسىنداي جارقىلداعان, تىڭداعان جاننىڭ جۇرەك قىلىن شەرتىپ, تىلسىم ءبىر ويدىڭ تۇبىنە بويلاتاتىن ولەڭدەرىن وقىدى.زۇلمات جىلدار قان مايدانعا وندىردەي جاستاردىڭ كوكتەرەكتىڭ ىرگەسىندەگى كيەلى جەر, قاسيەتتى توپىراق اۋليەتاستىڭ ىعىنان اتتانعانى, زار يلەپ, زاپىران جۇتقان ءتامام جۇرتتىڭ تىلەگى, بولاتتاي بەرىك بىلەگى, ەل دەپ سوققان جۇرەگى ولەڭ بولىپ شالقىپ, بۇگىنگى جاستاردى تۋعان جەرىن قاستەرلەي بىلۋگە, تۋعان ەلىن قۇرمەتتەي بىلۋگە شاقىرىپ جاتقانداي.
قارشادايىنان قازاقتىڭ قارا سوزىنە دەگەن شەكسىز ماحاببات تۇلا بويىن بيلەگەن تۇلعا تۋرالى ءسوز ساباقتاعاندا, الدىمەن ونىڭ اقىن ەكەندىگىن ايتقان ءلازىم. زەرلى زەرەندى ءوڭىرىنىڭ كورىكتى ءبىر پۇشپاعى كوكتەرەك اۋىلىندا تۋعان ادامنىڭ اقىن بولماسقا حاقىسى جوقتاي. جۋرناليستيكا – قيىن ونەر. بەرىلە ىستەگەن, وندىرە جازعان ادامنىڭ ەرقاشتى بولۋى دا ابدەن مۇمكىن. بىراق وسىنشاما تاۋقىمەتتى كوتەرە ءجۇرىپ, «زەرەندى قاراعايلارى», «سابات», «مەشىتتى عالام», «جىرلايمىن كوكشەتاۋىمدى», «الاپا» سىندى جىر جيناقتارىن جازدى. ەجەلگى قازاق تاريحىنىڭ سىر تۇنعان قيىن قاتپارلارىنا ويلى كوزىمەن ءۇڭىلىپ, الاشتىڭ ارداقتى تۇلعالارى «قاناي-ابىلاي», «ولجاس», «شەر كەشۋ», «مۇساقۇل بالۋان» پوەمالارى وقىرمانعا ولجا بولدى. ومىرشەڭ ولەڭمەن بىرگە وقىرماننىڭ سەزىم قىلىن شەرتىپ, تانىم كوكجيەگىن كەڭەيتىپ, نۇرلاندىراتىن «زۇلمات پەن عيبرات», ء«بىرجان بۇرمالارى», «اقيرەتتىك امانات», «قىزىل سىزىق», «ايسبەرگ استىنداعى اعىستار» ءتارىزدى تاريحي, ادەبي ەسسەلەر جيناعى جارىق كوردى. اۋدارما سالاسىندا دا وندىرتە جۇمىس ىستەدى.
جەتپىس جىلدىق مەرەيتويىنىڭ شىمىلدىعىن وبلىس اكىمىنىڭ ورىنباسارى ازامات تايجانوۆ جۇرەكجاردى قۇتتىقتاۋ سوزىمەن اشىپ, تۋعان جەرىنە كەلىپ, جىرىن سىيلايتىن جاماعاتپەن جۇزدەسىپ جاتقان جامپوز اقىنعا سىي-سياپاتىن تاپسىردى. وبلىس ورتالىعىنداعى اقان سەرى اتىنداعى كوكشەتاۋ جوعارى مادەنيەت كوللەدجىنىڭ ءبىلىم الۋشىسى بەردەنبەك مىرزات اقىن اعاسىنا جۇرەكجاردى ارناۋىن ايتىپ بەردى. قازاقستاننىڭ ەڭبەك سىڭىرگەن ءارتىسى بيسارا ماكەنوۆا ءبىراۋىز ەستەلىك ايتىپ, مەرەيتوي يەسىنە ىزگى تىلەگىن جەتكىزگەن سوڭ, انمەن ادىپتەپ, كەش شىرايىن كەلتىرە ءتۇستى.
قورعانبەك اقىننىڭ جىرىن ايتىپ, سىرىن ايتىپ, ساپارلاس بولىپ كەلگەن ايگىلى اقىن, مەملەكەتتىك سىيلىقتىڭ لاۋرەاتى يران عايىپ اتا-بابالارىنىڭ توپىراعىنا تابانى تيگەنىنە قۋانىشتى ەكەندىگىن, سول ءبىر ساتىمەن ساباقتالعان ساپارعا جىر الەمىندەگى قاناتتاسى قورعانبەكتىڭ سەبەپكەر بولعاندىعى تۋرالى تەبىرەنە تولقىپ, بايانداپ بەردى.
مەملەكەتتىك سىيلىقتىڭ لاۋرەاتى, قازاقتىڭ ايتۋلى اقىنى عالىم جايلىباي دا ءار ولەڭى, ءار ءسوزى اق سامالداي الاش ديدارىن جەلپىپ, الاش جۇرەگىن تەبىرەنتەتىن قورعانبەك اقىن تۋرالى اتالى ءسوز ايتىپ, ولەڭىن ارنادى.
كەلەسى كۇنى جىر شەرۋى قورعانبەك اقىننىڭ تۋعان توپىراعى زەرەندىدە جالعاستى. اۋداندىق مادەنيەت ۇيىندە «زەرەندىنىڭ زەرەگى, قۇيىلىپ تۇرار ولەڭى» تاقىرىبىندا ادەمى كەش بولدى.
كوكشەتاۋ اسپانىندا ەكى كۇن بويى جىر قالقىپ, ءان الديلەدى. وڭتۇستىكتەن ساعىنىپ جەتكەن پەرزەنتىن اياز دا تاعى ءبىر شيراتىپ الايىن دەگەندەي, بەتىنەن شىمشىپ ازىلدەستى. ءسوز اتاسىن سىيلاعان ءتامام جۇرتتى ومىرشەڭ ولەڭ ولكەسىنە جەتەكتەپ اپارىپ جەلپىنتكەن, قۋانىش سىيلاعان ەستەن كەتپەس كۇندەر بولدى بۇل.
كوكشەتاۋ
