ەلدىڭ باس قارجىگەرى مەملەكەتكە تۇسكەن تابىس 12,6 ترلن تەڭگەنى قۇراپ, باستاپقى جوسپار 94,4%-كە ورىندالدى دەپ باياندادى.
جىلدىق جوسپاردىڭ جەتكىلىكتى شەگىنە جەتپەۋىنە مىنا سالالارداعى سالىقتىڭ ۋاقىتىلى تولەنبەۋى سەبەپ بولىپتى.
«اتاپ ايتقاندا, كورپوراتيۆتىك تابىس سالىعى, يمپورتقا سالىناتىن قوسىلعان قۇن سالىعى, پايدالى قازبالاردى وندىرۋگە سالىناتىن سالىق جانە شيكى مۇنايعا ەكسپورتتىق كەدەن باجى ەسەبىنەن قالىپتاستى. كورپوراتيۆتىك تابىس سالىعى بويىنشا جوسپاردىڭ ورىندالماۋى 272 ءىرى سالىق تولەۋشى بويىنشا مالىمدەلگەن اۆانستىق تولەمدەر سوماسىنىڭ 24%-كە ازايۋىمەن بايلانىستى. پايدالى قازبالاردى وندىرۋگە سالىناتىن سالىق بويىنشا جوسپاردىڭ ورىندالماۋىنا نەگىزگى ەكسپورتتىق تاۋارلار باعاسىنىڭ ورتاشا ەسەپپەن 12%-كە تومەندەۋى اسەر ەتتى. ال, شيكى مۇنايعا ەكسپورتتىق كەدەن باجى بويىنشا جوسپاردىڭ نەگىزگى ورىندالماۋى ەكسپورتتىق كەدەن باجىنىڭ ناقتى قالىپتاسقان مولشەرلەمەسىنىڭ بولجامدى كورسەتكىشتەن 8%-كە تومەندەۋىمەن بايلانىستى بولدى», دەدى مينيستر.
قارجى ءمينيسترىنىڭ مالىمەتىنشە, يمپورتقا سالىناتىن قوسىلعان قۇن سالىعى بويىنشا جوسپاردىڭ ورىندالماۋىنا تاۋارلاردىڭ جەكەلەگەن توپتارى بويىنشا يمپورت كولەمىنىڭ تومەندەۋى مەن ەۋرازيالىق ەكونوميكالىق وداق ەلدەرىنەن يمپورت كولەمىنىڭ 9%-عا ازايۋى كەرى كورسەتكىش رەتىندە تىركەلىپ وتىر.
ال جەرگىلىكتى بيۋدجەتتەر سالىقتىق جوسپاردى اسىرا ورىنداعان.
«جەرگىلىكتى بيۋدجەتتەردىڭ كىرىستەرى 109,2%-كە اتقارىلدى جانە 5,7 ترلن تەڭگەنى قۇرادى. جوسپار 478 ملرد تەڭگەگە, ونىڭ ىشىندە سالىقتار بويىنشا 425 ملرد تەڭگەگە اسىرا ورىندالدى. الماتى وبلىسىنان باسقا بارلىق وڭىردە كىرىستەر بويىنشا جوسپارلار اسىرا ورىندالدى», دەپ ەسەپ بەردى ەرۇلان جاماۋباەۆ.
