aqorda_resmi
«وزدەرىڭىزگە بەلگىلى, بۇعان دەيىن وتاندىق بيزنەستى نەگىزسىز تەكسەرۋلەر مەن زاڭسىز قىلمىستىق قۋدالاۋدان قورعاۋ جونىندە تاپسىرما بەرگەن بولاتىنمىن. قابىلدانعان شارالاردىڭ ناتيجەسىندە كاسىپكەرلىك سالاسىنداعى تىركەلگەن قىلمىستار سانى ەكى ەسە ازايدى (837-دەن 402-گە دەيىن). اقتاۋ نەگىزى بويىنشا توقتاتىلعان قىلمىستىق ىستەر سانى شامامەن بەس ەسە قىسقاردى (416-دان 92-گە دەيىن). ينۆەستيتسيالىق جوبالاردى پروكۋراتۋرا ورگاندارىنىڭ سەرۆيستىك قاداعالاۋىنا باسا ءمان بەرىلەدى. ينۆەستيتسيالىق جوبالاردى «جاسىل ءدالىز» قاعيداتى بويىنشا قولداۋ جۇيەسى ەنگىزىلەدى. بۇل ينۆەستورلارعا رۇقسات بەرەتىن قۇجاتتى الۋ ءىسىن وڭايلاتادى جانە جەدەلدەتەدى. سونداي-اق ولارعا جەر ۋچاسكەلەرىن بەرۋ جانە كوممۋنيكاتسيا جۇرگىزۋ جۇمىستارىن جەڭىلدەتەدى», دەدى مەملەكەت باسشىسى.
سونىمەن قاتار پرەزيدەنت تسيفرلىق پلاتفورمانى قۇرۋدىڭ تىم سيىرقۇيمىشاقتانىپ كەتكەنىن دە ەسكەرتتى.
«تسيفرلىق پلاتفورمانى سوزبالاڭعا سالا بەرمەي, تەز ارادا قۇرۋ اسا ماڭىزدى. سول ارقىلى ينۆەستيتسيالىق جوبالاردىڭ جۇزەگە اسىرىلۋ پروتسەسىن ناقتى ۋاقىت رەجيمىندە باقىلاۋعا بولادى. مەملەكەتتىك ورگانداردىڭ ينۆەستورلارعا قاتىستى بارلىق شەشىمى مەن شەكتەۋ شارالارى بويىنشا «پروكۋرورلىق سۇزگى» جۇمىس ىستەي باستايدى. وسىلايشا, ءبىز ينۆەستورلاردى نەگىزسىز ايىپپۇلدار مەن سالىقتاردان, ادىلەتسىز جانە ۇزاققا سوزىلعان سوت داۋلارىنان قورعايمىز. جالپى, بيزنەس ءۇشىن ءادىل ءارى اشىق ويىن ەرەجەسىن قامتاماسىز ەتۋگە بار كۇش-جىگەرىمىزدى جۇمسايمىز. ەلىمىزدە جاساندى ينتەللەكت جۇيەسىن قۇرۋ – ءوز الدىنا بولەك ءارى وتە ماڭىزدى ماسەلە. قازاقستاننىڭ بولاشاعى جانە ونىڭ حالىقارالىق قوعامداستىقتاعى ورنى وسى جۇمىستىڭ ءساتتى ىسكە اسۋىنا بايلانىستى», دەدى ق.توقاەۆ.
پرەزيدەنت وسى سالاعا ءوزى جەتەكشىلىك ەتەتىنىن, وتاندىق ءھام شەتەلدىك ماماندارمەن جۇزدەسىپ, جۇكتەلگەن مىندەتتەردىڭ ورىندالۋىن باقىلاۋدا ۇستايتىنىن ايتتى.
