سەرگەلدەڭگە سالاتىن سەرگىتكىش سۋسىن

جەزقازعان قالالىق جەدەل جاردەم قىزمەتىنە دجامال گۋر­بانوۆ دەگەن ازاماتتىڭ ءولىم اۋزىن­دا جاتقانى تۋرالى حابار تۇسەدى. تىنىس الۋى ناشارلاعان, تۇلا بويىن تەر باسقان ول دەرەۋ جەز­قازعانداعى مەديتسينالىق ور­تالىقتىڭ جانساقتاۋ بولىمىنە جەتكى­زىلەدى. وعان ميوكارد ين­فارك­تى دەگەن دياگنوز قويىلادى دا انگيوگرافتىڭ كومەگىمەن دەرەۋ وپەراتسيا جاسالادى. جارتى ساعات جاسالعان وپەراتسيادان سوڭ اۋرۋ ومىرگە قايتا ورالادى.

– بارىنە سەبەپشى بولعان – سەرگىتكىش, ياعني ەنەرگەتيكالىق سۋسىندار. ءبىزدىڭ پاتسيەنتىمىز سونىڭ ءبىر كۇندە بىردەن بەس شولمەگىن ىشكەن كورىنەدى. ول بۇرىن دا بۇل سۋسىندى پايدالانىپ جۇرگەن عوي. اقىرىندا, ونىڭ قان تامىرلارى بىتەلۋگە اينالعان. ءبىز ستەند قويۋعا ءماجبۇر بولدىق, – دەيدى رەانيماتولوگ جاسۇلان يسكاكوۆ.

– ەنەرگەتيكالىق سۋسىندار اۋرۋعا دۋشار ەتەدى دەگەندى ءجيى ەستىسەم دە, ءمان بەرمەي كەلدىم. اۋرۋ­حانا كەرەۋەتىنە تاڭىلعاندا عانا وتكەنىمە كوز جۇگىرتىپ, جىبەر­گەن قاتەلىگىمدى ءتۇسىندىم. جۇرەككە سالماق سالعان سۋسىندار اۋەلىدە مەنى سەرگىتتى. بارا-بارا ۇيقىمدى قاشىردى. جۇرەگىم ءجيى سوعىپ, ءسال قيمىلداسام ەنتىگەتىن جاعدايعا جەتتىم. سوندا دا ەنەرگەتيكتىڭ كەسىرى ەكەنىن مويىندامادىم. سوڭى وتە قايعىلى جاعدايعا اكەلە جازدادى. دارىگەرلەردىڭ ارقاسىندا عانا امان قالىپ وتىرمىن, كورەتىن جارىعىم بار ەكەن, دەگەن د.گۋربانوۆ ەندى قايتىپ سەر­گىتكىشكە جولامايتىنىن ايتادى.

مامانداردىڭ مۇنداي سۋسىن­نىڭ دەنساۋلىققا وتە زيان ەكەنىن ايتقانىنا سەنۋ ءۇشىن مىندەتتى تۇردە اۋرۋحانا توسەگىنە تاڭىلۋ كە­رەك پە؟ بۇل بارشامىزدى وي­لان­دىرۋعا ءتيىس. د.گۋربانوۆ 41 جاستاعى اقىل توقتاتقان ازامات دەسەك, جاستار جاعى ەسكەرتپەلەرگە مۇلدە قۇلاق اسا قويمايدى عوي.

ينفاركت جاس تالعامايدى. سوندىقتان ونىڭ ەم-دومى ءمامس ەسەبىنەن جۇرگىزىلەدى.

«جەزقازعان مەديتسينالىق ورتا­لىعى» جشس-نىڭ كارديولو­گيالىق ءبولىمى 24 ورىنعا شاقتال­عان. مۇندا جىل باسىنان بەرى 313 ناۋقاسقا كوروناروگرافيا جاسالىپ, جەدەل ميوكارد ينفاركتى دياگ­نوزى قويىلعان ەكەن. ولاردىڭ بارلىعىنا قۇنى 1,5 ملن تەڭگەدەن باستالاتىن كورونارلىق شۋنتتاۋ وپەراتسياسى ءساتتى جاسالىپ, قازىر وڭالتۋ كۋرسىنان ءوتىپ جاتىر. ءمامس جۇيەسىندەگى مەديتسينالىق كومەك بارلىق ساقتاندىرىلعان ازاماتقا ولاردىڭ جارنالارىنىڭ مولشەرىنە قاراماستان, تەگىن كورسەتىلەتىندىگى ارقاسىندا وسىنشاما ادام مەديتسينالىق كومەك ال­عان. ال سولاردىڭ اراسىندا ەنەر­گەتيكالىق سۋسىننىڭ سالدارىنان سونداي كۇيگە تۇسكەندەرى دە بار­شىلىق. ايتالىق, جەزقازعان قالاسىندا سەرگىتكىشتى شامادان تىس پايدالانعان 30 جاستاعى ازامات قانت ديابەتىنە ۇشىراعان, حا­لىققا تاكسي قىزمەتىن ۇسىنى­پ جۇرگەن تاعى ءبىر ازامات وسى سۋ­سىننىڭ كەسىرىنەن تيرەو­توك­سيكالىق زوب دەرتىنە شال­دى­عىپ, مۇگەدەك بولىپ قالعان. جال­پى, بيىلدىققا سەرگيمىن دەپ سۋ­سىن ءىشىپ, سونىڭ سالدارىنان دەن­ساۋلىعى ناشارلاعان 8 ازاماتقا ءارتۇرلى دەڭگەيدەگى مەديتسينالىق كومەك كورسەتىلگەن ەكەن.

سەرگىتكىش جانىڭدى سەرگىت­پەيدى, كەرىسىنشە سەرگەلدەڭگە سالادى. بۇعان جوعارىداعى وقيعالار دالەل. ەندەشە, كىمگە بولسا دا سەرگەك ويمەن «سەرگىتكىش سۋسىن كەرەك پە؟» دەپ ويلانىپ كورگەننىڭ ەش ارتىعى بولمايتىن ءتارىزدى. قۇداي دا ساقتانعاندى عانا ساقتايدى.

جەزقازعان