ارتەم كەروكوۆ اتىراۋ قالاسىنداعى №17 مەكتەپ-ليتسەيىنىڭ 7-سىنىبىندا وقيدى. نۋميزماتيكاعا اڭسارى اۋعان وقۋشىنىڭ قورىندا 1993 جىلى قولدانىسقا ەنگىزىلگەن تەڭگەنىڭ العاشقى نۇسقالارى ساقتالعان. اكەسى سەرگەي دە ءار ەلدىڭ اقشاسىن جيناپ ءجۇر.
«العاشقى جيناعان بانكنوتىم – 30 جىل بۇرىن شىعارىلعان 100 تەڭگە. بۇل بانكنوتتا قازاق حانى – ابىلايدىڭ پورترەتى بەينەلەنگەن. ونى اكەم تۋعان كۇنىمە سىيلاعان ەدى. سول سەبەپتەن ونى ەڭ قىمبات بانكنوت دەپ ەسەپتەيمىن. سودان بەرى ءار ەلدىڭ اقشاسىن جيناي باستادىم. قازاقتىڭ ۇلى تۇلعالالارى شوقان ءۋاليحانوۆ, اباي قۇنانباي ۇلى, قۇرمانعازى ساعىرباي ۇلى, ءسۇيىنباي ارون ۇلى, ابىلقايىر حان بەينەلەنگەن تەڭگەلەر, ەۋروپا, افريكا, وڭتۇستىك افريكا, ونىڭ ىشىندە ترينيداد جانە توباگو, ەريتەريا, دجيبۋتي سەكىلدى 80 مەملەكەتتىڭ بانكنوتىن جينادىم», دەيدى ارتەم كەوركوۆ.
ول بوس ۋاقىتىن ءوزى جيناعان اقشالاردى زەرتتەۋگە ارنايدى. ويتكەنى ۆاليۋتاسىنان ءار ەلدىڭ تاريحى مەن مادەنيەتىنەن, ءتىپتى تابيعاتىنان اقپارات الۋعا بولادى.
«بارىنەن ەلىمىزدىڭ ۇلتتىق ۆاليۋتاسى – تەڭگەنىڭ ءجونى بولەك. تەڭگەنىڭ ديزاينىن ۇناتامىن. اكەم ەكەۋمىز شاعىن كورمە ۇيىمداستىرىپ, قاتىسۋشىلارعا تەڭگەنىڭ تاريحى, قۇندىلىعى تۋرالى اڭگىمەلەيمىز. ەلىمىزدىڭ ءار وڭىرىندە مونەتالارمەن الماساتىن دوستارىم بار», دەيدى ارتەم كەوركوۆ.
اتىراۋ وبلىسى
