جالپاق جۇرتتىڭ جۇيكەسىن توزدىرعان, بەينەتىن بەسباتپان ەتكەن وسى ماسەلەنىڭ تۇپكى سەبەبى – 1990 جىلدارى ەلەكتر جەلىلەرىنىڭ جەكەمەنشىككە وتۋىندە. ارينە, جەكەمەنشىككە وتكەننەن كەيىن وزدەرىنىڭ مىندەتتەرىن ادال اتقارىپ, قانشاما اۋىلدى ەلەكتر قۋاتىمەن ۋاقتىلى قامتاماسىز ەتىپ تۇرسا, ەشكىم دە وكپە-نازىن ايپاس ەدى. بۇگىندە 20 مىڭنان اسا حالىق تۇراتىن وسى اۋىلداردى ەلەكتر قۋاتىمەن قامتاماسىز ەتەتىن جەلىنىڭ 90 پايىزعا جۋىعى ابدەن توزىپ بىتكەن. مامانداردىڭ ايتۋىنا قاراعاندا, كومپانيا جەلى بويىنداعى اقاۋدى جوندەپ, جاڭعىرتۋعا قارجى بولمەي وتىر. اۋىل تۇرعىندارى ابدەن تيتىعىنا جەتكەن تۇيتكىلدى اۋداندىق اكىمدىككە جەتكىزىپ, ماسەلەنىڭ ءمانىسىن سۇراپ, قيىن ءتۇيىننىڭ قاشان شەشىلەتىنىن بىلگىسى كەلگەنىمەن, كوڭىل كونشىتەرلىك حابار-وشار جوق.
– ەلەكتر قۋاتى ءجيى ءسونىپ قالادى, – دەيدى شاعالالى اۋىلىنىڭ تۇرعىنى گالينا ميروشنيچەنكو, سونىڭ سالدارىنان سۋسىز دا قالامىز, جاز بويى ابدەن قيىندىق كوردىك. جارىق ءجيى ءوشىپ قالاتىندىقتان, تۇرمىستىق تەحنيكالارىمىز دا ىستەن شىعىپ جاتىر. ءبىزدىڭ اۋىل ۇلكەن ەلدى مەكەن بولعانىمەن, كولونكالار دا از. بارىنىڭ ءوزى توزىپ ءبىتتى. قازىر ءبىر-ەكەۋى عانا جۇمىس ىستەپ تۇر. اۋىلداعى احۋالدى اكىمدىك جاقسى بىلەدى, بىراق قيىندىقپەن كۇن كەشىپ جاتقان اۋىلداردىڭ تۇرمىستىق جاعدايىن تۇزەۋگە كەلگەندە نەگە تارتىنا بەرەتىنى تۇسىنىكسىز. اۋداندىق اكىمدىكتىڭ تۇرعىن ءۇي-كوممۋنالدىق شارۋاشىلىعى ءبولىمى ەلەكتر جەلىلەرىنىڭ «زەرەندى گرۋپپ» اكتسيونەرلىك قوعامىنا تيەسىلى بولعاندىقتان ەش قايرانى جوق. اۋداننىڭ وڭتۇستىك بولىگىندەگى ەلەكتر جەلىسى بويىندا اپاتتىڭ ءجيى بولۋىنا بايلانىستى اۋدان اكىمدىگى 2021 جىلى تەحنوگەندىك سيپاتتاعى توتەنشە جاعداي جاريالاۋعا شەشىم قابىلداعان.
تۇرعىنداردىڭ ايتۋىنا قاراعاندا, كورەسىنى قىستىڭ كۇنى كورەدى ەكەن. وزگەسىن بىلاي قويعاندا اۋدان ورتالىعىنىڭ كەيبىر بولىگى اۋىز سۋسىز قالادى. اۋداندىق اكىمدىككە سۋ قۇبىرىن ورناتۋ تۋرالى ايتىلعان وتىنىشتەرىنە الاتىن جاۋابى جەر تاستاق. ارينە, تاستاق جەردى قازۋ, قۇبىر ورناتۋ قيىن دا شىعار, بىراق قازىر تەحنولوگيانىڭ دامىعان زامانىندا وسى ءبىر تىعىرىقتان شىعار جول تابىلماي تۇر دەۋدىڭ ءوزى كۇماندى.
– ەلەكتر باعانالارى دا تۇبىنەن ءشىرىپ, انە-مىنە قۇلاپ قالايىن دەپ قاۋساپ تۇر. وسىنىڭ ءوزى-اق قاتەر ەمەس پە؟! – دەيدى اۋىل تۇرعىنى باۋىرجان ەرجان ۇلى.
ايتسا ايتقانداي, ەلەكتر جەلىسى جارتى عاسىردان بەرى جاڭارتىلماعان. قانشاما بەرىك ەتىپ سالىنسا دا, جەلدىڭ وتىندە, جاۋىن-شاشىننىڭ سالدارىنان توزىپ تۇر. اراگىدىك جامباستاي قيسايعان باعانانى, اششى ىشەكتەي شۇباتىلىپ جاتقان سىمدى كورۋگە بولادى. تۇرعىنداردىڭ ايتۋىنا قاراعاندا, كوز بايلانا حالىق ەلەكتر قۋاتىن كوبىرەك پايدالانعان كەزدە ترانسفورماتورلاردىڭ قۋاتى جەتپەي, وت ۇشقىنداپ, يمانىن قاسىم ەتەدى.
وقىرمانعا تۇسىنىكتى بولۋى ءۇشىن ءسال تاراتىپ ايتا كەتەلىك. اۋدانداعى 180-گە جۋىق ترانسفورماتور مەن 800 شاقىرىمنان اسا ەلەكتر جەلىسى – جەكە كومپانيانىڭ يەلىگىندە. كاسىپكەردىڭ ءوزىن تابۋ قيىن. اۋىل ادامدارى شاعىمىن ايتپاق بولىپ كۇندىز قولدارىنا شام الىپ ىزدەسە دە تابا المايدى. ءبىزدىڭ دە تىلدەسپەك بولىپ تالپىنعان ارەكەتىمىز ناتيجەسىز بولدى.
اۋداندىق اكىمدىكتىڭ ايتۋىنا قاراعاندا, 2018-2019 جىلدارى ەلەكتر جەلىلەرىندەگى اپاتتاردى جويۋ جانە قالىپتى جاعدايدا ۇستاپ تۇرۋ ءۇشىن امالسىزدان بيۋدجەت قاراجاتىن جۇمساعان. ەندى ونى قايتارىپ الۋ ءۇشىن سوتقا جۇگىنۋدە. سوت ۇدەرىسى ءالى كۇنگە دەيىن جالعاسىپ جاتىر. قازىرگى مەنشىك يەسى «زەرەندى گرۋپپ» ەلەكتر جەلىلەرىن ساتقىسى كەلمەيدى. ەندىگى جالعىز جول – جاناما ەلەكتر جەلىلەرىن ورناتۋ. سوندا عانا قىرىققا جۋىق اۋىلدىڭ اسپانىندا ءۇمىت ساۋلەسى جانۋى مۇمكىن.
اقمولا وبلىسى,
زەرەندى اۋدانى
