«ۆولونتەرلەر اسىرەسە پاندەميا كەزىندەگى احۋالدى جەڭىلدەتۋگە كوپ ۇلەس قوستى. قازىر ءار سالادا ەرىكتى بولىپ, مەيىرىمدىلىك پەن جاۋاپكەرشىلىكتىڭ ۇلگىسىن كورسەتىپ جۇرگەندەر كوپ. ولاردىڭ بارلىعى قايىرىمدىلىق ءىس-شارالارىنا قاتىسىپ, قارتتارعا, كوپبالالى, از قامتىلعان وتباسىلارعا قول ۇشىن سوزادى. بۇل – كوپكە ۇلگى بولاتىن ءىس», دەيدى نۇرلىبەك جەڭىسبەك ۇلى.
ال وبلىستىق «ازاماتتىق ورتالىق» كمك باسشىسى جانات دوسقاليەۆانىڭ ايتۋىنشا, ءتۇرلى ۆولونتەرلىك ۇيىممەن, جاستار رەسۋرستىق ورتالىقتارىمەن, قالا مەن اۋىلدارداعى ۆولونتەرلىك كلۋبتارمەن تىعىز بايلانىس ورناعان. سونداي كلۋبتىڭ قاتارىندا «28 ىلمەك» تە بار. قازىر بۇل كلۋبتىڭ قۇرامىندا 50-گە جۋىق ەرىكتى توپتاسقان. ولار 11 جىلدان بەرى شالا تۋعان نارەستەلەرگە تازا جۇننەن كيىم توقىپ بەرىپ ءجۇر.
بۇل وڭىردەگى تانىمال ەرىكتىنىڭ ءبىرى – ارمان قاسىموۆ. مۇناي-گاز كومپانياسىندا قارجىگەر ماماندىعىمەن جۇمىس ىستەيدى. بىراق 12 جىلدان بەرى بوس ۋاقىتىن جەدەل جاردەم دارىگەرلەرىمەن بىرگە وتكىزىپ كەلەدى. باستاپقىدا سانيتار بولعان. كەيىن جەدەل جاردەم كولىگىن جۋعان. قازىر ول ناۋقاستارعا جۇرەك-وكپە رەانيماتسياسىن, كارديوگرامما جاساۋدى ۇيرەنىپ العان.
«جاقىندا ۆولونتەرلىك ۇيىمداردىڭ جۇمىسىنا قولداۋ كورسەتۋ ءۇشىن «Demeý» بايقاۋى ۇيىمداستىرىلدى. ونىڭ قورىتىندىسىمەن ۇزدىك تانىلعان 5 جوبا يەسىنە 500 مىڭ تەڭگەدەن بەرىلدى. ءبىز ەرىكتىلەر قاتارىنان اعا بۋىن وكىلدەرىن دە كوبىرەك كورگىمىز كەلەدى. ويتكەنى ەرىكتى بولۋ ءۇشىن جاس شەكتەۋى جوق. قازىر 50 جاستان اسقان ادامدار اراسىندا «كۇمىس ۆولونتەرلىكتى دامىتۋ» جوباسى قولعا الىندى. جوبانىڭ باستى ماقساتى – اعا بۋىن وكىلدەرى اراسىندا باستاماشىل توپتار قۇرۋ, الەۋمەتتىك ماسەلەلەردى شەشۋگە جاردەمدەسۋ, قايىرىمدىلىق, ەكولوگيالىق ءىس-شارالاردى ۇيىمداستىرۋ, ۇرپاقتار ساباقتاستىعىن ارتتىرۋ. الدىڭعى بۋىن وكىلدەرىنىڭ ءوزىن-ءوزى دامىتۋىنا, بەلسەندى بولۋىنا ىقپال ەتۋ, سالاماتتى ءومىر سالتى ءۇشىن قولايلى جاعدايلار جاساۋ. بۇل جوبا اياقتالعانىمەن, قارت كىسىلەر جاڭا دوستار تاپتى. وسى جوبا ارقىلى ءبىر-ءبىرىن ۇناتىپ, ۇيلەنگەندەر دە بار», دەيدى ج.دوسقاليەۆا.
بايقاۋعا قاتىسقان ءاسيا قۇلجانوۆانىڭ جوباسى جوعالعان ادامداردى ىزدەستىرۋگە ارنالعان. ول جەتەكشىلىك ەتەتىن «باتىس» ۆولونتەرلىك توبىنىڭ ەرىكتىلەرى ءىز-ءتۇزسىز جوعالىپ, حابارسىز كەتكەن جانداردىڭ سۋرەتى مەن دەرەگىن ءىلىپ, ىزدەۋ جۇمىسىن جۇرگىزەدى. ماسەلەن, اتىراۋ وبلىستىق پوليتسيا دەپارتامەنتىنىڭ باسشىسى نۇرحات ورازباەۆتىڭ مالىمەتىنشە, جىل باسىنان بەرى جوعالعان ادامداردى ىزدەستىرۋ جۇمىستارىنا 5 مىڭنان استام ەرىكتى جۇمىلدىرىلعان. ۆولونتەرلىك توپ 40-تان استام ءجاسوسپىرىمنىڭ امان-ەسەن تابىلۋىنا اتسالىسقان.
تاعى ءبىر ەرىكتى ارمان اراپبەكوۆ مۇنايلى شاھارداعى مەكتەپتەردىڭ اۋلاسىنا جەمىس اعاشتارىن ەگۋدى قولعا العان. «ومىرگە قۇشتار» جوباسىنىڭ باستاماشىل توبى ەرەكشە كومەكتى قاجەت ەتەتىن جانە تۇرمىسى تومەن وتباسىلاردىڭ بالالارىنىڭ ۇيىرمەلەرگە تەگىن بارۋىنا كومەكتەسەدى. ال «اسا قاجەت» جوباسىنىڭ ەرىكتىلەرى يساتاي اۋدانىنداعى مەكتەپتىڭ بىرىنە ۇساق موتوريكانى دامىتۋعا ارنالعان قۇرالدار اكەلىپ بەردى. «ەر جۇرەكتىلەر» ۇيىمىنا بىرىككەن جاستار «ۇيدەن ءبىر قادام» جوباسى اياسىندا ماحامبەت اۋدانىنداعى سارايشىق قالاشىعىنا ءبىر كۇندىك تۋر ۇيىمداستىرىپ ءجۇر.
اتىراۋ وبلىسى
