جاڭاتالاپ – جايىق وزەنى جاعاسىنداعى بالىقشىلىقتى كاسىپ ەتۋشىلەر تۇراتىن اۋىلدىڭ ءبىرى. كەزىندە بۇل اۋىلدىڭ ىرگەسىن قالاعان جاندار بۇرىن يساتاي اۋدانىندا تۇرعان. كەيىن وبلىس ورتالىعىنا تاياۋ ماڭعا كوشىرىلگەن. زامان لەبىمەن جاڭارعان, بىرنەشە ۇرپاق الماسقان اۋىلدىڭ تۇرعىندارى تاريحي «ەگەمەن قازاقستان» گازەتىندە جۇمىس ىستەگەن نۇريدەن مۇفتاح پەن باسىلىمنىڭ وسى وڭىردەگى مەنشىكتى ءتىلشىسى بولعان قازيحان قابدەلدىڭ ادامي, شىعارماشىلىق قاسيەتى تۋرالى ءالى كۇنگە اڭگىمەلەيدى.
اۋىل تۇرعىندارى بەلگىلى قالامگەردىڭ ەسىمىن كوشەگە بەرۋ تۋرالى ۇسىنىستى قۋانا قۇپتادى. اتىراۋ قالاسى اكىمىنىڭ ورىنباسارى نۇرجان ەرمۇحانوۆتىڭ ايتۋىنشا, ەلگە تانىمال تۇلعالاردىڭ ەسىمىن ەستە قالدىرۋ – كەيىنگى ۇرپاق ءۇشىن ونەگە بولارلىق ءىس.
«جۋرناليست نۇريدەن مۇفتاح ەسىمى تەك ءبىر اۋىلعا, ءبىر وڭىرگە عانا ەمەس, تۇتاس ەلگە كەڭىنەن تانىمال بولعان. قالامگەردىڭ ەسىمى جاڭادان بوي تۇزەگەن كوشەگە بەرىلدى. دەمەك تاۋەلسىز ەلىمىزبەن بىرگە جاڭاتالاپ اۋىلى دا كەڭ قانات جايىپ كەلەدى. ەندى قالامگەردىڭ دارحان كوڭىلىمەن, باتىل مىنەزىمەن كوپتەگەن ادامعا قولداۋىن كورسەتىپ, قوعامعا ادال قىزمەت ەتكەن ۇلگىسىن جاس بۋىنعا دارىپتەيمىز», دەدى ن.ەرمۇحانوۆ.
قالامگەردىڭ تۋىسقاندارى اتىنان امانگەلدى قۋاناليەۆ ەستەلىك ايتتى. ەل ەسىندەگى جۋرناليست ەڭبەك جولىن قاراعاندى وڭىرىندەگى شاحتادا شاحتەردىڭ كومەكشىسى بولىپ باستاعان. كەيىن جۋرناليستىك جولعا تۇپكىلىكتى بەت بۇرعان. ومىردەن وتكەنگە دەيىن قۇقىق تاقىرىبىنا قالام تارتىپ, كۇردەلى قوعامدا ادىلەتتىلىك جوقشىسى بولدى.
اتىراۋ وبلىسى
