ءالى دە بولسا قۇلاشىن تولىق جايا الماي وتىرعان مەترو بۇل ماسەلەنى تولىق رەتتەي الماي وتىرعانىمەن, سوڭعى كەزدە قالا بيلىگى الماتى مەتروپوليتەنىندە قوسىمشا قۇرامداردى جولعا شىعارىپ, تاڭعى جانە كەشكى قاربالاس ۋاقىتتا جەلىدەگى پويىزداردىڭ كەلۋ جيىلىگىن 5 مينۋت 38 سەكۋندقا جەتكىزدى.
ويتكەنى كۇزدە جاڭا وقۋ جىلىنىڭ باستالىسىمەن جولاۋشىلار لەگى 70 مىڭنان 90 مىڭعا دەيىن وسكەن. ءتىپتى ارنايى تالداۋلار مەترو جولاۋشىلارىنىڭ سانى كەيدە كۇنىنە 100 مىڭعا دەيىن جەتەتىنىن كورسەتكەندىكتەن, جەلىگە قوسىمشا قۇرام شىعارۋ تۋرالى شەشىم قابىلداندى. ءاربىر قۇرام 900 ادامدى سىيدىرا الاتىن 4 ۆاگوننان تۇرادى.
سول سياقتى بيىل قالاعا 55 تروللەيبۋس جەتكىزىلگەن, ونىڭ 19-ى №1, №9, №12, №5, №11, №25, №7, №19, №6 مارشرۋتتارعا بەرىلدى. الماتىدا كورسەتىلگەن باعىتتار بويىنشا تاعى 17 جاڭا تروللەيبۋس قوسىلدى. سونىڭ ارقاسىندا بارلىق 9 تروللەيبۋس باعىتى بويىنشا 60% جاڭا تروللەيبۋستار جولعا شىقتى.
الماتىنىڭ №1 تروللەيبۋس پاركى Yutong ZK6128BEVG 12 مەترلىك تومەن ەدەندى تروللەيبۋستاردىڭ ءبىرىنشى پارتياسىن السا, جىلجىمالى قۇرام سوڭعى 11 جىلدا العاش رەت جاڭارتىلىپ جاتىر. بۇل تروللەيبۋستار ەلەكتر قۋاتى تاۋسىلىپ قالسا, باتارەيامەن جۇرە الادى.
جالپى, الداعى جىلدارى كولىك قوزعالىسىن جاقسارتۋ جانە قالا ماڭى تۇرعىندارىن قوعامدىق كولىكپەن قامتاماسىز ەتۋ ماقساتىندا «الماتى قالاسىن دامىتۋدىڭ 2025 جىلعا دەيىنگى باعدارلاماسىن جانە 2030 جىلعا دەيىنگى ورتا مەرزىمدى كەلەشەگىن» ىسكە اسىرۋ جونىندەگى جول كارتاسىنا سايكەس 2024 جىلدىڭ سوڭىنا دەيىن قالا ماڭىنا قاتىنايتىن 20 جاڭا مارشرۋت ۇيىمداستىرۋ جوسپارلانىپ وتىر. مۇنداي شەشىمدى دەپۋتاتتار الماتى قالاسى ءماسليحاتىنىڭ كەزەكتەن تىس ءحى سەسسياسىندا قابىلدادى.
2023 جىلدىڭ سوڭىنا دەيىن قالا ماڭىنا قاتىنايتىن 10 جاڭا مارشرۋت ۇيىمداستىرۋ كوزدەلسە, قازىر ونىڭ 9-ى اشىلدى. كەلەر جىلى قاتارعا قوسىلاتىن باعىتتارعا قاتىستى قالالىق باق ەگجەي-تەگجەي ءتۇسىندىرىپ, اقپارات تاراتىپ وتىر.
سول سياقتى تاقىرىپقا ورايلاس, «ادامدار ءۇشىن جاسالعان» قاعيداتىنا ساي الماتىداعى ايالداما كەشەندەرىنىڭ جاڭا تۇرلەرى پايدا بولىپ جاتقانىن ايتا كەتۋ كەرەك. مىسالى, بۇل – ناۋرىزباي اۋدانىنداعى №7 قالالىق كلينيكالىق اۋرۋحانانىڭ الدىنا قويىلعان ايالداما كەشەنى.
«مۇنداي ايالداما تۋرالى سەنىمدى تۇردە «ادامدار ءۇشىن جاسالعان» دەپ ايتۋعا بولادى. ياعني قانداي دا ءبىر ستاندارتتى جوبا عانا ەمەس, جولاۋشىلاردىڭ قاجەتتىلىكتەرى ەسكەرىلگەن. قولايسىز اۋا رايىندا ايالداماعا كوپ ادام سيادى», دەيدى ۋربانيست ديدار شاجاليەۆ.
الماتى
