«قازاقستان رەسپۋبليكاسى كونستيتۋتسياسىنىڭ 44-بابىنىڭ 21) تارماقشاسىنا سايكەس وتاندىق جانە شەتەلدىك ينۆەستورلار ىسكە اسىراتىن ينۆەستيتسيالىق جوبالاردى ءتيىمدى جانە پارمەندى تۇردە قولداۋ جونىندەگى قىزمەتتى ۇيلەستىرۋ مەن باقىلاۋ دەڭگەيىن ارتتىرۋ ەسەبىنەن ولاردى ىسكە اسىرۋ ارقىلى ەكونوميكالىق ءوسۋدىڭ جوعارى قارقىنىن جانە ۇلتتىق ەكونوميكانى ناقتى ءارتاراپتاندىرۋدى قامتاماسىز ەتۋ ماقساتىندا قاۋلى ەتەمىن:
1. ينۆەستيتسيالاردى تارتۋ جونىندەگى كەڭەستىڭ (ينۆەستيتسيالىق شتابتىڭ) مىناداي:
1) ورتالىق جانە جەرگىلىكتى مەملەكەتتىك ورگانداردىڭ, سونداي-اق كۆازيمەملەكەتتىك سەكتور سۋبەكتىلەرىنىڭ ورىنداۋى ءۇشىن مىندەتتى شەشىمدەر قابىلداۋ;
2) قازاقستان رەسپۋبليكاسى كونستيتۋتسياسىنىڭ 61-بابىنا سايكەس قازاقستان رەسپۋبليكاسىنىڭ ۇكىمەتى قابىلدايتىن زاڭ كۇشى بار ۋاقىتشا نورماتيۆتىك قۇقىقتىق اكتىلەردى ازىرلەۋ;
3) قازاقستان رەسپۋبليكاسىنىڭ پرەزيدەنتىنە جانە قازاقستان رەسپۋبليكاسىنىڭ پرەمەر-مينيسترىنە ينۆەستيتسيالىق شتابتىڭ شەشىمدەرىن ورىنداماعانى نەمەسە تيىسىنشە ورىنداماعانى ءۇشىن ورتالىق جانە جەرگىلىكتى مەملەكەتتىك ورگانداردىڭ, سونداي-اق كۆازيمەملەكەتتىك سەكتور سۋبەكتىلەرىنىڭ باسشىلارىن تارتىپتىك جاۋاپتىلىققا تارتۋ, ونىڭ ىشىندە اتقاراتىن لاۋازىمىنان بوساتۋ جونىندە ۇسىنىستار ەنگىزۋ وكىلەتتىكتەرى ايقىندالسىن.
2. مىنالاردىڭ:
1) ينۆەستيتسيالىق شتاب توراعاسى مەن مۇشەلەرىنىڭ قازاقستان رەسپۋبليكاسىنىڭ پرەزيدەنتىنە توقسانىنا كەمىندە ءبىر رەت جۇرگىزىلگەن جۇمىس تۋرالى ەسەپ ۇسىنا وتىرىپ, ينۆەستيتسيالىق احۋالدى جاقسارتۋ, سونداي-اق ينۆەستيتسيالىق جوبالاردى ۋاقتىلى ىسكە اسىرۋ ءۇشىن;
2) ورتالىق جانە جەرگىلىكتى مەملەكەتتىك ورگاندار, سونداي-اق كۆازيمەملەكەتتىك سەكتور سۋبەكتىلەرى باسشىلارىنىڭ ينۆەستيتسيالىق شتاب شەشىمدەرىن ورىنداماۋ نەمەسە تيىسىنشە ورىنداماۋ ءۇشىن دەربەس جاۋاپكەرشىلىگى بەلگىلەنسىن.
3. قازاقستان رەسپۋبليكاسىنىڭ ۇكىمەتى وسى جارلىقتان تۋىندايتىن شارالاردى شۇعىل تارتىپپەن قابىلداسىن.
4. وسى جارلىقتىڭ ورىندالۋىن باقىلاۋ قازاقستان رەسپۋبليكاسى پرەزيدەنتىنىڭ اكىمشىلىگىنە جۇكتەلسىن.
5. وسى جارلىق قول قويىلعان كۇنىنەن باستاپ قولدانىسقا ەنگىزىلەدى», دەلىنگەن حابارلامادا.
