فوتو: اشىق دەرەككوزدەن
پاۆلودار وبلىسىندا 8-سىنىپ وقۋشىسى جۇكتىلىگىن 25 اپتاعا دەيىن بىلمەگەن. مەكتەپ مۇعالىمدەرى قىركۇيەكتە كەلگەن وقۋشىنىڭ قازان ايى بويى اۋىرعانىن ايتىپ, ءبىرشاما ۋاقىت باقىلاعان. مەكتەپ ۇجىمى وقۋشى قىزدىڭ مۇنداي سۇمدىق جاعدايعا تاپ بولاتىنىن كۇتپەگەن. الايدا ۋاقىت وتە وقۋشى قىزدىڭ ءىشى شىعا باستاعانىن بايقاعان مۇعالىمدەر قىزدى دەرەۋ اۋرۋحاناعا اپارىپ, جۇكتىلىگى انىقتالعان.
قۇزىرلى ورىندارعا حابارلانعاننان كەيىن وقۋشى قىز وگەي اكەسىنەن جاپا شەككەنىن ايتقان.
وقۋ-اعارتۋ ءمينيسترى عاني بەيسەمباەۆ بۇل وقيعا قۇلاعىنا جەتكەنىن ايتىپ, وقيعاعا قاتىستى پىكىر ءبىلدىردى:
«ماسەلە مەنىڭ جەكە باقىلاۋىمدا. تەرگەۋ امالدارى اياقتالعاننان كەيىن ناقتى شەشىمدەر قابىلدانادى. بالالاردىڭ قۇقىقتارىن قورعاۋ كوميتەتى جەدەل شارالاردى قولعا الادى. وقۋشى ءبىلىم الىپ جۇرگەن مەكتەپ ۇجىمىنا قاتاڭ سوگىس بەردىك», دەدى ول.
ايماقتىق پوليتسيا دەپارتامەنتى جايسىز وقيعا بولعانىن, كۇدىكتىنىڭ ۇستالعانىن راستادى.
