ۇكىمەتتە جولدىڭ جايى تالقىلاندى

بيىلعى 9 ايدىڭ قورىتىندىسى بويىنشا رەسپۋبليكادا جۇك تاسىمالىنىڭ كولەمى 5,5 ملن تونناعا جەتكەن. بۇل وتكەن جىلمەن سالىستىرعاندا  22%-عا ارتىق. تاسىمالداعى وتاندىق وپەراتورلاردىڭ ۇلەسى 42%-دى قۇراعان.

«ترانزيتتىك تاسىمالداردا دا وڭ ءۇردىس بايقالادى. وتكەن جىلمەن سالىستىرعاندا 44% دەڭگەيىندە – 2,5 ملن توننادان 3,6 ملن تونناعا دەيىن ءوسىم بولدى. نەگىزگى جۇك كولەمى قىتاي ەلىنە تيەسىلى, اتالعان باعىت بويىنشا جۇك تاسىمالى 2 ەسەگە, ياعني, 1,5 ملن تونناعا دەيىن ارتتى. سونىمەن قاتار قىتايدان ەۋروپاعا تاسىمالداناتىن ترانزيتتىك جۇكتەردىڭ كولەمىن ودان ءارى ارتتىرۋدىڭ ۇلكەن الەۋەتى بار. اعىمداعى سەرپىندى ساقتاي وتىرىپ, قازاقستان اۋماعى ارقىلى وتەتىن ترانزيت دەڭگەيى 2029 جىلعا قاراي 5 ەسەگە ارتادى, بۇل ەل ەكونوميكاسىنىڭ دامۋىنا وڭ اسەر ەتەدى.

تەڭىز ارقىلى جەتكىزىلەتىن جۇكتەردى اۆتوكولىككە اۋدارۋ جانە تاسىمالداردا وتاندىق وپەراتورلاردىڭ ۇلەسىن ۇلعايتۋ ءۇشىن بوند قويمالارىن ۇيىمداستىرۋ, وتكىزۋ بەكەتتەرىنىڭ قۋاتىن ارتتىرۋ, ىشكى اۆتوپاركتى كەڭەيتۋ, سونداي-اق رۇقسات بەرۋ قۇجاتتارىن ءبولۋدىڭ ءتيىمدى جۇيەسىن ەنگىزۋ جونىندە شارالار قابىلداناتىن بولادى», دەلىنگەن حابارلامادا.

ءاليحان سمايىلوۆ اۆتوموبيل كولىگىمەن جۇك تاسىمالداۋ سالاسىنىڭ دامۋى ەكونوميكانىڭ بارلىق سەكتورلارىنا وڭ اسەرىن تيگىزەتىنىن ايتتى. قازىرگى تاڭدا قازاقستان ارقىلى 8 حالىقارالىق اۆتوموبيل ءدالىزى وتەدى. ولاردىڭ جالپى ۇزىندىعى شامامەن 13 مىڭ شاقىرىم. نەگىزگى كۇرە جولداردىڭ قاتارىندا باتىس ەۋروپا – باتىس قىتاي, سولتۇستىك – وڭتۇستىك, تراسەكا باعىتتارىن ايتۋعا بولادى.

«اتالعان باعىتتار بويىنشا جۇك تاسىمالىن ۇلعايتۋ جانە جۇكتەردىڭ جىلدام ءوتۋىن قامتاماسىز ەتۋ ءۇشىن بۇل سالاداعى كەدەرگىلەردى بارىنشا قىسقارتۋ قاجەت. ولاردىڭ قاتارىنا شەكاراداعى كەپتەلىستەر مەن قۇجاتتاردىڭ ۇزاق راسىمدەلۋىن, ينفراقۇرىلىم ساپاسىن, ۇيىمداستىرۋ جۇمىستارىنىڭ ناشارلىعىن جانە كوپتەگەن باسقا دا جايتتاردى جاتقىزۋعا بولادى. كولىك يەلەرىنەن كەلىپ تۇسەتىن شاعىمدار كوبىنە وسى ماسەلەلەرگە قاتىستى», دەدى ءا.سمايىلوۆ.

ۇكىمەت باسشىسى  جۇكتەر مەن قۇجاتتاردىڭ تىم ۇزاق تەكسەرىلۋى دە نارازىلىق تۋعىزاتىنىن,  تسيفرلىق تەحنولوگيالار مەن اقپاراتتىق جۇيەلەردىڭ ينتەگراتسياسى ارقىلى بۇل ماسەلەلەردى وسى ۋاقىتقا دەيىن ءبىر جۇيەگە كەلتىرۋگە بولاتىنىن  ەسكەرتتى.