تاڭ قالماڭىز, كومپوزيتسيالىق قۇرىلىمى وقيعاسىنىڭ باس سالىپ باستالىپ, دامۋىنان شيەلەنىسىپ, شارىقتاۋ شەگىنە دەيىن شىعانداپ بارىپ, ودان سوڭ شەشىمىن تاۋىپ, ءتۇيىنى تارقاتىلعانشا شيىرشىق اتىپ تۇراتىن شىعارمانىڭ تىم تارتىمدى ورىلەتىنى سونشا, ءسىز عانا ەمەس, وقىپ كورمەكشى بولعان كەز كەلگەن ادام ءسىزدىڭ وسى دەل-سال كۇيىڭىزدى كەشەدى. اڭگىمە كەيىپكەرلەرىنىڭ جاعىمدىسىنا بولىسىپ, جاعىمسىزىنان اراشالاپ العىسى كەلىپ, الاپات كوڭىل كۇيدى باسىنان وتكەرەدى. بىراق قاي وقىرمان بولسا دا كەيىپكەر كەنجەعازىنى اجالدان قۇتقارا المايدى. ال نەبىر قيىندىقتى كورسە دە ونىڭ بالاسى مەن كەلىنشەگى امان قالادى. ويتكەنى ولاردىڭ پەرىشتەلەرى قاعادى. انىعىندا ول پەرىشتە – كىسى يەسى. «كىسى يەسىن» ولارعا جىبەرتكىزىپ, قورعان قىپ وتىرعان – وسى اڭگىمەنىڭ ەگەسى. اۆتور. «قازانشىنىڭ ەركى بار, قايدان قۇلاق شىعارسا». اۆتور ءوزىنىڭ اسقان شەبەرلىگىمەن وسى شاعىن شىعارماداعى شىم-شىتىرىق وقيعاعا ءسىزدى بار جان-تانىڭىزبەن قۇلاي سەندىرتەدى. شىعارما ءوزىنىڭ شىنايىلىعىمەن باۋراپ العاندىعى سول ەمەس پە, سىزدەي وقىرماندى سول كىتاپتاعى سوناۋ ءبىر ناۋبەتتى جىلداردىڭ زۇلماتىنا اپارىپ كەلىپ, قايتىپ, وسى قازىرگى زامانعى داۋىرىڭىزگە ءدىن امان ورالدىرتقىزدىرعان. ويتكەنى بۇل شىنايى شىعارما جازۋشى نەسىپبەك ءداۋتاي ۇلىنىڭ قالامىنان تۋعان.
مەنىڭ قولىمدا جوعارىداعى «كىسى يەسى» اتتى كوركەم اڭگىمەنىڭ اتىمەن اتالعان كىتاپ. كىتاپتا «كىسى يەسىنەن» دە باسقا, قاتتى اسەر ەتىپ, تەرەڭ ويلار مەن تەلەگەي سەزىمدەرگە باتىراتىن «تاعدىر», «قانقىزىل جالقىن», «قۇمعا قاشقان قۇيىن», «كوگىلدىر كويلەكتى كەلىنشەك», «ونەش, كومبيناتور, الجاپقىش», «ارحيتەكتور», «ايعىركىسى», «ماكەڭدەر, مالسەكەڭدەر, زامان», «مىنەز», «تىلالشاق», «باتىر» دەگەن اڭگىمەلەر مەن «اقكۇشىك», «التىن بالىق» اتتى ەكى پوۆەست بار.
ىشكى مازمۇنى قانشالىقتى قىزعىلىقتى بولسا, كىتاپتىڭ ءوزى ماعان سونشالىقتى ىستىق. سەبەبى مەملەكەتتىك تاپسىرىسپەن 2018 جىلى استانانىڭ «فوليانت» باسپاسىنان جارىق كورگەن بۇل كىتابىن نەسىپبەك اعا ماعان ءوز قولىمەن سىيلاپ ەدى. كەيىپكەرلەر حاريزماسىنداعى ۇلتتىق مىنەز ارقىلى بۇگىنگى ءومىردىڭ كۇنگەيلى, كولەڭكەلى تۇستارى بۇكپەسىز اشىق كورسەتىلگەن كىتاپتىڭ مۇقابادان كەيىنگى بوس تازا بەتىنە ء«ۇمىت قارىنداسىما ىزگى نيەتپەن! اۆتور. 25.09.2019 جىل» دەپ مارجانداي جازۋىمەن قوندىرىلعان قولتاڭباسى مەنمۇندالايدى. مۇنىڭ الدىندا دا وسى سەكىلدى اق نيەتتى تىلەگىمەن اۆتوگرافىن بەرگەن نەسىپبەك اعانىڭ بىرنەشە تۋىندىسى مەنىڭ جەكە مۇراعاتىمدا كوزىمنىڭ قاراشىعىنداي ساقتاۋلى. تەك, مىنا كىتابىنا نازار اۋدارتىپ وتىرعانىمنىڭ ءمانىسى بار. بۇل كىتابىنداعى قولتاڭبا قويىلعان كۇننەن كەيىن ايلار اۋىسىپ, جىلدار جىلىستاپ, از-اق ۋاقىت وتكەندە, ول كىسىدەن قاپەلىمدە ايىرىلىپ قالىپ, قازاق ادەبيەتى اۋىر قازاعا ۇشىرايدى دەپ كىم ويلاعان...
نەسىپبەك اعا. اينالاسىنداعىلار نەسەكەڭ, كىشىلەر نەساعا, جاس اقىندار مەن جازۋشىلار كوكە اتاپ كەتكەن نەسىپبەك ءداۋتاي ۇلى.
حاميت ەسامان, نۇرجان قادىرالى, تابيعات ابايلداەۆ, ارايلى جاقسىلىق, دانيار الىمقۇل, تۇرسىنبەك سۇلتانبەك, ارداق ۇسەيىنوۆا, فاريزا ابدىكەرىموۆا, كاميلا بوراشەۆا سەكىلدى جامبىلدىق ءبىرتالاي دارىندارعا, جاس پەرىلەرگە رۋحاني اكە بولعان, ۇستاز بولعان بىردەن-ءبىر ادام.
سوناۋ تالاس اۋدانىندا تۇراتىندىعىما قاراماستان, مەنىڭ وبلىس ورتالىعىنداعى قازاق دراما تەاترىندا اتالىپ ءوتىلىپ جاتقان ەلۋ جىلدىق مەرەيتويىمنىڭ ساحناسىندا قۇتتىقتاۋ ءسوز سويلەپ تۇرىپ, مەن ارقىلى باسقا قالامگەرلەرگە دە كوكەيىندەگى لىقسىعان ويىن توگىلتە اقتارعانى ەستە.
«كىسىنىڭ قادىرىنە كىسى جەتەدى. حالىقتىڭ قادىرىنە بيلىك, بيلىكتىڭ قادىرىنە حالىق جەتەدى. ادامنىڭ قادىرى ۇزىن ارقان سياقتى. ءبىر ۇشى ءوزىنىڭ قولىندا تۇرادى, ءبىر ۇشى قۇدايدىڭ قولىندا. كىمدە-كىم سول ءوزىنىڭ قولىندا تۇرعان ارقاننىڭ ءبىر ۇشىن مىقتى ۇستاپ, قۇدايدىڭ قولىنداعى ۇشىنا دەيىن ءوزىنىڭ ادامگەرشىلىگىمەن, كىسىلىگىمەن, تار جول, تايعاق كەشۋىمەن – بارلىعىن باسىنان وتكىزىپ, جەتكىزسە, ول ادام قۇدايعا جاقىنداي تۇسەدى. اكىمنىڭ دە, اقىننىڭ دا, ءارتىستىڭ دە, كاسىپكەردىڭ دە – ءبارىنىڭ شارۋاسى كوپ. ال تۆورچەستۆو ادامدارىنىڭ وسىنداي ءوزىنىڭ ەرەكشەلىگى بار, ءوزىنىڭ قيىندىقتارى بار. شىعار دەگەنگە انانى, مىنانى قۇراستىرىپ شىعارىپ جۇرگەندەر از ەمەس. بىراق بۇل – جانكەشتى ەڭبەك. تۇيسىكتىڭ تۇكپىرىنەن تۇتەپ شىعاتىن, ويلاردىڭ شالقارىمەنەن دۇنيەنى كورىپ, سونىمەنەن حالىقتىڭ كوكىرەگىنە ساۋلە قۇياتىن, ويدان قۇرالاتىن ۇلكەن قۇبىلىس نارسە.
قىران قۇستىڭ ەكى قاناتى بار. ادامدا دا سولاي. ءىسى مەنەن كىسىلىگى تەڭدەي بولۋى كەرەك. سوندا ول ەل بولادى. سودان تۋعان پەرزەنت تالانتتى بولادى. سوندا ءبىزدىڭ مارتەبەمىز كوتەرىلىپ, توبەمىز كوككە ءتيىپ جۇرەدى.
ادەبيەتتى ورتا جاسامايدى. ادەبيەتتى جەكەلەگەن تۇلعالار جاسايدى. ال وسىنداي نارسەگە جەتۋ ءۇشىن شىعارماشىلىعى بار ادامعا ەڭ باستى كەرەك نارسە – عۇمىرىنىڭ ۇزاق بولعانى, ۇلگەرۋ كەرەك ايتۋعا, جازۋعا. ءبارىن ايتىپ كەتۋى كەرەك. مەن ءۇمىتتىڭ تۆورچەستۆوسىنا سونى تىلەيمىن. قۇتتى بولسىن مىنا مەرەيتوي. ەڭ باستى نارسە باسى امان, باۋىرى ساۋ بولسىن دەيمىن. ۇزاق عۇمىر تىلەيمىن. قولىنا ۇستاعان قاعازىنا, قالامىنا ادال بولسىن دەپ تىلەيمىن. مىنە, ۇمىتكە مەن وسىنى تىلەيمىن. ءبارىڭىز امان بولىڭىزدار!» دەگەن ءسوزىن اياقتاي كەلە:
– ءۇمىت, ساعان..! – دەپ قولىن كوتەرە جىميىپ, باۋىرىنا تارتىپ, مەنىڭ ماڭدايىمنان سۇيگەن.
جوعارىداعى «شىعارماشىلىعى بار ادامعا ەڭ باستى كەرەك نارسە, ول – عۇمىرىنىڭ ۇزاق بولعانى, ۇلگەرۋ كەرەك ايتۋعا, جازۋعا. ءبارىن ايتىپ كەتۋى كەرەك» دەگەن ءسوزدى تولقي تۇرىپ, تەبىرەنە جەتكىزگەنى كوز الدىمدا. ءبىر ءتاۋىرى, ول كىسىنىڭ وسى بەينەسى سونداعى تويىمنىڭ بەينەتاسپاسىنا ءتۇپ-تۇگەلىمەن ءتۇسىرىلىپتى. وزىنە عانا جاراساتىن اق كاستوم, ءوزىنىڭ عانا ستيلىنە اينالعان شاشى, باسىنا كيىلگەن اق ءشلاپى. ارام ەتى بولمايتىن ارعىماقتاي تارتىلعان بيىك بويى. ەرەكشە ەڭسەسى. قوڭىر ءۇنى. باياۋ بولسا دا سالماعى اتان تۇيەنىڭ جۇگىن ارتارداي جاعىمدى داۋىسى. ءبارى-ءبارى تەاتردىڭ ساحناسىن تولتىرىپ تۇرعانداي ەدى.
ەندى قازىر, و كىسىنىڭ ءوزى جوقتا, كوزى جوقتا «ەلدىڭ بارىنە جاقسىلىق تىلەگەن نەسىپبەك اعامنىڭ وزىنە شىعارماشىلىق ادامىنا كەرەك ەڭ باستى نارسە ءتۇز-تۇگەل, تولىعىمەن بۇيىردى ما ەكەن ءوزى؟» دەپ ويعا شوماتىن بولدىم. قۇدايدىڭ پەشەنەگە جازعانىنا شاك كەلتىرە الماسپىز. دەسەك تە, نەسىپبەك اعانىڭ جوعارىدا ءوزى ايتقانىنداي, عۇمىرى قانشالىقتى ۇزاق نەمەسە قىسقا بولدى؟.. ايتام دەگەنىنىڭ ءبارىن ايتىپ ۇلگەردى مە؟!. جازام دەگەنىنىڭ ءبارىن جازىپ ۇلگەردى مە؟!.
«اق كوگەرشىن», «الما اعاشىنىڭ بۇتاعى», ء«انىم سەن ەدىڭ» اتتى پوۆەستەردىڭ, «قۇدىرەت پەن قاسىرەت» رومانىنىڭ, «كوگىلدىر كويلەكتى كەلىنشەك», «ويىندى ەتى ون بولەك», «ان-ارىس» باسپاسىنان مەملەكەتتىك تاپسىرىسپەن شىققان ەكى تومدىق تاڭدامالىنىڭ, «اتى جوق اڭگىمە», «كىسى يەسى», 2019 جىلى تۇركيانىڭ انكارا قالاسىندا جارىق كورگەن «جول» اتتى كىتاپتاردىڭ عاجاپ اۆتورىنىڭ ارتىندا قولى جەتپەگەن قانداي ارمان-تىلەكتەرى قالدى ەكەن؟!. حالىقارالىق «الاش» ادەبي سىيلىعى, «قازاق ادەبيەتى» گازەتىنىڭ پروزا جانرى بويىنشا لاۋرەاتى, حالىقارالىق «دارابوز» ادەبي بايگەسىنىڭ جەڭىمپازى, ءبىرىنشى «رۋح» ادەبي بايقاۋىنىڭ گران-پري يەگەرى, عابدول سلانوۆ اتىنداعى ادەبي سىيلىعىنىڭ يەگەرى دەگەن بيىكتەردى باعىندىرۋعا قانشا-قاجىر قايراتى جۇمسالدى؟!. «قازاقستان رەسپۋبليكاسى تاۋەلسىزدىگىنىڭ 10 جىلدىعى», «قازاقستاننىڭ ەڭبەك سىڭىرگەن قايراتكەرى», «قۇرمەت» وردەنى سەكىلدى كوكىرەكتى كەرەر مەملەكەتتىك ناگرادالار كورنەكتى جازۋشىنى قانشالىقتى داڭققا نەمەسە باقىتقا بولەي الدى؟!.
اتاق پەن داڭقىڭىزدى قايدام, ءبىر انىعى, نەسىپبەك ءداۋتاي ۇلى كوزىنىڭ تىرىسىندە-اق ادەبيەت سۇيەر قاۋىمعا مويىندالىپ, قازاق ادەبيەتىنىڭ ءىرى وكىلى – كلاسسيك اتانىپ ۇلگەرگەن ساناۋلى قالامگەرلەرىمىزدىڭ بىرەگەيى. دەمەك نەسىپبەك اعامىزدىڭ الدىنا قويعان ماقساتى ورىندالدى ما, كوزدەگەن مۇراتىنا جەتە الدى ما دەپ قۇپيا جۇمباقتاپ, شەشۋىن جابا توقىعانداي تىعىلىسپاق ويناعانىمىز ابەس شىعار.
ويتكەنى ءوزىنىڭ كەيىپكەرلەرىنىڭ ءومىرىن بىرگە سۇرگەن, قالامىنىڭ ءار قادامىنا مۇڭنان تۇرەن تارتىپ, قاعازىنىڭ ءار پاراعىنا سىردان سۇرلەۋ سالاتىن, ءار كىتابىنىڭ تاعدىرىنا الاڭداعان, ءاربىر تۋىندىسىن دۇنيەگە اكەلگەن سايىن قينالعانىن ەستەن شىعارىپ, ازاپتى شىعارماشىلىقتىڭ ءلاززاتىن تاتقان جازۋشىنىڭ عۇمىرى وسىنداي بولسا كەرەك-ءتى. ماعىنالى دا ءماندى عۇمىر. عيبراتتى دا ءساندى عۇمىر. عاجايىپ عۇمىر.
نەسىپبەك ءداۋتاي ۇلى قايتىس بولعاندا اۋليەاتا اسپانى مۇڭعا ورانعان. اسىرەسە ونى جاس اقىندار مەن جازۋشىلار قاتتى ازالادى. جاسامىس تارتىپ قالعان مەنىڭ تۇستاستارىما دا وڭاي تيگەن جوق. جەر جاھان پاندەميالىق كەساپاتتىڭ كەزەكتى جازىن اۋپىرىممەن وتكىزىپ جاتقان. جامبىل جۇرتشىلىعى دا «شىقپا, جانىم, شىقپامەن» كۇنەلتۋدە ەدى. ونىڭ ۇستىنە, بايزاق اۋدانىندا توسىننان بەت قاراتپاس جارىلىس بوپ, بيلىك تە, بۇكىل ەل دە ەس جيا الماي جۇرەسىنەن بۇك تۇسكەن. گازەتتەر مەن الەۋجەلىلەر بەتتەرى ارقىلى اقىن, حالىقارالىق «الاش» سىيلىعىنىڭ يەگەرى عالىم جايلىبايدىڭ قارالى قازاقستانعا ايتقان كوڭىلى تۇكپىر-تۇكپىردەگى ءدۇيىم جۇرتقا جىرىمەن جەتكەن كۇن.
«ەلەس بولىپ كەتكەن بە, ەل سەنەرى
تولقىندارى تالاستىڭ تەڭسەلەدى.
...ادام ويى جاساعان قاتەلىكتەر -
قىرشىنداردىڭ قانىمەن ولشەنەدى.
جاۋعا شابار جۇرت ەدى نايزا اپ ءبارى,
زۇلمات كەلدى تاعى دا قاي جاقتاعى...
نەگە ءۇنسىزسىڭ, نەسىپبەك ءداۋتاي ۇلى,
باۋىرلاردان نە حابار, بايزاقتاعى؟
جارىلىسقا تاپ بولىپ جانىم, ايىم,
ءدۇر سىلكىندى دىردەكتەپ كارى قايىڭ...
ۇشبۇلاق پەن قايناردا - قارا قايعى -
سارىكەمەردىڭ ساعاسى - سارى ۋايىم.
تاۋ وزەنى تۇرادى تازا اعىستان,
بايتاق پا ەدىك باسىنان بازارى ۇشقان؟
...جالاپ جازار جاراسىن تاعى ەمەسپىز -
بەلىڭدى بۋ, قارالى قازاقستان!
ساڭلاعىمنىڭ سيرەسە ساناتى تىم,
ساعىنىشتان سارعايار سانا-قۇتىم.
...قاراتاۋدان جىلجىعان كەرۋەنىمنىڭ -
كەس-كەستەمە سوقپاعىن, قارا ءتۇتىن!
جارىلىستار جۇرەكتە, جان, دەنەمدە,
كوش الدىنان نايقالىپ نار كەلەر مە؟
... «سابىر ءتۇبى - سارى التىن» - دەگەن ءسوزدى -
قاي بەتىممەن ايتايىن - سارىكەمەرگە؟»
جانجۇرەگى قان جىلاعان عالىم جايلىبايدىڭ الاسۇرىپ نەسىپبەك ءداۋتاي ۇلى اعا-دوسىن ىزدەيتىنىندەي بار ەكەن. ارقانىڭ توسىنەن جولداعان جۇباتۋ جىرىمەن جامبىلدىق جازۋشىنى دا قوسا جوقتايتىنىن جاراتقان يە سەزدىرتكەندەي ەدى.
شىننىڭ ءجۇزى شەر-اعام «قوردايدىڭ قوڭىر قۇلجاسى» اتاندىرعان قارىمدى قالامگەردىڭ دەنەسى ءوزىنىڭ تۋعان جەرىنەن باقيعا اتتانعاندا, ءيىس سەزبەي قالعان مۇرىنمەن مازاسىزدانىپ, ءدام بىلمەي قالعان اۋىزبەن الىسىپ, مەديتسينالىق ماسكامەن تۇمشالانعان مەن سەكىلدى تالايلاردىڭ ۇشارعا قاناتى جوق بوپ قالعان. ول كىسىمەن وزىمدەگى ەستەلىكتەرىم مەن مۇراعاتتارىم ارقىلى سىرتتاي قوشتاستىم. كەيىنىرەك, ارينە, رۋحىنا باعىشتالعان دۇعاعا قاتىسىپ, جىلدىق اسىنا دا بارىپ, وقىلعان قۇرانعا قول جايۋعا مۇمكىندىك تۋدى. شۇكىر.
ن.ءداۋتاي ۇلىن ەسكە الۋعا جانە ونىڭ تۋعانىنا 75 جىل تولۋىنا وراي قوردايدا ۇيىمداستىرىلعان ءىس-شاراعا سول كەزدەگى قازاقستان جازۋشىلار وداعىنىڭ باسقارما توراعاسى ۇلىقبەك ەسداۋلەت باستاعان, مەرەكە قۇلكەنوۆ, جۇماباي شاشتاي ۇلى, جۇسىپبەك قورعاسبەك, قاسىمحان بەگمان, مارالتاي رايىمبەك ۇلى, بەيبىت سارىباي, اشىربەك كوپىش, مارجان ءابىش سىندى بەلگىلى قالامگەرلەر كەلدى. تالانتتى اقىن ەرلان ءجۇنىس جۇرگىزگەن دوڭگەلەك ۇستەلدە مارقۇمعا ارنالعان ەستەلىك كىتاپتىڭ تۇساۋى كەسىلدى. ەل پرەزيدەنتى ق.توقاەۆتىڭ ازا سوزىنەن كەيىن سول كەزدەگى حالىقارالىق تۇركى اكادەمياسىنىڭ پرەزيدەنتى, ءارى «ەگەمەن قازاقستان» جشس باس ديرەكتورى دارحان قىدىرالىنىڭ العى سوزىمەن باستالاتىن كولەمدى كىتاپقا ن.ءداۋتاي ۇلىنىڭ قالامگەر زامانداستارىنىڭ, ءىزباسار ىنىلەرىنىڭ ەستەلىكتەرى مەن ەسسەلەرى, جازۋشىنىڭ ءار جىلداردا ءباسپاسوز وكىلدەرىنە بەرگەن سۇحباتتارى, بىرقاتار اقىننىڭ ارناۋ ولەڭدەرى جيناقتالىپتى.
«ويىمىز تۇرماق سانامىزعا كىرىپ شىقپاعان نەسىپبەك ءداۋتاي ۇلىنىڭ اجال عايىبى ابىرجۋلى حالدەن ارىلتپاي الاڭداۋلى كۇيگە ءتۇسىرىپ قويادى دەپ بولجاپپىز با» دەپ جۇماباي شاشتاي ۇلىنىڭ تولقي جازعانىنداي, كوزى تىرىسىندە قويان-قولتىق ارالاسىپ, ەمەن-جارقىن سىيلاسقان, اينىماس ارىپتەستەرى راحىمجان وتارباەۆتىڭ, ەسەنعالي راۋشانوۆتىڭ مەزگىلسىز دۇنيە سالعاندىعى دا قاتتى قامىقتىرتىپ جىبەردى مە ەكەن نەساعانى دەيسىڭ. جۇرەككە تۇسكەن سالماق ءوز سىزىعى مەن سىزىن قالدىرماي قويمايدى عوي.
ومىردە ءىز قالدىرۋ دەگەندى اۋناعان جەردە تۇگى قالار جىلقىداي وتىرعان, تۇرعان, جۇرگەن جەرىنە ىبىرسىق, قوقىس قالدىرۋمەن شاتاستىراتىندار كوپتەپ كەزدەسەتىن قازىرگى زىمىران زاماندا, جاسى كەلگەن سايىن ۋاقىتتىڭ قادىرىن ءبىلىپ, وتكەنىن دە, وسى شاعىن دا, كەلەشەگىن دە ۋداي قىمبات تۇتاتىن قالامگەردىڭ امىسە ورنى بولەك. سوندىقتان ول قايدا وتىرسا دا – تويدا وتىرسا دا, ويدا جۇرسە دە, قىردا جۇرسە دە ءتۇپسىز تەرەڭ وي قۇشاعىنىڭ تۇساۋلى تۇتقىنى. وسىلاي وقشاۋلانىپ, جالعىزدىقتى جالعىز جان دوسىم دەپ بىلسە دە نەساعا وزىنەن بۇرىن الدىمەن جان-جاعىنداعىلاردىڭ باقىتتى بولۋىن تىلەگەن ادام. جان-جاعىنداعىلار باقىتتىڭ ءدامىن سەزىنبەسە ءوزىنىڭ قارا باسىنداعى قۋانىشىنىڭ ەشقاشان قۇنى, ەش باعاسى بولمايتىنىن بىلگەن قالامگەر. ونىسى ول كىسىنىڭ جازىپ كەتكەن ءاربىر شىعارماسىنان دا بايقالادى. ومىردە جاساپ كەتكەن ءاربىر جاقسىلىعى دا جادىمىزدان ەشقاشان شىقپاق ەمەس. شاپاعاتى ماعان دا تيگەن جايساڭ اعانىڭ باقيلىق رۋحى سەگىز بەيىش تورىندە شالقىسىن دەپ تىلەيمىن.
كەزىندە, «ادەبي جيىن نە ءۇشiن كەرەك؟ ول نە ىستەپ, نە بiتiرەدi? ول بويىندا شىن مانiندە تالانت ۇشقىنى بارلارعا ءجون سiلتەيدi, دەمەپ, جەبەپ جiبەرەدi. جالعىز سول ما ەكەن. ە, جوق. ونىڭ بiر كوزi كەزiندە جارق ەتiپ كورiنiپ, كەيiن «جوعالىپ» كەتكەندەردi iزدەيدi. Iزدەگەندە, قاراسوزدiڭ قاينارى, ولەڭ ءسوزدiڭ وتى كورiنگەن جەرگە قاراي ولاردىڭ وزدەرi قانات قاعادى. ءۇمىت بيتەنوۆا ءسويتتi.
مەن بۇل ەسiمدi ەمiس-ەمiس ەستيتiن ەدiم. اقپان ايىندا (2003 ج.) وتكەن جيىندا ءوزىن دە كوردiم, ولەڭiمەن دە تانىستىم. ول اقىن ەكەن.
«قور بولدى جانىم اقىماقتارعا...
بوستىعىم ەمەس, بiراق, بۇل.
سورعالاپ تامىپ جاپىراقتارعا
مەن ءۇشiن جاڭبىر جىلاپ تۇر»... – دەپ جاي ولەڭشi ايتا المايدى, بۇل اقىن جۇرەكتiڭ كەستەسi.
ءۇمىت ەندi وسى كەستەسiن جوعالتىپ الماسىن. بiز ودان جاقسى جىرلار كۇتە بەرەمiز. قانات ۇشسا عانا قاتايا بەرەدi», - دەپ جامبىل وبلىسىنىڭ اعا گازەتى «اق جول» ارقىلى باتاسىن بەرىپ, ولەڭدەرىمدى جاريالاتقىزعان اسىل اعانىڭ اكەدەي قامقورلىعى ءالى كۇنگە دەيىن جۇرەگىمنىڭ ءتورىن جىلىتىپ تۇر (نەسىپبەك ءداۋتاي ۇلى, جازۋشى, قازاقستان جازۋشىلار وداعى جامبىل وبلىستىق فيليالىنىڭ ديرەكتورى. «اق جول», 29.03.2003 ج.).
ال قولتاڭباسىن قالدىرعان كىتاپتارى بولمەمدەگى جەكە كىتاپحانامنىڭ سورەسىنىڭ ءسانى.
تەك,.. ەندى, ماڭگىلىك ءومىرى باستالعان جازۋشى اعانىڭ بۇ دۇنيەلىك ەمەس ەكەنى جانىڭدى جۇدەتەدى. كوڭىلىڭە كوڭىلسىزدىكتىڭ كولەڭكەسىن تۇنەتەدى.
ارتىندا قالعان ولمەس مۇرالارى, كوركەم تۋىندىلارى عانا داتكە قۋات.
ءۇمىت بيتەنوۆا,
اقىن, قازاقستان جازۋشىلار وداعىنىڭ مۇشەسى
