«بۇعان دەيىن الماتى, شىمكەنت قالالارى مەن قىزىلوردا, اقتوبە, الماتى جانە جەتىسۋ وبلىستارىندا قىلمىستىق سحەمالار اشىلعان بولاتىن. تۇركىستان وبلىسى بويىنشا سىبايلاس جەمقورلىققا قارسى قىزمەت شاردارا جانە سارىاعاش اۋداندارىنىڭ ءبىلىم بولىمدەرىنىڭ بۋحگالتەرلەرىنە قاتىستى سوتقا دەيىنگى تەرگەۋ جۇرگىزۋدە. ولار بيۋدجەت قاراجاتىن اسا ءىرى كولەمدە جۇيەلى نەگىزدە جىمقىردى دەپ كۇدىكتەلەدى», دەپ حابارلادى انتيكور.
تەرگەۋ مالىمەتتەرى بويىنشا, كۇدىكتى تۇلعالار 2020-2023 جىلدار ارالىعىندا ءبىلىم بەرۋ سالاسىندا جۇمىس ىستەمەيتىن تۇلعالاردىڭ شوتتارىنا اقشا قاراجاتىن اۋدارۋ, سونداي-اق مەكتەپ قىزمەتكەرلەرىنە جوعارى جالاقى ەسەپتەۋ ارقىلى شامامەن 2,6 ملرد تەڭگە سوما جىمقىرعان.
قازىرگى ۋاقىتتا تۇركىستان وبلىسىنىڭ ءبىلىم بەرۋ سالاسىنان 17 ادام قىلمىستىق جاۋاپكەرشىلىككە تارتىلۋدا, ولاردىڭ 4-ءى قاماۋعا الىندى.
زالالدى وتەۋ ماقساتىندا 39 جىلجىمايتىن م ۇلىك, 44 اۆتوماشينا, زەرگەرلىك بۇيىمدار جانە قىلمىستىق ىستەر بويىنشا ايىپتالۋشىلاردىڭ اقشالاي قاراجاتتارى بۇعاتتالدى. سونىمەن قاتار تەرگەۋ بارىسىندا تۇركىستان وبلىسىنىڭ تەكسەرۋ كوميسسياسىنىڭ مەملەكەتتىك اۋديتورى اشكەرەلەندى, ول سارىاعاش اۋدانىنداعى مەكتەپتەردىڭ بىرىندە اۋديت بارىسىندا انىقتالعان جىمقىرۋ فاكتىلەرىن پايداكۇنەمدىك نيەتپەن جاسىرعان.
سونداي-اق جەتىسۋ وبلىسىندا ۇيىمداسقان قىلمىستىق توپتىڭ قۇرامىندا 2,5 جىل ىشىندە 4,4 ملرد تەڭگە جىمقىرعان قالالىق ءبىلىم ءبولىمىنىڭ قىزمەتكەرلەرىنە قاتىستى سوتقا دەيىنگى تەرگەۋ اياقتالدى. قىلمىستىق توپقا باسشى مەن ونىڭ قاراماعىنداعىلار, سونداي-اق ورتا مەكتەپ بۋحگالتەرى كىردى. بارلىعى 13 ادام.
قىلمىستىق-پروتسەستىك كودەكستىڭ 201-بابىنا سايكەس وزگە اقپارات جاريا ەتۋگە جاتپايدى. كونستيتۋتسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق-پروتسەستىك كودەكسىنىڭ 19-بابى 1-بولىگىنە سايكەس, قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءاربىر ادام كىناسىز دەپ ەسەپتەلەدى.
