بايان قۇرمانقىزى – ون ساۋساعىنان ونەر تامعان شەبەر. ول تەك مۇسىندەۋ عانا ەمەس, توقىما, تىگىنشىلىك, كيىز باسۋ, ساندىك قولدانبالى ونەر تۇرلەرىنە دەن قويعان. ەكىباستۇزداعى اباي مەن مۇحتاردىڭ, ەستاي مەن سۇلتانماحمۇت اقىنداردىڭ, باياناۋىلدا جۇسىپبەكتىڭ, ەرەيمەنتاۋدا ۇمبەتەي جىراۋدىڭ مۇسىندەرىن جاساعان. بەساسپاپ جاننىڭ العاشقى تۋىندىسى – اكەسىنىڭ شاعىن ءمۇسىنى.
– تۋىندىلارىمنىڭ ىشىندە ەڭ ۇنايتىنى – انامنىڭ ءمۇسىنى. انام مەن ۇلىمنىڭ ءمۇسىنىن بىرگە جاساپ ەدىم, استاناداعى كورمەگە قاتىسقاندا كەلۋشىلەردىڭ ءبىرى اتتاي قالاپ الىپ كەتتى. ال بۇگىنگى كورمەگە ايگىلى جەرلەستەرىمىز ءماشھۇر ءجۇسىپتىڭ, قانىش ساتباەۆ پەن ەستايدىڭ مۇسىندەرىن, ءتۇرلى جانرداعى كەسكىندەر مەن ساندىك قولدانبالى ونەر تۋىندىلارىن, جۇننەن, كيىزدەن باسىلعان كومپوزيتسيالاردى اكەلىپ وتىرمىن. بيۋست-ەسكەرتكىشتەردى نەگىزىنەن گيپستەن, كۇيدىرىلگەن سازدان جاسايمىن. بايقاعاندارىڭىزداي, كوبىنە قازاق قاريالارىنىڭ, ۇلتتىق داستۇرىمىزگە, بولمىسىمىزعا ساي كەسكىن-كەلبەتتەردى سومداۋعا تىرىسامىن, – دەيدى شەبەر.
ءبىر قىزىعى, بايان قۇرمانقىزىنىڭ ونەر سالاسى بويىنشا ارنايى ماماندىعى جوق. كەزىندە تەك تىگىنشىلىك كاسىپتى مەڭگەرىپتى. كەيىن پەداگوگيكالىق ۋچيليششە مەن جەرگىلىكتى ۋنيۆەرسيتەتتە ءبىلىم العان. بۇگىندە كەنشىلەر قالاسىنداعى №22 گيمنازيا مەكتەبىندە كوركەم ەڭبەكتەن شاكىرت تاربيەلەپ جۇرگەنىن جەتكىزدى.
قازاقستان سۋرەتشىلەر وداعى وڭىرلىك فيليالىنىڭ توراعاسى وسەرباي شۇرانوۆ اتاپ وتكەندەي, بايان قۇرمانقىزىنىڭ تۋىندىلارى شىنايى ءومىردى بەينەلەيدى. ادامنىڭ بەت-ءپىشىنىن, مىنەزىن جوعارى دەڭگەيدە بەرۋ, سىرتقى حاريزماسىن ساقتاپ قالۋ – ەكىنىڭ ءبىرىنىڭ قولىنان كەلە بەرمەيتىن شەبەرلىك. جۇزدەن اسا تۋىندىنىڭ اۆتورى سوڭعى ۋاقىتتا كيىز باسۋ, جۇننەن بۇيىمدار جاساۋعا ابدەن ماشىقتانىپ العانىن بايقاتىپ وتىر. ال تۇتاستاي العاندا, شەبەردىڭ تۋىندىلارىنان ادال ماحابباتتىڭ, سىيلاستىق پەن سۇيىسپەنشىلىكتىڭ لەبى ەسەدى.
پاۆلودار
