اتالعان دوداعا الماتى وبلىسىنىڭ 7 اۋدانىنان 100-گە جۋىق سپورتشى جاستار قاتىسىپ, ۇلتتىق ات سپورتىنىڭ اۋدارىسپاق, جامبى اتۋ, كوكپار تارتۋ, تەڭگە ءىلۋ تۇرلەرى بويىنشا ءوزارا سىنعا ءتۇستى. بۇل ءدۇبىرلى جارىستى تاقىمداعى جۇيرىك تە تۇيسىنگەندەي, اۋىزدىقپەن الىسا, بۋى بۇرقىراپ, ءسات سايىن ادىمى اشىلا بەردى.
ۇلتتىق ات سپورتىن تاماشالاۋعا كەلگەن جانكۇيەرلەردىڭ دە دەلەبەسى قوزىپ, قيقۋعا قيقۋ قوستى. كومبەنى اينالعان كوكپارشىلاردىڭ ەپتى قيمىلى ولاردىڭ جاس تا بولسا شيرىققان شىمىر ەكەندىكتەرىن اڭعارتتى. قازاندىققا سالىم سالۋعا ۇمتىلعان كوماندالار اراسىندا تالعار اۋدانىنىڭ جۇرەكتى دە بىلەكتى كوكپارشىلارىنىڭ شەبەرلىكتەرىندە شەك بولمادى. تارتىستى ويىن ناتيجەسىندە ولار ەشكىمگە دەس بەرمەستەن, 1-ورىن الدى.
ال جارىسقا ەكى-ءۇش قىر اسىپ كەلگەن كەگەن مەن رايىمبەك اۋدانىنىڭ كوكپارشىلار كومانداسى دا مىقتىلىقتارىن دالەلدەي كەلە, جۇلدەلى 2 جانە 3-ورىنداردى قانجىعالارىنا بايلادى.
وبلىستىق چەمپيوناتتا اۋدارىسپاق ويىنى دا ءوز دارەجەسىندە ءوتتى. بۇل باسەكەدە 9 سالماق دارەجەسىندە جەڭىمپازدار انىقتالدى. ولاردىڭ كوشباسىندا رايىمبەك اۋدانىنىڭ ءاپايتوس بالۋاندارى تەڭدەسسىز ونەر كورسەتىپ, كورەرمەندەر قوشەمەتىن يەلەندى. تاۋلى ءوڭىردىڭ نامىسىن قورعاعان تالاۋ دوسجان, توقتارعازى قۇرمەت, الماس توكەن ۇلى, ابىلجان ادىلەت, ەلجاس شەرحان, نۇرعايىپ ەرالى, ءابىتاي سۇڭعات ەسىمدى بالۋاندارعا ەشكىم تەڭ كەلمەدى. سونىڭ ارقاسىندا ولار ات تەڭسەلگەن اۋدارىسپاق ويىنىنىڭ باس جۇلدەسىن ەش قيىندىقسىز جەڭىپ الدى.
ات قۇلاعىندا ويناعان سپورتشىلاردىڭ نىسانا كوزدەۋدەگى دالدىگى مەن ەپتىلىگى جامبى اتۋدىڭ حاس شەبەرى ەكەندىكتەرىن كورسەتتى. جارىستىڭ بۇل تۇرىندە ەڭبەكشىقازاق اۋدانىنىڭ سپورتشىسى ەربولات نار ۇلى قارسىلاستارىنان قارا ءۇزىپ, جەڭىمپاز اتاندى. 2-ورىنعا قاراساي اۋدانىنىڭ نامىسىن قورعاۋشى نۇرسۇلتان بىرلىكباەۆ تابان تىرەسە, 3-ورىندى ەڭبەكشىقازاق اۋدانىنىڭ سپورتشىسى ماديار ءشارىپباي يەلەندى.
تەڭگە ىلۋدە دە سپورتشى جاستار ەپتىلىكتىڭ ۇلگىسىن كورسەتتى. قۇستاي ۇشقان جۇيرىكتىڭ باۋىرىنا ىلىنە, تەڭگە تۇيىلگەن ورامالدى ءىلىپ اكەتۋدەگى شەبەرلىكتەرى كوپشىلىكتى ءتانتى ەتتى. ات سپورتىنىڭ بۇل ءتۇرى بويىنشا دا ەڭبەكشىقازاق اۋدانىنىڭ كومانداسى وق بويى وزىق شىقتى.
وبلىستىق چەمپيوناتتا جالپىكوماندالىق ەسەپ بويىنشا رايىمبەك اۋدانى 1-ورىنعا, ەڭبەكشىقازاق اۋدانىنىڭ سپورتشىلارى 2-ورىنعا تۇراقتاسا, كەگەن اۋدانىنىڭ كومانداسى 3-ورىندى يەلەندى. «اتادان بالاعا ميراس بولعان ۇلتتىق ات سپورتى – جەلكىلدەي وسكەن جاستاردى توزىمدىلىك پەن ەپتىلىككە, شىمىر بولۋعا, ەڭ باستىسى, وتانشىلدىققا تاربيەلەيدى. بۇگىنگى چەمپيوناتتى ۇيىمداستىرۋداعى ماقسات – الداعى رەسپۋبليكالىق, حالىقارالىق جارىستارعا قاتىساتىن ۇلتتىق قۇرامانىڭ قۇرامىن ايقىنداپ, شىن مىقتىلاردى ىرىكتەۋ», دەيدى الماتى وبلىستىق جاستار قۇراماسىنىڭ باس باپكەرى دەربىس بايدىلداەۆ.
الماتى وبلىسى
