تاريحي شەشىم دۇنيەجۇزىلىك ساباقتى زەرتتەۋ قاۋىمداستىعىنىڭ ءداستۇرلى فورۋمى وتكەن نيدەرلاندىنىڭ زۆوللە قالاسىندا قابىلداندى. العاش رەت WALS-تىڭ نەگىزگى كونفەرەنتسياسى پوستكەڭەستىك كەڭىستىكتە وتەدى. استانادا العاش رەت World Association of Lesson Studies شتاب-پاتەرى ءۇش كۇن بويى جۇمىس ىستەيدى. كەلەسى جىلعى قىركۇيەكتە قازاقستانعا زاماناۋي ءبىلىم بەرۋدىڭ ستراتەگيالىق باسىمدىقتارىنىڭ ءبىرى – ساباقتى زەرتتەۋگە ماماندانعان ەڭ تابىستى مۇعالىمدەر كەلەدى دەپ جوسپارلانىپ وتىر. قازىردىڭ وزىندە WALS-2024 قاتىسۋشىلارىنىڭ قاتارىندا ۇلىبريتانيا, سينگاپۋر, جاپونيا, فينليانديا, مالايزيا, اۆستريا, قىتاي, امەريكا قۇراما شتاتتارى, گونكونگ, تۇركيا – بارلىعى 50-دەن استام ەل بار.
كەلىسىمشارتقا قول قويۋ كەزىندە كەترين ليۋيس پەداگوگيكالىق شەبەرلىك ورتالىعىنىڭ Lesson Study-ءدى ەلدىك جوبا رەتىندە ىلگەرىلەتۋدەگى جەتىستىكتەرىن ەرەكشە اتاپ ءوتتى.
– قازاقستانداعى «ساباقتى زەرتتەۋ» شىن مانىندە جوعارى دەڭگەيدە ءوتتى. ءبىز پەداگوگيكالىق شەبەرلىك ورتالىعىنداعى ارىپتەستەرىمىزدىڭ ون جىل ىشىندە ەلدەگى جانە الەمدەگى ناعىز WALS ەلشىلەرىنە اينالعانىن ماقتان تۇتامىز. بۇگىندە ولار ءوز وتانىندا مىڭداعان مۇعالىمدى, سونىمەن قاتار ازەربايجان, قىرعىزستان, رەسەي فەدەراتسياسى, وزبەكستاننىڭ بىرنەشە ايماعىنىڭ پەداگوگتەرىن ساباقتى زەرتتەۋ بويىنشا وقىتىپ جاتىر. ولار قازاق, اعىلشىن جانە ورىس تىلدەرىندە جۇمىس ىستەيدى, − دەدى ول.
كەمبريدج ۋنيۆەرسيتەتى ءبىلىم بەرۋ فاكۋلتەتىنىڭ پروفەسسورى پيتەر دادلي «Lesson Study» قازاقستان مودەلىنىڭ كاسكادتى سيپاتى مەن اۋقىمدىلىعىن ەرەكشە اتاپ ءوتتى.
نيدەرلاندىداعى كونفەرەنتسيادا ەڭ كوپ ابستراكتىلەردى قازاقستان جانە جاپون دەلەگاتسيالارى ۇسىندى. بۇل رەتتە كۇنشىعىس ەلىندە «Lesson Study» تۇتاس فيلوسوفيا سانالاتىنىن اتاپ وتكەن ءجون.
زۆوللەگە پشو دەلەگاتسياسى اۋقىمدى باعدارلاما دايىندادى. اتاپ ايتساق, تاقىرىپتىق سيمپوزيۋمدار, اۆتورلىق شەبەرلىك سىنىپتارى, وقۋ سەسسيالارى, ەلارالىق زەرتتەۋلەر بويىنشا باياندامالار, Single talk, اتقارۋ كوميتەتى جانە قاۋىمداستىقتىڭ ساراپتامالىق كەڭەسىمەن كەلىسسوزدەر, گوللانديا مەكتەپتەرىندەگى كەزدەسۋلەر جانە باسقا دا كەيستەر.
وتاندىق ءبىلىم بەرۋگە Lesson Study ەنگىزۋدىڭ وزىق تاجىريبەلەرىن ەلۆيرا راحمايل, قىزجىبەك ابدرامانوۆا, يۋليا مەلنيكوۆا, جانيا وپانوۆا, رينات رامازانوۆ جانە ايبەك كەنجەباەۆ, ۇلجان تەمىرعاليەۆا, ەربولات وسپانوۆ ۇسىندى.
سيمپوزيۋمنىڭ ديسكۋسانتتارى بولعان انگليادان دجيللي لانگ پەن سينگاپۋرلىق كريستين لي ەلارالىق زەرتتەۋلەردىڭ ماڭىزدىلىعىن اتاپ ءوتتى.
– بۇنداي زەرتتەۋ جوبالارى ەلدەر اراسىنداعى شەكارانى كەڭەيتەدى جانە بۇكىل الەم مۇعالىمدەرىنىڭ كاسىبي مۇددەسى سايكەس كەلەتىنىن دالەلدەيدى, − دەدى ولار.
اۆستريالىق ارىپتەستەرمەن بىرلەسىپ جۇمىس ىستەگەن ەلۆيرا راحمايل توپتىق شىعارماشىلىق جۇمىس زەرتتەۋشىلىك داعدىلاردى دامىتۋعا جاڭا سەرپىن بەرگەنىن ايتادى. Lesson Study ءاربىر مۇعالىم ءۇشىن تابىستى قۇرال رەتىندەگى ماڭىزدىلىعىن تاعى ءبىر رەت راستادى.
دۇنيەجۇزىلىك Lesson Studies قاۋىمداستىعى – وتاندىق ءبىلىم بەرۋدە تابىستى برەندكە اينالعان پەداگوگيكالىق شەبەرلىك ورتالىعىنىڭ الەمدىك جەتىستىكتەرىنىڭ زاڭدى جالعاسى. پشو قۇرعان پەداگوگتەردىڭ بىلىكتىلىگىن ارتتىرۋدىڭ كەڭ اۋقىمدى جۇيەسى گەرمانياداعى ACQUIN اككرەديتاتسيالاۋ, سەرتيفيكاتتاۋ جانە ساپانى قامتاماسىز ەتۋ ينستيتۋتىنىڭ شارتسىز سەرتيفيكاتىن الدى. قازىرگى ۋاقىتتا ينستيتۋتسيونالدىق اككرەديتتەۋ اياقتالىپ قالدى. ورتالىق الەمنىڭ 200-دەن استام ءبىلىم بەرۋ ۇيىمى ۇمىتكەر بولعان بەدەلدى UNESCO-Hamdan-2020 سىيلىعىمەن ماراپاتتالدى. جەتەكشى مەكتەپتەرگە ارنالعان تانىمال پشو جوباسى GESS Education Awards-2023 بايقاۋىنىڭ ۇزدىك وندىعىنا ەندى.
پەداگوگيكالىق شەبەرلىك ورتالىعى 2012 جىلدان بەرى وتاندىق ءبىلىم بەرۋ سالاسىنا «ساباقتى زەرتتەۋ» الەمدىك ترەندىن ەنگىزىپ كەلەدى. 2023 جىلدىڭ ساۋىرىندە استانادا «Lesson Study: رەفلەكسيۆتى تاجىريبەدەن تۇراقتى كوشباسشىلىققا» ءبىرىنشى ۇلتتىق كونفەرەنتسياسى ءوتتى.
ميرا اليپينوۆا
