باستاۋىن 2003 جىلى سول كەزدەردەگى ىشكى اسكەرلەردىڭ اسكەري بولىمدەرىنەن العان «جاس بۇركىت» اسكەري-پاتريوتتىق قوزعالىسى 20 جىلدىق بەلەستى ارتتا قالدىردى. وسىعان بايلانىستى ۇلتتىق ۇلان باس قولباسشىلىعى مەرەيلى كەزەڭدە اتقارىلعان جۇمىستارعا توقتالىپ, ەڭبەگى مەن ەرلىگىن ايرىقشا اتاپ ءوتتى. ۇلتتىق ۇلان باس قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى, گەنەرال-مايور قايرات ۇمبەتوۆ «جاس بۇركىت» قوزعالىسى شەڭبەرىندە اسكەرگە دەيىنگى جاستارمەن كەزدەسۋ, اشىق ەسىك كۇندەرىن وتكىزۋ, وزگە دە ءىس-شارالار ۇيىمداستىرىلىپ كەلە جاتقانىن باسا ايتتى.
– 2003-2023 جىلدار ارالىعىندا مەكتەپ بىتىرگەن «جاس بۇركىت» مۇشەلەرى اراسىندا ءومىرىن اسكەري سالامەن بايلانىستىرعاندارى دا كوپ. بۇگىندە ۇلتتىق ۇلاندا جانە باسقا كۇشتىك قۇرىلىمداردا «جاس بۇركىتتەن» شىققان 100-دەن اسا ورەن ابىرويمەن قىزمەت اتقارىپ كەلەدى, – دەدى گەنەرال-مايور ق.ۇمبەتوۆ.
مىنبەرگە كوتەرىلگەن ۇلتتىق ۇلاننىڭ باس قولباسشىسى, گەنەرال-لەيتەنانت ەركىن بوتاقانوۆ «جاس بۇركىت» اسكەري-پاتريوتتىق قوزعالىسىنىڭ 20 جىلدىعىمەن قۇتتىقتادى.
– جيىرما جىلدىڭ ىشىندە «جاس بۇركىت» اسكەري-پاتريوتتىق سىنىپتارى ەلىمىزدىڭ بۇكىل وڭىرلەرىندە اشىلىپ, وسى باعىتتاعى جۇمىستىڭ ناتيجەلى جۇرگىزىلىپ جاتقانىن ماقتانىشپەن ايتا الامىز, – دەدى گەنەرال-لەيتەنانت ە.بوتاقانوۆ.
«جاس بۇركىت» اسكەري-پاتريوتتىق قوزعالىسىنىڭ ەڭ كىشكەنتاي مۇشەسى, جەتى جاسار ومار قويشىبەك قوزعالىسقا كورسەتىپ جۇرگەن قامقورلىعى ءۇشىن ۇلتتىق ۇلاننىڭ باس قولباسشىسىنا كلۋبتىڭ اتريبۋتىن تابىستادى. بالالاردىڭ قولىنان ارنايى اتريبۋت العان ءماجىلىس دەپۋتاتى ماكسيم روجين دە ءسوز سويلەدى.
– گەنەرال-لەيتەنانت ەركىن بوتاقانوۆ قىزمەتشى ارمان احاشوۆتى تەگىننەن-تەگىن اتاپ وتكەن جوق. «جاس بۇركىتتىڭ» العاش قۇرىلعان كەزىندەگى ول كىسىنىڭ ەڭبەكتەرىمەن تانىسپىز. جەمىستى جۇمىستاردىڭ ناتيجەسى دە كوڭىل قۋانتادى. مىنە, بۇگىن مەن دە جاسىم قىرىققا كەلگەنىنە قاراماستان «جاس بۇركىت» قاتارىن تولىقتىرىپ وتىرمىن. مەن ءۇشىن بۇل – ۇلكەن قۇرمەت. ەلىمىزدە اسكەري داستۇرلەردىڭ قالىپتاسىپ كەلە جاتقانى بايقالادى. اسىرەسە بۇگىنگىدەي كەزەڭدە مۇنىڭ ماڭىزى زور. قازاق حالقى ءۇشىن ساربازداردىڭ ساقاداي ساي بولۋى, ولاردىڭ نامىستى ءارى جىگەرلى بولۋى دا ماڭىزعا يە, – دەگەن دەپۋتات بابالار ومىرىنەن دە مىسالدار كەلتىردى.
– ەلىمىزدە مەكتەپتەن تىس 1745 ۇيىرمە جۇمىس ىستەيدى. ول جەرلەردە ميلليونداعان بالعىن تاربيەلەنىپ جاتىر. ولاردىڭ باعىت-باعدارى دا ءارتۇرلى. عىلىم مەن تەحنولوگيا, بەينەلەۋ ونەرى, مۋزىكا جانە اسكەري-پاتريوتتىق تاربيە سەكىلدى باعىتتار بويىنشا وقىپ-ۇيرەنىپ ءجۇر. سونىڭ ىشىندە اسكەري-پاتريوتتىق تاربيە مەملەكەتتىك دەڭگەيدە باسىمدىققا يە. ءبىز ءدال وسى باعىتتا جاس پاتريوتتاردى تاربيەلەپ, قالىپتاستىرىپ كەلەمىز. سوندىقتان قوعام ءۇشىن «جاس بۇركىت» سىنىپتارى مەن كلۋبتارىنىڭ پايداسى وراسان, – دەدى وقۋ-اعارتۋ مينيسترلىگىنىڭ وكىلى رايسا شەر.
5573 جانە 6636 اسكەري بولىمدەرىنىڭ «جاس بۇركىت» اسكەري-پاتريوتتىق قوزعالىسىنىڭ تاربيەلەنۋشىلەرى ءوز ونەرلەرىن كورسەتىپ, ءىس-شارانىڭ ءارىن كىرگىزدى.
«مەن كلۋبتا ناعىز جىگىتتەرگە ءتان قاسيەتتەردى بويىما ءسىڭىرىپ ءجۇرمىن. مۇنداعى جەتەكشىلەرىمىز بىزگە جاۋىنگەرلەردىڭ ءىس-قيمىلىن, قارۋ-جاراقتارىن كورسەتەدى. وسىندا كەلگەلى كوپ دۇنيەنى ۇيرەندىم. سول ۇيرەنگەندەرىمىزدى ساحنادا كورەرمەندەرگە كورسەتتىك. بولاشاقتا مەن دە اسكەري سالادا قىزمەت ەتكىم كەلەدى. مەن ەلىمدى قورعاۋعا ءازىرمىن», دەدى «جاس بۇركىتشى» ءا.نۇعىماش.
قازىرگى ۋاقىتتا ۇلتتىق ۇلاننىڭ اسكەري بولىمدەرىنىڭ قولداۋىمەن 59 مەكتەپ پەن 3 كوللەدجدە جالپى سانى 108 «جاس بۇركىت» اسكەري-پاتريوتتىق سىنىبى اشىلعان. سونداي-اق اسكەري بولىمدەر اۋماعىندا 33 سپورتتىق اسكەري-پاتريوتتىق كلۋبى جۇمىس ىستەيدى. مۇنداعى تاربيەلەنۋشىلەردىڭ جالپى سانى 2500-گە جۋىق. ولار ءۇشىن ارنايى ساباق كەستەلەرى تۇزىلگەن. وقۋشىلار ساباقتاردىڭ ناتيجەسىندە اسكەري سالاعا بەيىمدەلىپ, ومىرگە قاجەت دۇنيەلەردى مەڭگەرەدى.
جانبولات كەنجەعۇل
