الدىمەن قوعامدىق ءدارىستىڭ نەگىزگى ماقساتى تۋرالى ايتا كەتەلىك. جالىندى جاستاردى بيزنەسپەن اينالىسۋعا جۇمىلدىرىپ, بۇل تاراپتاعى مۇمكىندىكتەر تۋرالى اقپارات بەرۋ, ىنتالارىن ارتتىرۋ ايرىقشا ماڭىزعا يە.
وبلىستىق جاستار-رەسۋرستىق ورتالىعىنىڭ باسشىسى داستان ەرمەكوۆ ءوز سوزىندە جاستارعا ارنالعان ءدارىس جۇمىسسىزدىقپەن كۇرەس جانە جاپپاي كاسىپكەرلىكتى دامىتۋعا دەم بەرەتىندىگىن اتاپ ءوتتى. ونىڭ ايتۋىنشا, الداعى مىندەتتەرگە قول جەتكىزۋ جانە ەل ەكونوميكاسىنىڭ تۇراقتى دامۋى ءۇشىن جاس كاسىپكەرلەردى قولداۋ وتە قاجەت.
سپيكەرلەر بيزنەسكە قالاي كەلگەنىن, كاسىپتەرىن قالاي باستاپ دامىتقانىن ەگجەي-تەگجەي ايتىپ بەردى. «كوز قورقاق, قول باتىر» دەمەكشى, اركىم ءوزىنىڭ قولىنان كەلەتىن كاسىپتى قولعا السا, وزىنە دە, ماڭايىنداعى جۇرتقا دا سەپتىگى تيمەك. جاستاردىڭ ماتەريالدىق يگىلىكپەن قاتار رۋحاني الەمدى نۇرلاندىرۋعا دا ايانباي اتسالىسۋى ابدەن قۇپتارلىق. ماسەلەن, وبلىس ورتالىعىندا ۇلتتىق ونەردى ناسيحاتتاۋعا اتسالىسىپ جۇرگەن ونەرپازدىڭ ءبىرى اسلان مۇحامەدياروۆ «اسىل ءان» ۇلتتىق ونەر مەكتەبىنىڭ نەگىزگى ماقساتى تۋرالى ايتىپ بەردى.
ءىس-شارا سوڭىندا جاستار سپيكەرلەرگە وزدەرىنىڭ قىزىقتىرعان سۇراقتارىن قويىپ, تولىقتاي جاۋاپ الدى. ءار سپيكەرگە ۇيىمداستىرۋشىلار تاراپىنان العىس حاتتار, ال ستۋدەنتتەرگە سەرتيفيكاتتار تابىستالدى.
كوكشەتاۋ
