«دوستار, جانكۇيەرلەر, ماعان «اقتوبە» فۋتبول كلۋبىن باسقاراتىنىما قاتىستى كوپتەگەن سۇراقتار ءتۇسىپ جاتىر. بىراق مەنىڭ باستى ماقساتىم مەن مىندەتىم – قازاقستان ۇلتتىق قۇراماسىن ناۋرىز ايىندا وتەتىن ويىندارعا دايىنداۋ. مەن قازىر وسىعان عانا كوڭىل ءبولىپ ءجۇرمىن. مەنىڭ ارمانىم – 2024 جىلعى فۋتبولدان ەۋروپا چەمپيوناتىنا جەتۋ جانە وعان قاتىسۋ. وسىعان وراي, قۇرمەتتى دوستار مەن جانكۇيەرلەر, مەن جاقىن ارادا ەشقانداي فۋتبول كلۋبىن باسقارۋدى جوسپارلاپ وتىرعان جوقپىن», دەپ جازدى اديەۆ الەۋمەتتىك جەلىدە.
ەستەرىڭىزگە سالا كەتەيىك, قازاقستان پلەي-وفف كەزەڭىندە وينايدى, وندا كوماندالار ۇلتتار ليگاسىنىڭ قورىتىندىسى بويىنشا ىرىكتەۋدەن وتەدى. جارتىلاي فينالدا ماگومەد اديەۆ شاكىرتتەرى گرەكيامەن كەزدەسىپ, جەڭىسكە جەتسە, گرۋزيا-ليۋكسەمبۋرگ جۇبىنىڭ جەڭىمپازىمەن وينايدى. ەگەر قۇراما سىرت الاڭدا ەكى ويىندا دا جەڭىسكە جەتسە, ەۋرو-2024 فينالىنا جولداما الادى.
