وتكەن اپتادا حالىقارالىق شالا تۋعان بالالار كۇنىندە الماتىداعى ەكى بىردەي ىرگەلى مەكەمە – پەريناتولوگيا جانە بالالار كارديوحيرۋرگياسى ورتالىعى مەن پەدياتريا جانە بالالار حيرۋرگياسى عىلىمي ورتالىعىندا قوس مەرەكە قاتار ءوتتى. عىلىمي ورتالىققا سىي-سياپاتىمەن كەلگەن «مەن سەنىمەن بىرگەمىن» قورىنىڭ وكىلدەرى سالتاناتتى ءىس-شارانىڭ ءسانىن كەلتىردى.
پەدياتريا ورتالىعىنداعى نەوناتولوگيا جانە جاڭا تۋعان نارەستەلەردىڭ حيرۋرگيا ءبولىمىنىڭ 64 جىلدىق تاجىريبەسى بار. مۇندا ەلىمىزدىڭ تۇكپىر-تۇكپىرىنەن كەلگەن, ءتۋابىتتى كەسەلدەرى مەن حيرۋرگيالىق پاتولوگياسى بار جاڭا تۋعان نارەستەلەرگە شۇعىل مەديتسينالىق كومەك كورسەتىلەدى. تورعايداي بولىپ تۋعان نارەستەلەرگە وڭەش اترەزياسى, ديافراگمالىق گرىجا, ىشەك وتىمسىزدىگى, انورەكتالدى كەمىستىك, گاستروشيزيس, ومفالوتسەلە, ساكروكوكتسيگەالدى ايماقتىڭ تەراتوماسى سىندى كوپتەگەن كۇردەلى رەكونسترۋكتيۆتىك پلاستيكالىق وپەراتسيالار جاسالادى.
«جىل سايىن بولىمدە ءارتۇرلى پاتولوگيامەن رەسپۋبليكانىڭ ءار وڭىرىنەن جەتكىزىلگەن 400-گە جۋىق نارەستە ەمدەلەدى. ولاردىڭ 80%-ى – 700 گرامنان باستاپ 2 500 گرامعا دەيىنگى ەكسترەمالدى تومەن سالماقتاعى 25-35 اپتالىق نارەستەلەر. ءبولىم 2022 جىلى ءتۇرلى پاتولوگيامەن دۇنيەگە كەلگەن 300-دەن اسا ءسابيدى اجال اۋزىنان امان الىپ قالسا, بيىل 350-گە جۋىق شاقالاقتى كۇتىپ-باپتادى. 20 توسەگى بار ءبولىم 2003 جىلدان باستاپ ءتۋابىتتى حيرۋرگيالىق پاتولوگياسى بار نارەستەلەردى قابىلداي باستاسا, 2012 جىلدان بەرى شالا تۋعان نارەستەلەردىڭ رەتينوپاتياسىنا كوز تورىنىڭ لازەرلىك كواگۋلياتسياسىن ءساتتى جاساپ كەلەدى. دەنە سالماعى 1 000 گرامم عانا بولاتىن شالا تۋعان نارەستەلەردىڭ ادام قاتارىنا قوسىلۋى ايتارلىقتاي ءوسىپ, ءولىم-ءجىتىمى 3-4 ەسەگە تومەندەدى. ءبىزدىڭ ورتالىقتا ءبىر جىل ىشىندە ەمدەلىپ شىققان سابيلەردىڭ 80%-عا جۋىعى – شالا تۋعان نارەستەلەر», دەيدى نەوناتولوگيا جانە جاڭا تۋعان نارەستەلەردىڭ حيرۋرگيا ءبولىمىنىڭ مەڭگەرۋشىسى ايجان بايعۇتتيەۆا.
ءار ءسابيدىڭ ءومىرى ءۇشىن بولىمدە 20-دان اسا مامان كۇرەسىپ, كىشكەنتاي پەرىشتەلەردىڭ ومىرىنە اراشا ءتۇسىپ جاتادى. مۇنداي جاعدايدا دارىگەرلەر اتا-انانىڭ پسيحولوگيالىق دايىندىعى دا ۇلكەن ءرول اتقاراتىنىن ايتادى.
ال پەريناتولوگيا جانە بالالار كارديوحيرۋرگياسى ورتالىعىندا Pampers برەندى قازاقستانداعى «قىزىل جارتى اي» قوعامىمەن بىرگە وتكىزگەن مەرەكە «ەڭ كىشىلەرگە – ۇلكەن قامقورلىق» باستاماسىن مارەگە جەتكىزدى.
«بۇگىن ءبىز دۇنيەگە كەلۋگە اسىققان كىشكەنتاي باتىرلارمەن بىرگەمىز. سوندىقتان وسى اتاۋلى كۇندى تۋا سالىپ ءومىرىن كۇرەسپەن باستاعان جانە وسى جولدى باتىلدىقپەن جەڭە بىلگەن بالدىرعاندار اتاپ ءوتىپ جاتىر. ەرەكشە مەرەكەگە سابيلەردىڭ اكە-شەشەلەرىمەن بىرگە, وسى قيىندىقتاردى قوسىلا ەڭسەرگەن پەريناتالدى ورتالىقتىڭ دارىگەرلەرى دە قوسىلدى. ءبىز مۇنداي باستامانى قازاقستاندا ءبىرىنشى رەت قولعا الىپ وتىرمىز. ومىرگە شىر ەتىپ كەلگەن ساتىنەن باستاپ قيىندىقتارعا تاپ بولعان جانە ونى جەڭە بىلگەن شارانالار سالتاناتتى جاعدايدا قانداي قۇرمەتكە بولسا دا لايىقتى. «ەڭ كىشىلەرگە – ۇلكەن قامقورلىق» كامپانياسىنىڭ اياسىندا Pampers برەندى قازاقستانداعى ەڭ ءىرى التى پەريناتالدى ورتالىعى مەن ەلىمىزدەگى بالالار اۋرۋحانالارىنداعى شالا تۋعان شارانالارعا تەگىن تۇردە 650 مىڭنان اسا ارنايى جورگەك تاراتا وتىرىپ, سابيلەردى وڭالتۋدى قارجىلاندىرۋعا كومەكتەسەدى. ال شالا تۋعان سابيلەرگە ارنالعان جورگەكتەردى ءبىز قازاقستانعا تەگىن جەتكىزىپ, پەريناتالدى ورتالىقتار مەن پەرزەنتحالارعا تاراتىپ بەرەمىز, ساتىلىمدا جوق. مۇنداي جورگەكتەر اسا جۇمساق, قاۋىپسىز ماتەريالداردان جانە سالماعى ءبىر كيلوعا دا جەتپەي تۋعان شاقالاقتاردىڭ سالماعىنا, تەرىلەرىنىڭ نازىكتىگىنە ەسەپتەلىنىپ جاسالعاندىقتان, بۇل اتا-انالارىنا دا ايتارلىقتاي كومەك پەن قولداۋ», دەيدى ورتالىق ازياداعى Procter & Gamble باسشىسى رۋسلان گامزاەۆ.
قازاقستانداعى «قىزىل جارتى اي» قوعامىنىڭ باس ديرەكتورى مارات مەلدەحانوۆ بەدەلدى برەندپەن سەرىكتەسە جۇمىس ىستەپ وتىرعاندارىن مارتەبە تۇتاتىنىن ايتا كەلە: ء«بىزدىڭ ءبىرىنشى مىندەتىمىز – جوبا ينفراقۇرىلىمىن ۇيىمداستىرۋ, ساپالى قولداۋ مەن قايىرىمدى جوبانىڭ تيىمدىلىگىن بارىنشا قامتاماسىز ەتۋ», دەدى.
«شالا تۋعان بالالار جالپى سانىنىڭ تورتتەن ءبىر بولىگى, وتە ەكسترەمالدى دەنە سالماعىمەن – ءبىر كيلوگرامنان دا تومەن بولىپ دۇنيەگە كەلەدى. الايدا جىل وتكەن سايىن مەديتسينانىڭ بۇل سالاسى دامىپ كەلە جاتقاندىقتان, دۇنيەگە كەلۋگە اسىققان بالالارعا قامقورلىق كورسەتۋ ءبىز ءۇشىن جەڭىلدەپ جاتىر», دەيدى پەريناتولوگيا جانە بالالار كارديوحيرۋرگياسى ورتالىعىنىڭ نەوناتولوگياداعى مەديتسينالىق قىزمەتتەر ساپاسىن باقىلاۋ ءبولىمىنىڭ باسشىسى ءلاززات وڭالباەۆا.
مەرەكە كەزىندە ەكى ورتالىقتا دا دارىگەرلەر وزدەرى كىندىگىن كەسكەن, دەنى ساۋ ءارى ءوسىپ قالعان بالالارمەن كەزدەسكەندە جان تولقىتارلىق اسەرلى ساتتەرى كوپ بولدى. ال «بۇرىن جانە بۇگىن» فوتوسۋرەتتەر كورمەسىنە شارانالاردىڭ ەندى تۋعان جانە ءوسىپ كەلە جاتقان كەزدەرىندەگى سۋرەتتەرى قويىلدى.
الماتى
