اسكەري قىزمەتشىلەر التى اي ىشىندە «شىعىس» سەكتورىندا ءۇندى بىتىمگەرلىك باتالونىنىڭ قۇرامىندا تاپسىرمالاردى ورىندادى. جاۋاپكەرشىلىك ايماقتارىندا جاياۋ, ءموبيلدى جانە اۋە پاترۋلدەرىن جۇرگىزىپ, توسقاۋىل بەكەتتەرىنىڭ جۇمىسىن ۇيىمداستىردى, بىتىمگەرلىك بازاسىن كۇزەتىپ, بەيبىت كەلىسىمدەردىڭ ساقتالۋىن قامتاماسىز ەتتى.
بىتىمگەرلەردى قورعانىس مينيسترلىگى بىتىمگەرلىك وپەراتسيالار ورتالىعى باستىعىنىڭ ورىنباسارى – شتاب باستىعى, پولكوۆنيك باقىتجان جەتپىسوۆ باستاعان اسكەري قىزمەتشىلەر, سونداي-اق تۋىستارى مەن جاقىندارى قارسى الدى.
– سول وڭىردەگى قيىن جاعدايعا قاراماستان, بولىمشەنىڭ اسكەري قىزمەتشىلەرى جۇكتەلگەن مىندەتتەردى لايىقتى ورىنداپ شىقتى. ءبىز ۇيگە جاقسى كوڭىل كۇيمەن ورالدىق. التى اي ىشىندە كەيبىر اسكەري قىزمەتشىلەرىمىزدىڭ وتباسىندا سابيلەر دە دۇنيەگە كەلدى, – دەدى بىتىمگەرلىك بولىمشەسىنىڭ كومانديرى, كاپيتان فارحات اقباليەۆ.
تاياۋ كۇندەرى ليۆان رەسپۋبليكاسىنان كەلگەن بىتىمگەرلەردىڭ ورنىنا قارۋلى كۇشتەرىمىزدىڭ ونىنشى بىتىمگەرلىك كونتينگەنتى اتتانىپ كەتتى. ەستەرىڭىزگە سالساق, «بۇۇ-نىڭ ليۆانداعى ۋاقىتشا كۇشتەرىندەگى» ميسسياسىنا ەلىمىزدىڭ اسكەري قىزمەتشىلەرى 2018 جىلدىڭ قازان ايىنان باستاپ قاتىسىپ كەلەدى. وسى ۋاقىت ىشىندە 500-دەن استام اسكەري قىزمەتشى ليۆاندا قىزمەت ەتىپ, قاجەتتى تاجىريبە جيناقتادى. بۇل ءۇردىس الداعى ۋاقىتتا دا جالعاسىن تابا بەرەدى. سوندىقتان قورعانىس مينيسترلىگى بىتىمگەرلىك وپەراتسيالار ورتالىعىنىڭ بازاسىندا بۇۇ بىتىمگەرلىك ميسسيالارىنا جىبەرۋ ءۇشىن اسكەري باقىلاۋشىلار مەن شتاب وفيتسەرلەرى لاۋازىمدارىنا تاعايىندالاتىن ۇمىتكەرلەر جيىندارى ۇنەمى ءوتىپ وتىرادى.
قازىرگى كۇنى ءوتىپ جاتقان كەزەكتى جيىنعا قارۋلى كۇشتەردىڭ ءارتۇرلى بولىمشەلەرىنەن 17 اسكەري قىزمەتشى قاتىسىپ جاتىر. ونىڭ ەكەۋى – ايەل اسكەري قىزمەتشى. بۇۇ بىتىمگەرلىك ميسسيالارىنا قاتىسۋ ءۇشىن وفيتسەرلەر قاتاڭ تالاپتار بويىنشا تاڭدالادى. ىرىكتەۋ بارىسىندا اسكەري داعدىلار عانا ەمەس, سونىمەن قاتار مورالدىق-پسيحولوگيالىق تۇراقتىلىق, دەنە دايىندىعى مەن شەت تىلدەرىن بىلۋىنە دە باسا نازار اۋدارىلادى.
ءبىر اپتا ىشىندە ۇمىتكەرلەر مەديتسينالىق كوميسسيادان, پسيحولوگيالىق تەستىلەۋدەن وتەدى. دەنە شىنىقتىرۋ نورماتيۆتەرىن تاپسىرىپ, مەحانيكالىق قورابى بار كولىكتى جۇرگىزۋ داعدىلارى مەن اعىلشىن ءتىلىن مەڭگەرۋ دەڭگەيىن كورسەتەدى.
جيىن اياقتالعاننان كەيىن ىرىكتەۋدەن وتكەن اسكەري قىزمەتشىلەر ودان ءارى بۇۇ بىتىمگەرلىك ميسسيالارىنا جىبەرىلەتىن وفيتسەرلەر رەزەرۆىنە الىنادى. اسكەري باقىلاۋشىلار مەن شتاب وفيتسەرلەرىن ىرىكتەۋ بەيبىتشىلىكتى, تۇراقتىلىق پەن قاۋىپسىزدىكتى ساقتاۋعا باعىتتالعان بىتىمگەرلىك قىزمەت ءۇردىسىنىڭ ماڭىزدى كەزەڭى سانالادى.
