كوللاجدى جاساعان – قونىسباي شەجىمباي, «EQ»
اتىراۋ وبلىسىنىڭ اكىمى سەرىك شاپكەنوۆتىڭ ايتۋىنشا, كەيبىر اۋىلدىڭ تۇرعىندارىن ينتەرنەتكە قوسىلۋ جىلدامدىعىنىڭ تومەندىگى الاڭداتادى. بۇل تۇيتكىل شەڭبەرىندە بايلانىس وپەراتورلارىمەن تەلەكوممۋنيكاتسيا جەلىسىن دامىتۋ جوسپارى تالقىلاندى. وعان «قازاقتەلەكومنىڭ» باسقارما توراعاسى قۋانىشبەك ەسەكەەۆ پەن سالالىق مەكەمەلەردىڭ وكىلدەرى قاتىستى.
«قازاقتەلەكوم» اق دەپارتامەنت ديرەكتورى ەرسايىن دۇيسەماليەۆتىڭ ايتۋىنشا, ايماقتا 153 ەلدى مەكەننىڭ 134-ءى ينتەرنەت جەلىسىمەن قامتىلىپ وتىر. ال 19 ەلدى مەكەنگە ينتەرنەت جەلىسى قوسىلماعان. باستى سەبەپ – تۇرعىندار سانى 50 ادامنان از. ەندى بۇل اۋىلداردى 2024-2025 جىلدارى ينتەرنەت جەلىسىنە قوسۋ جوسپارلانعان.
– بيىل جوسپارعا سايكەس مىس جەلىسىن وپتيكالىق جەلىگە اۋىستىرۋ جۇمىسى ءجۇرىپ جاتىر. بۇل تۇتىنۋشىلارعا 500 مبيت/س جىلدامدىقپەن ينتەرنەتكە, ID TV تەلەديدارى مەن تسيفرلىق سەرۆيسىنە, ءىر تەلەفونعا قوسىلۋعا مۇمكىندىك بەرەدى. اتىراۋ قالاسىندا وپتيكالىق جەلىلەردىڭ ۇلەسى 60 پايىزعا, قۇلسارى قالاسىندا 10 پايىزدان 37 پايىزعا دەيىن ۇلعايادى. 2024 جىلعا بولىنگەن قارجىعا اقجار, تالقايراڭ, بەسىكتى اۋىلدارىنىڭ ابونەنتتەرىن تولىق وپتيكالىق جەلىگە اۋىستىرۋ جوسپارلانىپ وتىر. وبلىس ورتالىعىندا 5500 ابونەنت مىس جەلىسىنەن وپتيكاعا اۋىسادى. بۇعان سالىنعان ينۆەستيتسيا قارجىسى – 162 ملن تەڭگە, – دەيدى ەرسايىن دۇيسەماليەۆ.
وبلىس اكىمىنىڭ پىكىرىنشە, 3G بازالىق ستانساسى قوسىلماعان ەلدى مەكەندەردى ينتەرنەتپەن قامتۋ ءۇشىن كومپانيا مەن اكىمدىك اراسىندا بىرلەسكەن باعدارلاما جاساۋ قاجەت. ال ءبىلىم بەرۋ جانە دەنساۋلىق ساقتاۋ مەكەمەلەرى كەلەسى جىلى 100 پايىز وپتيكالىق جەلىمەن قامتىلۋعا ءتيىس.
– قازىر تسيفرلىق تەلەكوممۋنيكاتسيالىق قىزمەتتەرگە سۇرانىس ارتىپ وتىر. ەلدى مەكەندەردەگى تۇرعىنداردىڭ باسىم بولىگى ينتەرنەت جەلىسى جىلدامدىعىنىڭ تومەندىگىنە, كەيبىرى مۇلدە جوقتىعىنا ءجيى شاعىم ايتادى. ءبىز دە ساپانىڭ جاقسارعانىن قالايمىز. وبلىستا 3G بازالىق ستانساسى قوسىلماعان 19 ەلدى مەكەن بار. بۇل ەلدى مەكەندەردە ابونەنت از شىعار. كومپانيا ءۇشىن تۇرعىنى از اۋىلدارعا ينتەرنەت جەلىسىن قوسۋ ءتيىمسىز بولار. سول سەبەپتى اكىمدىكپەن بىرلەسكەن باعدارلاما دايىنداپ, وپتيكالىق جەلىنى جۇرگىزۋدى ىجداعاتتايىق, – دەدى سەرىك شاپكەنوۆ.
جيىن سوڭىندا وبلىس اكىمى س.شاپكەنوۆ پەن «قازاقتەلەكوم» اق باسقارما توراعاسى ق.ەسەكەەۆ بىرلەسكەن مەموراندۋمعا قول قويدى. قۇجاتتا وڭىردەگى بايلانىس پەن ينتەرنەتتىڭ ساپاسىن ارتتىرۋ ماسەلەسى قامتىلعان.
– اتىراۋ وبلىسىنداعى جەلىلىك ينفراقۇرىلىمدى دامىتۋ, تۇرعىنداردى زاماناۋي تەلەكوممۋنيكاتسيالىق قىزمەتپەن, سەرۆيسپەن قامتاماسىز ەتۋ, سونداي-اق 5G جەلىسىن دامىتۋ جوسپارى تالقىلاندى. قازىر «قازاقتەلەكوم» كومپانيالار توبى مۇنايلى وڭىردە بەسىنشى بۋىننىڭ 8 بازالىق ستانساسىن ورناتتى. ەندى جىلدىڭ سوڭىنا دەيىن تاعى 8 بازالىق ستانسانى ورناتۋ جوسپارلانىپ وتىر. كەلەسى جىلى 5G بازالىق ستانساسىنىڭ سانى 40-قا جەتكىزىلەدى. وبلىس تۇرعىندارىن جىلدامدىعى جوعارى ينتەرنەتپەن, ساپالى بايلانىسپەن قامتاماسىز ەتۋ ءۇشىن جەلىلەر جاڭعىرتىلادى, – دەدى ق.ەسەكەەۆ.
اتىراۋ وبلىسى
