«كورمە جۇمىسىمەن تانىسقان بالالاردىڭ كوڭىل كۇيى كوتەرىلىپ قانا قويماي, ونداعى قولونەر بۇيىمدارى, ەر-تۇرمان, تۇرمىستىق زاتتار سىندى تاريحي جادىگەرلەردى كورىپ, وزدەرىن قىزىقتىرعان ساۋالدارعا جاۋاپتار الىپ, قۋانىپ قالدى. ءسۇيىنباي اقىننىڭ مۇرالارى بالالارعا وي سالىپ, ەرەكشە اسەرگە بولەگەنى ءسوزسىز. بۇل ءوز كەزەگىندە قامكوڭىل بالالارعا زور قۋانىش سىيلادى. سول ءۇشىن مۋزەي قىزمەتكەرلەرىنە ريزاشىلىعىمىزدى بىلدىرەمىز», دەيدى «قامقورلىق وڭالتۋ» ورتالىعىنىڭ مەڭگەرۋشىسى, بىلىكتى دارىگەر اسەل ساۋرىقوۆا.
ورتالىقتا ەم الىپ جاتقان بالالارعا ارنايى ءسۇيىنباي, جامبىل, ۇمبەتالى اقىنداردىڭ شىعارماشىلىعىن تانىستىرىپ, اقىندار مەن باتىرلار ەلىنىڭ تاريحىن ناسيحاتتاي كەلگەن ءسۇيىنباي ارون ۇلى ادەبي-مەموريالدى مۋزەيىنىڭ مەڭگەرۋشىسى اياۋجان سادۋاقاسوۆا مۋزەي تاريحى جايىندا دا تۇسىنىكتى ەتىپ بايانداپ بەردى.
«مەنىڭ ءپىرىم ءسۇيىنباي,
ءسوز سويلەمەن سىيىنباي.
سىرلى سۇلۋ سوزدەرى,
ماعان تارتقان سىيىنداي», –
دەپ ءسۇيىنبايدىڭ شاكىرتى جامبىل اتامىز جىرلاعانداي, اقىنداردان قالعان اۋەزدى ءان-كۇيمەن, جىر-داستاندارمەن دە ادام جانىنا اسەر ەتىپ, ەمدىك شارالار جاساۋعا بولاتىنى ايدان انىق. وسى سەبەپتى ءىس-شارا بارىسىندا مۋزەي قىزمەتكەرى سەرىك شايىمحانوۆ دومبىراسىنىڭ كۇيىن كەلتىرە ءسۇيىنباي اتاسىنىڭ بىرنەشە تەرمەسىن قۇيقىلجىتا ورىنداعان ساتتە تىڭداپ وتىرعان بالالاردىڭ ەرەكشە كۇيگە بولەنگەنى بايقالدى. ولاردىڭ جانارىنان جالىن اتىپ, ونەرگە دەگەن قۇشتارلىعى ارتا تۇسكەندەي.
«قامقورلىق» ورتالىعىنىڭ ۇجىمى مۇنداي شارالاردىڭ ءجىبىن ۇزبەي جالعاسۋىن سۇرادى. بۇل, ءبىر جاعىنان, ەلىمىزدىڭ ءار قيىرىنان كەلەتىن بالالاردىڭ مۋزەي جۇمىسىمەن تانىسۋىنا ىقپال ەتسە, ەكىنشىدەن, كوڭىل كۇيلەرىن سەرپىلتىپ, وڭالۋىنا وڭ سەپتىگىن تيگىزەدى», دەيدى مۋزەي قىزمەتكەرى قارلىعاش مۋشيروۆا.
الماتى وبلىسى
