iba.sport
– ءوزىڭىز دە تاماشالادىڭىز, باسەكەلەستىك قالاي ءوربىدى؟ جاستاردىڭ تەگەۋرىنى قانشالىقتى ەكەن؟
–جازعى سپارتاكيادا دوداسىندا جاستار ءوزىنىڭ الەۋەتىن كورسەتتى. ءار سالماقتا جۇلدە العان بوكسشىلار ۇلتتىق قۇرامانىڭ ساپىن نىعايتىپ, كەلەر كۇننىڭ ەنشىسىندەگى دودالارعا ازىرلىكتى كۇشەيتەمىز. الدا بولار الاماننىڭ باستى بايگەسى ارينە پاريج جازعى وليمپياداسى. سوعان جولداما ولجالاۋ, ودان كەيىن مەدال يەلەنۋگە ازىرلىك جۇرگىزۋ, وليمپيادا رينگىندە نە بەل كەتكەنشە, نە بەلبەۋ ۇزىلگەنشە ايقاسۋ. ماقسات وسى.
– اپتا بويى استانا تورىندە ايقاسقا تۇسكەن بوكسشىلاردىڭ اراسىندا سولتۇستىك قازاقستان وبلىسىنىڭ اتىنان بىردە-ءبىر سپورتشىنىڭ بولماۋى, ياعني بۇل وبلىستىڭ كوماندا اكەلمەۋى, وزگە وڭىرلەردىڭ كەيبىرى ءتىپتى تولىق قۇرامدا قاتىسپاۋى جايىندا نە ايتاسىز؟ جازعى سپارتاكيادا ويىندارى 4 جىلدا ءبىر اينالىپ كەلەدى عوي ءوزى.
– ارينە, قىنجىلاسىڭ, ەلىمىزدە بۇقارالىق سيپات العان سپورت ءتۇرى بوكس دەيمىز. سوعان قاراماستان سولتۇستىك قازاقستان وبلىسىنان سپورتشى قاتىسپاۋى وسى سالاعا جاۋاپتى مامانداردىڭ دا جۇمىسىنا ءاتۇستى قاراۋىنىڭ كەسىرى دەر ەدىم. ءبىر وبلىستىڭ كوماندا اكەلمەۋى, ءوزىڭ ايتپاقشى, وزگە وڭىرلەردىڭ دە كەيبىرى تولىق قۇرامدا كەلمەۋى قادىرىڭدى قاشىرادى ەكەن. تۇركىستان, جامبىل وبلىستارى مەن الماتى قالاسى عانا تولىق قۇرامدا قاتىسىپ, ء ار سالماقتا بوكسشى قوستى. وزگە وڭىرلەر مەن شىمكەنت, استانا سىندى مەگاپوليستەردىڭ دە كومانداسى ءتورت كوزى تۇگەل بولعان جوق. 4-5 بوكسشىمەن عانا كەلگەن وبلىستىڭ كومانداسى بار. ءار نارسەنىڭ قايىرى بار دەيمىز ءوزىمىزدى جۇباتىپ. قاتىسۋشىلاردىڭ سانى جاعىنان ۇياتتى بولعانىمىزبەن دە ساپانى سالماقتايتىن بولساق, كوڭىل تويادى. ويتكەنى جوعارىدا ايتقانىمداي, الەم چەمپيوندارى, الەم بىرىنشىلىگىنىڭ فينالىنا شىعىپ كۇمىس مەدال ولجالاعان, ازيا چەمپيوناتىندا توپ جارعان, ءتىپتى كاسىپقوي بوكسقا كەتىپ, الەۋەتىن بايقاپ جۇرگەن بوكسشىلار دا بيىلعى سپارتاكياداعا قوسىلدى.
– الەم چەمپيونى دەمەكشى, وليمپيادالىق سالماقتا 5 بىردەي الەم بىرىنشىلىگىنەن التىن مەدال ولجالاعان بوكسشى قاتىستى. ولاردىڭ تورتەۋى ءوزارا فينالدا توقايلاستى.
– جانكۇيەرلەردىڭ كوز الدىندا, كورەرمەندەر تەلەارنادان تىكەلەي ەفيردەن تاماشالادى. تورەشىلىك تە ءادىل بولدى, بۇرا تارتسا, وبال-ساۋابى وزدەرىنە تيەتىنىن سەزىندى دەپ پايىمدايمىن. ءار سالماقتاعى چەمپيون اتانعان بوكسشىلار وزدەرىنىڭ الەۋەتىن كورسەتتى.
– قىتايدىڭ حانچجوۋ قالاسىندا وتكەن جازعى ازيا ويىندارىنا اتتاناردا كەمىندە 4 جولداما ەنشىلەيمىز دەپ ەدىڭىز. بىراق بۇيىرعانى 1 ليتسەنزيا عانا.
– بۇيىرماعان ەكەن, ولجالى ورالماعانىمىز ءۇشىن ايىپتى ءوزىمىز ارقالايمىز, كىنانى بىرەۋگە ارتا سالۋ ءجون ەمەس, كەم تۇسىڭدى الدىمەن وزىڭنەن ىزدەۋگە ءتيىستىسىڭ. كەلەسى جىلى يتاليا ەلىندە, سودان كەيىن تايلاندتا ليتسەنزيالىق تۋرنير ۇيىمداستىرىلادى, سول دودادا بارىمىزدى سالامىز.
– وسى ەكى الامانعا كىمدەردىڭ باراتىنى سپارتاكيادانىڭ قورىتىندىسى بويىنشا سارالانا ما؟ چەمپيون اتانعان بوكسشىلارعا باسىمدىق بەرىلە مە؟
– ارينە ولار بارىن سالىپ, ءوزىنىڭ مىقتىلىعىن مويىنداتىپ سپارتاكيادانىڭ التىنىن يەلەنىپ وتىر. نەگە باسىمدىق بەرىلمەۋى كەرەك؟ سوندىقتان چەمپيون اتانعان بوكسشىلار وزدەرىن دالەلدەدى. جاڭا دا ايتتىم, جۇلدەگە ىلىنگەن بوكسشىلاردىڭ بارلىعى دا ۇلتتىق قۇرامانىڭ وقۋ-جاتتىعۋ جيىنىنا شاقىرىلادى. ال ليتسەنزيالىق تۋرنيرگە كىمنىڭ باراتىنى جارىسقا جاقىن قالعاندا عانا ناقتىلانادى. ويتكەنى جامان ايتپاي جاقسى جوق, جاراقات الىپ قالۋى مۇمكىن, باسقا دا سەبەپتەرى بار.
– جۋىردا تۋريزم جانە سپورت ءمينيسترى ەرمەك مارجىقپاەۆ وزدەرىڭىزدىڭ ەسەپتى تىڭدادى. ناتيجەگە قاتىستى سىن دا ايتىلدى. بوكسشىلاردىڭ 3-راۋندتا القىنىپ قالاتىنىنا قىنجىلدى. باسقا-باسقا ءوزى دە بوكسپەن شۇعىلدانىپ, كسرو سپورت شەبەرى اتاعىن العان مينيستر بەكەر سىنامايدى عوي.
– «سىن تۇزەلمەي, ءمىن تۇزەلمەيدى». بوكسشىلاردىڭ فيزيكالىق دەنە قۋاتىن شىڭداۋ ءۇشىن شەتەلدىك مامان دا شاقىرتىپ, جۇمىستى كۇشەيتتىك. حانچجوۋدا وتكەن ازيا چەمپيوناتىنان كەيىن بۇل ماماننىڭ جۇمىسىنا قاتىستى دا از ءسوز ەرگەن جوق. بىراق ءبىز الدىمەن وزىمىزدەن ەسەپ الىپ ۇيرەنسەك ەكەن. وزبەكستان بوكسى نەگە قۋاتتى؟ ولاردىڭ دا ازىرلىك جۇرگىزۋى, وقۋ-جاتتىعۋ جيىنىن بىزدەن گورى وزگەشە تاسىلدە وتەدى دەمەيمىن. بىراق ۇلتتىق قۇرامادا اۋىزبىرشىلىك, ىنتىماق زور. قاي بوكسشىسى دا الەم چەمپيونى ەدىم, وليمپيادا ويىندارىندا التىن الدىم دەپ شىرەنبەيدى, ۇيىنە بارسا, قارا جۇمىستى دا ىستەيدى, وعان ارلانبايدى دا. ال بىزدە قازىر ۇلتتىق قۇرامانىڭ ساپىندا جۇرگەندەردىڭ كوبى قالانىڭ اقساۋساق بالاسى. كەيدە قالجىڭعا سۇيەپ «بايدىڭ بالالارى» دەپ تە ايتىپ قويامىن. سوندىقتان دا اتا-انالارعا ايتارىم بالانى ءجاسوسپىرىم شاعىنان جۇمساپ, ءۇيدىڭ شارۋاسىنا ۇيرەتىپ ەڭبەكپەن ەسەيتۋ كەرەك. سوندا عانا شىمىر, قايسار بولىپ, كۇشى قاتايادى. الدىمەن ەڭبەك, ەكىنشى ءتارتىپ بولعان جەردە عانا ناتيجە ورنايدى. مەن بۇعان دەيىن دە ۇلتتىق قۇرامانىڭ باس باپكەرى لاۋازىمىن اتقاردىم. تاعى دا باس باپكەرلىك لاۋازىمدى ۇسىندى. وسى جىلدىڭ قاڭتار ايىنان باستاپ ۇلتتىق قۇرامانى قابىلداپ الدىم. راس, مويىنىمىزدا ۇلكەن جۇكتەمە, اۋىر امانات تۇر, سونى ورىنداۋعا بارىمىزدى سالامىز.
