فوتو: قر تۋريزم جانە سپورت مينيسترلىگى
بۇگىن ن.نازارباەۆ حالىقارالىق اۋەجايىندا فۋتبولدان ۇلتتىق قۇراما ويىنشىلارىن سالتاناتپەن قارسى الۋ ءراسىمى ءوتتى.
«سىزدەر بۇكىل قازاق حالقىنا, ءتىپتى فۋتبولدان, جالپى سپورتتان الىس جاندارعا ەستەن كەتپەس ەرەكشە اسەر, ەموتسيا سىيلادىڭىزدار. ءوز ويىندارىڭىز ارقىلى جانكۇيەرلەردىڭ وتاندىق فۋتبولعا دەگەن سەنىمىن قايتارىپ, ەلىمىزدىڭ حالىقارالىق ارەناداعى ءيميدجىن كوتەردىڭىزدەر. كەشە تۇندە بۇكىل ەل ۇيىقتاماي, سىزدەر ءۇشىن تەلەديدار الدىندا تاقىمىن قىسىپ, جانكۇيەر بولدى. سىزدەر بۇل دودادا ۇلكەن ەرلىك جاساپ, قازاق حالقىن ءبىر ماقسات اياسىنا ۇيىستىرا الدىڭىزدار. بۇل ەرلىكتەرىڭىز كوپكە ۇلگى, مىڭداعان جاس بالا سىزدەر سياقتى بولۋدى, بولاشاقتا ۇلتتىق قۇراما ساپىندا ويناۋدى ارماندايدى. قازاق حالقىنا ۇلكەن قۋانىش سىيلاعاندارىڭىزعا كوپ راحمەت, جىگىتتەر», دەدى ەرمەك مارجىقپاەۆ.
قارىمتا ماتچتا ۇلتتىق قۇراما قارسىلاسقا ەسە جىبەرسە دە جانكۇيەرلەر فۋتبولشىلاردى اسا قۇرمەتپەن, تياناقتى دايىندىقپەن كۇتىپ الدى. جينالعاندار فۋتبولشىلارعا قۇرمەت رەتىندە ءدالىز جاساپ, ساپ تۇزەدى. ارنايى بانەرلەر ارقىلى جانكەشتى ويىن ءۇشىن ەلدىڭ العىسىن جەتكىزدى.
ءوز كەزەگىندە اياق دوپ شەبەرلەرى مەن جاتتىقتىرۋشىلار قۇرامى سلوۆەنيامەن بولعان كەزدەسۋ قازاقستان ۋاقىتىمەن ءتۇن ورتاسىندا وتسە دە, قولداۋسىز قالدىرماعان جەرلەستەرىنە ريزاشىلىعىن ءبىلدىردى.
ەسكە سالايىق, قازاقستان قۇراماسى 21 قاراشاعا قاراعان ءتۇنى قوناقتا, ەۋرو-2024 ىرىكتەۋ ءتۋرنيرى اياسىندا سلوۆەنيا فۋتبولشىلارىمەن كەزدەسىپ, اسا تارتىستى وتكەن ويىندا قارسىلاستارىنا 2:1 ەسەبىمەن جول بەردى.
ۇلتتىق قۇراما ەۋرو-2024 ويىندارىنا فينالدىق ىرىكتەۋ كەزەڭدەرى ارقىلى توپتان شىعىپ, تىكەلەي جولداما الا الماسا دا, ۇلتتار ليگاسى ارقىلى اتالعان مۇمكىندىككە ءالى دە ۇمىتكەر.
بۇل سىندا قازاقستان قۇراماسىن 2004 جىلعى ەۋروپا چەمپيوندارى اتانعان گرەكيا قۇراماسى كۇتىپ تۇر. ماتچ 2024 جىلدىڭ ناۋرىز ايىندا افينادا وتەدى دەپ جوسپارلانعان.
