اباي وبلىستىق ءماسليحاتى وسى سايلاۋدان كەيىنگى ءبىرىنشى سەسسياسىن 30 ناۋرىزدا وتكىزگەن ەدى. اتالعان سەسسيادا اباي وبلىستىق ءماسليحاتىنىڭ توراعاسى بولىپ قۋانىش سۇلەيمەنوۆ سايلاندى. سونىمەن قاتار وبلىستىق ءماسليحاتتىڭ بەس تۇراقتى كوميسسياسى قۇرىلىپ, «اباي وبلىسى ءماسليحاتىنىڭ اپپاراتى» مەملەكەتتىك مەكەمەسىنىڭ قۇرىلىمى مەن شتاتتارى بەكىتىلگەنىن اتاپ وتكەن ءجون.
اباي وبلىستىق ءماسليحاتىنا ءبىر مانداتتى اۋماقتىق سايلاۋ وكرۋگتەرى بويىنشا 15 دەپۋتات, 3 ساياسي پارتيادان – 13 دەپۋتات «Amanat» پارتياسىنان, 1 دەپۋتات «Respublica» پارتياسىنان جانە 1 دەپۋتات «قازاقستان حالىق پارتياسىنان» سايلانعان.
بۇگىنگە دەيىن اباي وبلىستىق ءماسليحاتى 9 سەسسيا وتىرىسىن وتكىزدى, ونىڭ 2-ەۋى كەزەكتى,7-ەۋى كەزەكتەن تىس وتىرىس. تاياۋدا ءبىر كەزەكتەن تىس كوشپەلى سەسسياسى جارما اۋدانىندا ءوتتى. وبلىستىق ءماسليحات دەپۋتاتتارى بارلىعى 72 شەشىم قابىلداسا, ونىڭ ىشىندە 16 شەشىم نورماتيۆتىك-قۇقىقتىق اكتىلەر قۇجاتى ەسەبىنە جاتادى. اتالعان شەشىمدەرگە اباي وبلىسىنىڭ ادىلەت دەپارتامەنتى كەلىسىم بەرىپ, ەلەكتروندىق تۇردەگى نورماتيۆتىك-قۇقىقتىق اكتىلەردىڭ ەتالوندى باقىلاۋ بانكىنە رەسمي جاريالانعان.
سەسسيا وتىرىستارىندا «اباي وبلىسىنداعى كەيبىر ەلدى مەكەندەردىڭ شەكاراسىن وزگەرتۋ تۋرالى», «2023-2025 جىلدارعا ارنالعان وبلىستىق بيۋدجەت تۋرالى», سونىمەن قاتار بيۋدجەتكە وزگەرىستەر ەنگىزۋ, «اباي وبلىسىنىڭ قورشاعان ورتاسىنا تەرىس اسەر ەتكەنى ءۇشىن تولەماقى مولشەرلەمەلەرىن بەكىتۋ جانە كوتەرۋ», «اباي وبلىسىندا جىلۋ ماۋسىمىنا دايىندىق جانە وتكىزۋ قاعيدالارىن بەكىتۋ», «اباي وبلىسىنىڭ ازاماتتارىنا جەكەمەنشىككە تەگىن ۇسىنىلۋى مۇمكىن جەر ۋچاسكەلەرىنىڭ شەكتى (ەڭ جوعارى) مولشەرىن بەلگىلەۋ», «اباي وبلىسىنىڭ حالقىن ورتالىقتاندىرىلماعان اۋىز سۋمەن جابدىقتاۋ كەزىندە جەرۇستى جانە جەراستى سۋ وبەكتىلەرىنەن سۋ الۋ ەرەجەسىن بەكىتۋ» سەكىلدى وزەكتى ماسەلەلەردىڭ شەشىمدەرى قابىلدانىپ, جاڭا وبلىستى قالىپتاستىرۋدا ماڭىزدى ءرول اتقاراتىن جايلار قابىلداندى.
دەپۋتات جۇمىسىنىڭ ەڭ ماڭىزدىسى – ەل مۇددەسىنە قاتىستى ماسەلەلەردى دەر كەزىندە كورىپ, كوتەرە ءبىلۋ. بۇل ىستە تۇراقتى كوميسسيانىڭ ماڭىزى زور. اباي وبلىستىق ءماسليحاتىنىڭ 5 تۇراقتى كوميسسياسى بەكىتىلگەن. ولار: ەكونوميكالىق جانە قارجىلىق, كاسىپكەرلىك قىزمەتتى دامىتۋ سالاسىنداعى تۇراقتى كوميسسياسى; اگروونەركاسiپتiك كەشەن جانە ەكولوگيانى دامىتۋ سالاسىنداعى تۇراقتى كوميسسياسى; حالىقتى الەۋمەتتىك قورعاۋدى, ءبىلىم جانە عىلىم, دەنساۋلىق ساقتاۋدى, مادەنيەت جانە سپورتتى دامىتۋ سالاسىنداعى تۇراقتى كوميسسياسى; ونەركاسىپتى جانە جەر قويناۋىن پايدالانۋ دامىتۋ سالاسىنداعى تۇراقتى كوميسسياسى; دەپۋتاتتىق وكىلەتتىلىك, ەتيكا جانە زاڭدىلىق ماسەلەلەرى جونىندەگى تۇراقتى كوميسسياسى. ەسەپتى كەزەڭدە تۇراقتى كوميسسيا وتىرىستارىندا بارلىق ماسەلە قارالىپ, سەسسياعا جولداندى. اتاپ ايتقاندا, حالىقتى الەۋمەتتىك قورعاۋ, وبلىستىق بيۋدجەتتى قالىپتاستىرۋ, ناقتىلاۋ جانە ورىنداۋ, ازاماتتاردىڭ قۇقىقتارى مەن مۇددەلەرىن قورعاۋ, اۆتوكولىك جولدارىنىڭ جاعدايى سياقتى وزەكتى ماسەلەلەر تالقىلاندى.
دەپۋتاتتىق كورپۋس ءوڭىردىڭ الەۋمەتتىك-ەكونوميكالىق دامۋىنا, جوسپارلاۋ مەن بيۋدجەتتى قالىپتاستىرۋدىڭ تيىمدىلىگىن باقىلاۋعا, ونىڭ ماقساتتى جانە ءتيىمدى پايدالانىلۋىنا, سونداي-اق مەملەكەتتىك باعدارلامالاردىڭ ءوز دەڭگەيىندە ىسكە اسۋىنا باسا نازار اۋدارادى. راس, ماسەلەلەر از ەمەس. وبلىستىق ءماسليحات بۇل ماسەلەلەردى شەشۋ ءۇشىن ەڭ اۋەلى بيۋدجەتتىڭ جۇمسالۋى مەن ۇكىمەتتىك جوبالاردىڭ جۇمىسىن تالاپقا ساي ۇيىمداستىرۋعا ءجىتى نازار اۋدارادى.
«اباي وبلىسى ءماسليحاتىندا دەپۋتاتتاردىڭ ازاماتتاردى قابىلداۋ كەستەسى بار. كەستەگە سايكەس وبلىس تۇرعىندارى دەپۋتاتتارعا ساۋالدارى نەمەسە وتىنىشتەرىن تىكەلەي قابىلداۋدا ايتا الادى. بۇل دەپۋتاتتاردىڭ اشىقتىعى مەن حالىققا جاقىن ەكەنىن كورسەتەدى. ءدال وسىنداي جۇمىس بارلىق اۋداندىق ءماسليحات توراعاسىنا ۇسىنىلعان, بارلىق شالعاي جاتقان وڭىرلەردە جالعاسىن تابادى دەپ سەنەمىز. ايماعىمىزعا كەلەتىن بولساق, وبلىس بويىنشا تۇيتكىلدى ماسەلەلەردى شەشەتىن جۇمىستارعا وبلىستىق, قالالىق جانە اۋداندىق ءماسليحات دەپۋتاتتارى جاۋاپتى. حالىق قالاۋلىلارى جۇمىستاردىڭ باسى-قاسىنان تابىلىپ, ورىندالۋىن قاداعالايدى. بۇل رەتتە اباي وبلىستىق ءماسليحات دەپۋتاتتارى 11 دەپۋتاتتىق ساۋال جولداپ, 21 سۇرانىس حات جىبەردى», دەيدى وبلىستىق ءماسليحات توراعاسى قۋانىش سەرقازى ۇلى.
وبلىس تۇرعىندارىنىڭ جاعدايىمەن جانە وڭىرلەرگە ماسەلەلەرمەن تانىسۋ ماقساتىندا اباي وبلىستىق ءماسليحاتىنىڭ توراعاسى قۋانىش سۇلەيمەنوۆ قالا جانە اۋداندارعا جۇمىس ساپارىمەن بارىپ, تۇرعىندارمەن كەزدەسۋ وتكىزدى. بۇگىنگى كۇنگە دەيىن جارما اۋدانىندا – 4, بورودۋليحا اۋدانىنا – 2, اياگوز اۋدانىنا – 1, ءۇرجار اۋدانىنا – 1, بەسقاراعاي اۋدانىنا – 1, اقسۋات اۋدانىنا – 1, كوكپەكتى اۋدانىنا – 1, كۋرچاتوۆ قالاسىنا – 1, سەمەي قالاسىنىڭ پريرەچنىي اۋىلدىق وكرۋگىنە – 1, گرانيتنىي اۋىلىنا 1 رەت باردى.
سونداي-اق وبلىستىق ءماسليحات توراعاسىنىڭ جەكە قابىلداۋىندا 629 ادام بولىپ, جەكە جانە زاڭدى تۇلعالاردان 254 ءوتىنىش ءتۇسىپ, قۇزىرلى مەكەمەلەرگە 348 سۇراۋ حات جىبەرىلگەن. ونىڭ ىشىندە كوبىنەسە تۇرعىن ءۇي ماسەلەلەرى, سەمەي قالاسىنداعى تازالىق ماسەلەلەرى, قوعامدىق كولىك پەن جولعا قاتىستى جانە سپورتتىق الاڭدار مەن بالالار ويىن الاڭدارىن سالۋ سەكىلدى حالىق كوكەيىندەگى جايلاردى شەشۋگە باسا ءمان بەرىلەدى. قازىرگى كۇندە سۇراۋحاتتارعا وراي ءتيىستى جاۋاپتار ءتۇسىپ, كوبى وڭ شەشىمىن تاۋىپ كەلەدى.
جاڭادان قۇرىلعان اباي وبلىسىندا وبلىس اكىمدىگىنىڭ جانە وبلىس ءماسليحاتىنىڭ قولداۋىمەن مەملەكەتتىك جاستار ساياساتىن ءتيىمدى جۇزەگە اسىرۋ, وبلىستىڭ الەۋمەتتىك-ەكونوميكالىق ساياساتىن قالىپتاستىرۋدا جاستاردىڭ پىكىرى مەن ءسوز ەركىندىگىن ەسكەرۋ ماقساتىندا اباي وبلىسىنىڭ جاستار ءماسليحاتىن قۇرۋ قولعا الىندى. باستى ماقسات – جاستار ءماسليحاتىن قۇرۋ ارقىلى جاستار اراسىنداعى وزەكتى ماسەلەلەر مەن ولاردىڭ ۇسىنىستارىن تالقىلاپ, ونىڭ شەشۋ تەتىكتەرىن تابۋ, دەپۋتاتتىق ساۋال ارقىلى جاستاردىڭ ماسەلەلەرىن ءتيىستى مەكەمەلەرگە جەتكىزۋ. سايلانعان جاستاردىڭ اراسىنان شىققان ۇزدىكتەردى بولاشاق كادر رەتىندە تاربيەلەۋ. اباي وبلىسىنىڭ جاستار ءماسليحاتىندا «جاستار ساياساتى», «پاراسات», «شابىت» تۇراقتى كوميسسيالارى جۇمىس ىستەيدى.
اباي وبلىسى
