كوپبالالى انالار مەن 78 جاستان اسقان جولاۋشىلار اۆتوبۋستا تەگىن جۇرەدى. قوعامدىق كولىكتەردىڭ الداعى قىس ايلارىنا دايىندىعىن باستى نازارعا العان قوناەۆ قالاسىنىڭ اكىمى نۇرلان قۇماتاەۆ جولاۋشىلار تاسىمالىمەن اينالىساتىن اۆتوپارككە بارىپ, ولاردىڭ جۇمىسىن تەكسەردى.
قالا باسشىسى جۇرگىزۋشىلەردىڭ مەديتسينالىق باقىلاۋدان وتكەنى تۋرالى جۋرنالعا جانە اۆتوبۋستاردىڭ تەحنيكالىق جاعدايىنا نازار اۋداردى. سەبەبى جولاۋشىلاردىڭ قاۋىپسىزدىگى ءبىرىنشى ورىندا تۇرۋى قاجەت. ول ءۇشىن اۆتوبۋس جۇرگىزۋشىلەرىنىڭ دەنساۋلىعى مىقتى بولىپ, قوعامدىق كولىك تالاپقا 100 پايىز سايكەس كەلۋ كەرەكتىگى اتاپ ءوتىلدى.
ء«بىز اۆتوپارككە بولىنەتىن سۋبسيديا كولەمىن ارتتىرىپ جاتىرمىز. سوندىقتان قىزمەت كورسەتۋ ساپاسى دا جاقسارۋى كەرەك. قازىر جاعدايدى وتە جاقسى دەي المايمىز. حالىقپەن كەزدەسۋلەردە «ارنا» شاعىن اۋدانى مەن ساياجاي القاپتارىنىڭ تۇرعىندارى اۆتوبۋستىڭ كەشىگىپ جۇرەتىنى جونىندە ۇنەمى شاعىمدانادى. جۇمىستى جانداندىرىپ, جۇرتشىلىققا دۇرىس قىزمەت كورسەتۋ قاجەت», دەدى نۇرلان قۇماتاەۆ اۆتوپارك باسشىسىنا.
كومپانيا باسشىسى ءار اۆتوبۋستا ديسپەتچەرلەردىڭ جانە اۆتوپارك اكىمشىلىگىنىڭ بايلانىس نومىرلەرى جازىلعان اقپارات ءىلىنىپ تۇرعانىن ايتتى. قانداي دا ءبىر شاعىم بولسا, تۇرعىندار بىردەن باسشىلىققا حابارلاي الادى.
ايتا كەتۋ كەرەك, «قاپشاعاي اتو» جشس تەك جولاۋشىلار تاسىمالىمەن عانا اينالىسىپ قويماي, كوممۋنالدىق قىزمەت كورسەتەدى. ونىڭ ىشىندە, جەكە ۇيلەردەن قوقىس شىعارۋ دا بار.
«تۇرمىستىق قاتتى قالدىقتاردى شىعارۋ تاڭنان باستالۋعا ءتيىس. قوقىس تازالاۋعا كەتۋدىڭ ورنىنا, مەنى كورسىن دەگەندەي, تەحنيكانىڭ ءبارى ءتىزىلىپ تۇر. ودان دا مىندەتتەرىڭىزدى ورىنداعاندارىڭىز ءجون ەدى», دەپ كەيىدى شاھار اكىمى.
اۆتوپارك جۇمىسىمەن تانىسقان نۇرلان قۇماتاەۆ الداعى جەلتوقسان ايىندا 4 اۆتوبۋس قولدانىسقا بەرىلەتىنىن اتاپ ءوتتى. سونداي-اق ول اۆتوپارك باسشىسىنا قىستىڭ ايازدى كۇندەرىندە اۆتوبۋستاردىڭ تالاپقا ساي, جىلى بولۋى قاجەتتىگىن تاپسىردى.
الماتى وبلىسى,
قوناەۆ قالاسى
