حالقىمىز ايتپاقشى, ۇستازدار قاۋىمى – ء«بىر تەرىنىڭ پۇشپاعىن يلەپ جۇرگەن» جاندار. وقۋ دەڭگەيىن كوتەرىپ, ساپالى ءبىلىم ارقىلى سانالى دا سالاماتتى ۇرپاق قالىپتاستىرۋدى ورتاق ماقسات تۇتادى. وسى تۇستا, اۋىل مەكتەپتەرىندەگى ارىپتەستەرىمىزدى قولداۋ, كومانداسىنىڭ ءبىر مۇشەسى بولۋ – مەن ءۇشىن زور عانيبەت, ۇلكەن تاجىريبە. بيىلعى وقۋ جىلىندا NIS كومانداسى بولىپ, سىرىم, ءبورلى, جانىبەك اۋداندارىنا ساپارعا اتتاندىق.
ادىستەمەلىك كومەك, الدىمەن, اقساي قالاسىنىڭ №5 جالپى ءبىلىم بەرەتىن مەكتەبىنەن باستاۋ الدى. ءبورلى اۋدانىنىڭ ءبىلىم ورداسى قازاق ءتىلى, گەوگرافيا پاندەرىنەن اشىق ساباق وتكىزىپ, پسيحولوگيا باعىتى بويىنشا «بەرىك وتباسى» باعدارلاماسى اياسىنداعى بالا مەن اتا-انا ىنتىماقتاستىعى تۋرالى ءىس-شارانى نازارعا ۇسىندى. بۇعان قوسا تىرەك مەكتەپ پەداگوگتەرى مەكتەپ كىتاپحاناسىنا قاتىستى جانە روبوتتەحنيكا ۇيىرمەسىنىڭ شەڭبەرىندە تۋىنداعان سۇراقتارعا جاۋاپ الدى.
نازارباەۆ زياتكەرلىك مەكتەبىنىڭ كومانداسى اقساي مەكتەبى وقۋشىلارىنىڭ عىلىمي جوبالار جارمەڭكەسىن تاماشالاپ, وقۋشىلار مەن مۇعالىمدەرگە زەرتتەۋ داعدىلارىن دامىتۋدىڭ ءتيىمدى تاسىلدەرى جونىندە ءوز ويلارىن ورتاعا سالدى. Lesson study بويىنشا زەرتتەۋ جۇمىستارىنا تالداۋ جاساپ, ءبىلىم ۇياسىنىڭ الەۋەتىن دامىتۋ جايىندا پىكىرلەرىن ءبىلدىردى. قوس مەكتەپ مۇعالىمدەرى كاسىبي اشىق ديالوگكە ءتۇسىپ, تاجىريبە الماستى.
– ءبىز نازارباەۆ زياتكەرلىك مەكتەپتەرى جەلىسىنىڭ ءبىلىم بەرۋ جۇيەسىندەگى ۇزدىك تاجىريبەمەن بولىسە الدىق. اقساي قالاسىنداعى №5 مەكتەپ ۇجىمى وتە ۇيىمشىل ءارى وزگەرىسكە دايىن ەكەنى سەميناردىڭ باستاپقى كەزەڭىنەن-اق بايقالدى. اقسايداعى ارىپتەستەرىمىز تىعىز قارىم-قاتىناس ورناتۋ ارقىلى وقىتۋ مەن باعالاۋعا قاتىستى ماسەلەلەردىڭ شەشىمىن تابا الدى, – دەيدى ورال قالاسى نازارباەۆ زياتكەرلىك مەكتەبىنىڭ قازاق ءتىلى مەن ادەبيەتى ءپانىنىڭ مۇعالىمى ساكەن مىڭباەۆ.
سونداي-اق نازارباەۆ زياتكەرلىك مەكتەبىنىڭ مۇعالىمدەرى جانىبەك اۋدانى ت.جاروكوۆ اتىنداعى جالپى ورتا ءبىلىم بەرەتىن مەكتەپ ۇجىمىنا «Bookcrossing» شەڭبەرىندە 100-دەن استام كىتاپ سىيعا تارتتى.
تاجىريبە تاراتۋ كۇنى فيزيكا, ماتەماتيكا, قازاق ءتىلى, ورىس ءتىلى, اعىلشىن ءتىلى, بيولوگيا پاندەرىنەن جانە باستاۋىش سىنىپ, پسيحولوگيا, IT باعىتىندا اشىق ساباقتارمەن جانە كىتاپحانا ءىسى بويىنشا سەمينارمەن جالعاستى.
– اشىق ساباقتارمەن قوسا عىلىمي جوبا, ەسسە جازۋ الگوريتمى, اتا-انالارعا ارنالعان اشىق تاربيە ساعاتى سەكىلدى ءىس-شارالارعا قاتىسىپ, كەرى بايلانىس ورناتتىق. تايىر جاروكوۆ مەكتەبىندەگى ارىپتەستەرىمىزبەن كەلەسى قادامداردى ناقتىلادىق. الداعى ۋاقىتقا جوسپاردى بىرلەسە قۇردىق. كوۋچينگ سەسسيالارى كەزىندەگى تالقىلاۋلاردا ارىپتەستەرىمىز تاجىريبەلەرىندە كەزدەسكەن قيىندىقتارى مەن ماسەلەلەرى بويىنشا جاۋاپ ىزدەۋدە ەرەكشە بەلسەندىلىك تانىتتى. ءبىلىم سالاسىنداعى وزگەرىسكە بەيىم, ىنتالى ۇجىممەن بىرلەسكەن جۇمىس جالعاسىن تابادى, – دەيدى نازارباەۆ زياتكەرلىك مەكتەبىنىڭ قازاق ءتىلى مەن ادەبيەتى ءپانى مۇعالىمى جانساۋلە ماقسوتوۆا.
NIS مۇعالىمدەرى جانىبەك ەلدى مەكەنىنىڭ مۇراجايىمەن, سونداي-اق وقۋشىلاردىڭ جەتىستىكتەرى كورسەتىلگەن كورمەمەن تانىستى. اۋداننىڭ تاريحي-ولكەتانۋ مۇراجايى مەن ەلدەگى قاستەرلى ورىندارمەن تانىسۋ مۇمكىندىگىنە يە بولدى.
ارىپتەستەرىمىز ودان ءارى قولداۋ جۇمىستارىن سىرىم اۋدانىندا جالعاستىردى. الدىمەن, «Bookcrossing» اكتسياسى بويىنشا سىرىم اۋدانىنىڭ قادىر مىرزاليەۆ اتىنداعى جالپى ورتا ءبىلىم بەرەتىن مەكتەبىنە 100 كىتاپ تارتۋ ەتىلدى. كىتاپ قورىن تولتىرۋ سالتاناتىنان سوڭ, اۋىل ۇستازدارى قازاق ءتىلى, اعىلشىن ءتىلى, فيزيكا, حيميا, ينفورماتيكا پاندەرىنەن اشىق ساباق وتكىزدى. سونىمەن قوسا «قارىم-قاتىناستاعى ەموتسيونالدى مادەنيەتتىلىكتى قالىپتاستىرۋ» اتتى پسيحولوگيالىق سەمينار-ترەنينگ پەن كىتاپحانا ءىسى بويىنشا تاجىريبە جۇمىستارى ءوتتى. NIS كومانداسى تىرەك مەكتەپ مۇعالىمدەرىنىڭ جۇمىستارىنا تولىقتاي تالداۋ جاساپ, «FILA» ءادىسى ارقىلى كەرى بايلانىس الدى. پەداگوگيكالىق باسقوسۋ بارىسىندا قاجەتتى وزگەرىستەر اشىق ايتىلىپ, قوس مەكتەپ ۇستازدارى بىرلەسە ساباق جوسپارىن قۇردى. كەلەسى ايلاردا زياتكەرلىك مەكتەپ مۇعالىمدەرى بوكەي وردا اۋدانىنداعى س.باباجانوۆ اتىنداعى ءبىلىم ورداسىنا بارادى.
قاي سالانىڭ بولسىن وركەندەۋ جولىندا مامانداردىڭ ءبىر-بىرىمەن پىكىر الماسىپ, تاجىريبە بولىسكەنى اسا ماڭىزدى. وسى ورايدا, نازارباەۆ زياتكەرلىك مەكتەپتەرى ءبىلىم جۇيەسىندەگى تيىمدىلىكتى ءبولىسۋ ءىس-شارالارى – ۇتىمدى ءۇردىس. بۇعان اۋىلداعى ءبىلىم وشاقتارىنىڭ كەرى بايلانىس ورناتۋى مەن كورسەتىپ جاتقان ناتيجەلەرى دالەل بولا الادى.
كەمەلدى كەلەشەككە ۇلەسكەر بىردەن-ءبىر تۇلعا – ۇستاز دەسەك, مۇعالىمدەر ءبىرىن-ءبىرى تولىقتىرىپ, بىرگە دامۋعا ءتيىس. اتالعان جوبا وڭ ناتيجەسىن بەرىپ جاتىر. الداعى ۋاقىتتا وزگە دە ونەگەلى ىستەر جالعاسىن تابارىنا كامىل سەنەمىن.
ءاليا ماقسوتقىزى,
ورال قالاسى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىنىڭ فيزيكا ءپانىنىڭ مۇعالىمى
