فوتو: polisia.kz
«پروفيلاكتيكالىق ءىس-شارالار وتكىزۋ بارىسىندا شقو پد ۇيىمداسقان قىلمىسقا قارسى كۇرەس باسقارماسىنىڭ جەدەل ۋاكىلدەرى 21 جاستاعى ازاماتتان 100 مىڭ تەڭگە كولەمىندە اقشالاي قاراجاتتى بوپسالاۋ فاكتىسىن انىقتاعان. حابارلاما كەلىپ تۇسكەننەن كەيىن پوليتسەيلەر دەرەۋ تەكسەرۋگە كىرىستى. بارلىق جەدەل-ىزدەستىرۋ ءىس-شارا كەشەنىن وتكىزگەننەن كەيىن, اقشالاي قاراجاتتى الۋ كەزىندە نازارباەۆ داڭعىلىنداعى اۋلالاردىڭ بىرىندە قىلمىس جاساعان 20 جاستاعى كۇدىكتى ۇستالدى. وقيعا ورنىندا ءتارتىپ ساقشىلارى ونىڭ زاڭسىز ارەكەتىن راستايتىن زاتتاي ايعاقتار – اقشانى تاركىلەدى», دەلىنگەن اقپاراتتا.
كۇدىكتى جابىرلەنۋشىمەن بىرنەشە مارتە جولىعىپ, قارۋ كەزەنىپ قورقىتۋ ارقىلى اقشا تالاپ ەتكەن. كەپىلزات رەتىندە جەكە كۋالىگىن دە الىپ كەتكەن. جەدەل ۋاكىلدەر قارۋدى كۇدىكتىنىڭ تۋىسىنان تاركىلەگەن. قىلمىستىق كودەكستىڭ 194-بابى 2-بولىگى بويىنشا سوتقا دەيىنگى تەرگەۋ جۇرگىزىلىپ جاتىر. بوپسالاۋشى 7 جىلعا دەيىن باس بوستاندىعىنان ايىرىلۋى مۇمكىن.
