بايقاۋ شىمىلدىعىن اقسۋ جانە ەكىباستۇز قالالارىنىڭ ونەرپازدارى ءتۇردى. ونەر سايىسىن ۇيىمداستىرۋشى, «شاڭىراق» وبلىستىق ورتالىعىنىڭ ديرەكتورى زاميرا سولتانوۆا ونەرپازدارعا ساتتىلىك تىلەپ, جالپى جوبانىڭ ءوڭىر ونەرپازدارىنىڭ اراسىنداعى شىعارماشىلىق بايلانىستى نىعايتا تۇسۋدە ماڭىزى زور ەكەنىن اتاپ ءوتتى.
«ونەر دوداسى» بايقاۋى ءوڭىر-ءوڭىردى جارىستىرۋدى عانا ەمەس, تابىستىرۋدى كوزدەيدى. قازاق «ەل ءىشى – ونەر كەنىشى» دەگەن. سول كەنىشتى اقتارىپ, حالىق الدىنا ۇسىنساق, تالاپتى جانداردىڭ تالانتىن ۇشتاساق دەگەن نيەتتەن وسى ءبىر سايىس باستاۋ الدى. سوندىقتان ءار ونەر قۇراماسى تاجىريبەلى ونەر يەلەرىمەن بىرگە بۇرىن-سوڭدى ۇلكەن ساحناعا شىقپاعان جاستاردى دا بايگەگە قوسا الدى دەگەن سەنىمدەمىز», دەدى ول.
بايقاۋعا اقسۋ, ەكىباستۇز قالالارى جانە اقتوعاي, اققۋلى, باياناۋىل, ەرتىس, جەلەزين, ماي, پاۆلودار, تەرەڭكول, ۋسپەن, شارباقتى اۋداندارى, سونىمەن بىرگە پاۆلودار قالاسىنىڭ اۋىلدىق ايماقتارى مەن مايقايىڭ كەنتىنىڭ ونەرپازدارىنان قۇرالعان 14 ونەر قۇراماسى قاتىستى. شارت بويىنشا قاتىسۋشىلار جەتى باعىتتا: ءداستۇرلى ءان, تەرمە, كۇي, ايتىس, حالىقتىق انسامبل, سيرەك كەزدەسەتىن ۇلتتىق اسپاپ, حالىقتىق بي بويىنشا سىنعا ءتۇستى.
سايىس جەكپە-جەك فورماتىندا ۇيىمداستىرىلىپ, جەتى كەزەڭدەگى سايىسكەرلەردىڭ ونەرىنە جەرگىلىكتى مادەنيەت قايراتكەرلەرى, وڭىرگە تانىمال اقىندار مەن سازگەرلەر, ءانشى-كۇيشىلەر قازىلىق ەتىپ, باعا بەردى.
اقتىق سىندا كورەرمەن قاۋىم ۋسپەن مەن اققۋلى اۋداندارىنىڭ تاماشا ونەرىنە كۋا بولدى. ناتيجەسىندە, العاشقى اتالعان قۇرامانىڭ دوداعا تىڭعىلىقتى دايىندىقپەن كەلگەنى بەلگىلى بولدى. قازىلار القاسىنىڭ شەشىمىمەن ۋسپەن اۋدانى ونەر سىنىنىڭ جەڭىمپازى اتانىپ, باس جۇلدەگە تىگىلگەن 1 ملن تەڭگەنى ولجالادى. ال ەكىنشى ورىن اققۋلى اۋدانىنىڭ ەنشىسىنە جازىلسا, باياناۋىل اۋدانى مەن مايقايىڭ كەنتى ءۇشىنشى ساتىدان كورىندى.
وڭىرلىك مادەنيەت, تىلدەردى دامىتۋ جانە ارحيۆ ءىسى باسقارماسىنىڭ باسشىسى مەدەت تاۋاسقان اتاپ وتكەندەي, جوبا ماقساتىنا جەتتى. كەلەر جىلى «ونەر دوداسىنىڭ» اۋقىمىن, جۇلدە قورىن دا كوبەيتۋ ويدا تۇر. «ەلدىڭ ابىرويىن اسقاقتاتاتىن سالا – ونەر. ال ونەر ادامىنا قولداۋ كورسەتۋ ءسىز بەن ءبىزدىڭ باستى مىندەتىمىز بولۋعا ءتيىس. بيىل جەتى باعىت-كەزەڭدى تەڭ تارتا الماعان وڭىرلەردىڭ مادەنيەت سالاسىنىڭ باسشىلارى مەن اكىمدىكتەرى كەمشىلىكتەرىمەن جۇمىس ىستەيدى دەپ سەنەمىز. ۇلتتىق ونەرگە قولداۋ كورسەتكەن اۋدان باسشىلارى بۇگىن سونىڭ جەمىسىن كوردى», دەيدى ول.
پاۆلودار
