فوتو: Polisia.kz
پەتروپاۆلداعى ساۋدا جەلىسىنىڭ ديرەكتورى وزىنە اقشا بوپسالاۋشىلاردىڭ قىسىم كورسەتكەنى تۋرالى ارىز جازعان. جەدەل ءىس-شارانى ىسكە اسىرعان پوليتسيا قىزمەتكەرلەرى ەكى تۇرعىندى ۇستادى.
«33 جانە 34 جاستاعى ەكى جاس جىگىت الەۋمەتتىك جەلىلەردە تۇتىنۋشىلاردىڭ قۇقىقتارىن قورعاۋعا ارنالعان رەسۋرستاردىڭ اۆتورلارى رەتىندە كوپشىلىك اراسىندا جاقسى تانىس. 2022 جىلدىڭ باسىنان باستاپ تۇتىنۋشىلاردىڭ قۇقىقتارىن قورعاۋدى ۇران ەتكەن ەر ادامدار پەتروپاۆلدىڭ ساۋدا نۇكتەلەرىندە رەيدتەر جۇرگىزىپ وتىرعان. بلوگەرلەر رەتىندە ساۋدا جەلىسى قىزمەتكەرلەرىنىڭ قاتىسۋىمەن ارانداتۋشىلىق سيپاتىنداعى بەينەروليكتەر ءتۇسىرىپ, پوليتسيا مەن وزدەرى اراسىندا جانجالدى جاعدايلار جاساپ وتىرعان. الايدا ولار جەلىدەگى اۋديتوريا اراسىندا زور تانىمالدىققا يە بولماعان. YouTube ارناسى مەن Instagram جەلىسىندە بىرنەشە مىڭ جازىلۋشىسى بار, كوپشىلىگى سقو تۇرعىندارى. ارانداتۋشىلىق پەن جانجالدار كەزىندە مەرزىمى وتكەن ءونىمدى ساتۋ فاكتىسىن جەلەۋ ەتىپ جۇرگەن. الايدا كەي جاعدايلاردا — شوكولاد, سۋسىندار سياقتى تاۋارلاردىڭ اقشاسىن تولەمەي وزدەرىمەن بىرگە الىپ كەتىپ وتىرعان. كۇدىكتىلەر رەيدتىك شارالارىمەن بىرگە مەملەكەتتىك ورگاندارعا ساۋدا ورىندارىندا انىقتالعان زاڭ بۇزۋشىلىقتار تۋرالى شاعىمداردى جىبەرگەن. وسىنداي ارەكەتتەرى ارقىلى بيزنەستى جوسپاردان تىس تەكسەرۋگە سەبەپشى بولدى. قىركۇيەك ايىنىڭ باسىندا جاستار بوپسالاۋ ارقىلى ساۋدا جەلىسىنىڭ وڭىرلىك ديرەكتورىنان ءوز ارەكەتتەرىن توقتاتۋعا 50 ملن تەڭگە سوماسىندا اقشا تالاپ ەتە باستاعان», دەلىنگەن اقپاراتتا.
وبلىستىڭ ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى بوپسالاۋشى «بلوگەرلەردى» 5 ميلليون تەڭگە مولشەرىندەگى اقشانى العان كەزدە ۇستاعان. ۇستالعانداردىڭ ۇستىنەن قىلمىستىق كودەكستىڭ 194-بابى 2-بولىگى 2-تارماعى بويىنشا سوتقا دەيىنگى تەرگەۋ باستالدى.
