كەزدەسۋدى يرلانديا پارلامەنتىنىڭ قولداۋىمەن ەقىۇ دياقب ۇيىمداستىرىپ وتىر. كەزدەسۋگە يرلانديا پارلامەنتى پالاتالارىنىڭ دەپۋتاتتارى, ونىڭ ىشىندە مۇگەدەكتىك ماسەلەلەرى جونىندەگى كوميتەتتىڭ توراعاسى قاتىستى. مۇگەدەكتىگى بار ادامداردىڭ قۇقىقتارى ماسەلەلەرىن دامۋ جانە حالىقارالىق قاتىناستار ساياساتىنا ەنگىزۋ, سونداي-اق ەقىۇ ەلدەرى پارلامەنتتەرىنىڭ ينكليۋزيانى باعالاۋ ادىستەمەسى جانە مۇگەدەكتىگى بار ادامداردىڭ ساياسي ىسكە قاتىسۋىن ىلگەرىلەتۋ جونىندە پارلامەنتتەرگە ارنالعان وقۋ كۋرسىن ازىرلەۋ جايى تالقىلاندى.
سەناتور قالتاەۆا ءوز كەزەگىندە قازاقستاننىڭ سايلاۋ قۇقىقتارىن ىسكە اسىرۋ جونىندە مۇگەدەكتىگى بار ادامداردىڭ تەڭ مۇمكىندىكتەرىن قامتاماسىز ەتۋ سالاسىنداعى زاڭنامانى جەتىلدىرۋ تاجىريبەسى تۋرالى ايتىپ بەردى. ول وسىعان بايلانىستى سايلاۋ ۋچاسكەلەرىنىڭ قولجەتىمدىلىگىن قامتاماسىز ەتۋ, ايەلدەرگە, جاستارعا جانە مۇگەدەكتىگى بار ادامدارعا 30 پايىز كۆوتا ەنگىزۋ تۋرالى كەزدەسۋگە قاتىسۋشىلاردى حاباردار ەتتى. ول سونداي-اق «سايلاۋ تۋرالى» جانە «ساياسي پارتيالار تۋرالى» زاڭدارعا وزگەرىستەر ەنگىزىلگەننەن كەيىن پارلامەنت ماجىلىسىنە – 6, ال بارلىق دەڭگەيدەگى ماسليحاتتارعا 71 مۇگەدەكتىگى بار دەپۋتات سايلانعانى تۋرالى اقپارات بەردى.
«بۇل دەرەكتەر, ساياسي رەفورمالار بارلىق ازاماتتاردىڭ, سونىڭ ىشىندە مۇگەدەكتىگى بار جانداردىڭ قۇقىقتارىنا اسەر ەتكەنىن كورسەتەدى. سەناتتا مۇگەدەكتىگى بار وتانداستارىمىزدىڭ وزەكتى ماسەلەلەرىن تالقىلاۋ, زاڭنامالىق دەڭگەيدە شەشىمدەر ازىرلەۋ جانە ولاردىڭ ورىندالۋىن باقىلاۋ الاڭى بولىپ تابىلاتىن ينكليۋزيا جونىندەگى كەڭەس قۇرىلدى», دەپ اتاپ ءوتتى ءلاززات قالتاەۆا.
