ولگا پەرەپەچينا فورۋمدا سويلەگەن سوزىندە ايەلدەردىڭ ەكونوميكالىق الەۋەتىن دامىتۋ, زورلىق-زومبىلىققا قارسى كۇرەس جانە ەۋروپالىق وداقپەن ىنتىماقتاستىقتىڭ باسىمدىقتارى تۋرالى ايتتى. دەپۋتات ورتالىق ازيا ايەلدەرىنىڭ ديالوگ تۇعىرناماسىنىڭ ماڭىزدىلىعىنا توقتالا كەلە, الاڭنىڭ قازاقستانداعى جۇمىسىنىڭ ناتيجەلەرىن اتاپ ءوتتى.
«قازاقستاننىڭ دەموگرافيالىق قۇرىلىمىندا ايەلدەر حالىقتىڭ 51 پايىزىن قۇرايدى. ەڭبەك نارىعىنداعى ايەلدەردىڭ ۇلەسى شامامەن 48 پايىز بولىپ وتىر. بۇگىندە ءبىزدىڭ رەسپۋبليكامىزدا ءبىلىم بەرۋ, دەنساۋلىق ساقتاۋ جانە الەۋمەتتىك قورعاۋ سالاسىنداعى جالدامالى قىزمەتكەرلەردىڭ 70 پايىزدان استامى ايەل. جالپى, گەندەرلىك تەڭدىك سالاسىنداعى حالىقارالىق رەيتينگتەردە ءبىزدىڭ ەلىمىز ىلگەرىلەۋدىڭ وڭ ۇردىسىنە يە. سونداي-اق پرەزيدەنتتىڭ تاپسىرماسى بويىنشا مەملەكەت قاتىساتىن كومپانيالارداعى باسشىلىق لاۋازىمدارعا ايەلدەردىڭ 30 پايىز وكىلدىگىن ەنگىزۋ ايەلدەردى ساياسي ىلگەرىلەتۋ باعىتىنداعى ماڭىزدى قادام بولدى», دەدى ولگا پەرەپەچينا.
سەناتور مەملەكەت باسشىسى قاسىم-جومارت توقاەۆتىڭ گەندەرلىك ساياساتتى ىسكە اسىرۋ ماسەلەلەرىنە باسا نازار اۋدارىپ وتىرعانىن اتاپ ءوتتى. سەناتور وتباسىلىق-دەموگرافيالىق جانە گەندەرلىك ساياسات تۇجىرىمداماسى 2016 جىلى قابىلدانعانىن, ال 2021 جىلى پرەزيدەنتتىڭ تاپسىرماسى بويىنشا ماڭىز بەرىلگەنىن حابارلادى.
«بيىلعى ماۋسىم ايىندا قازاقستان پرەزيدەنتى قاسىم-جومارت توقاەۆتىڭ تاپسىرماسى بويىنشا ورنىقتى دامۋ سالاسىنداعى ماقساتتار مەن مىندەتتەردى مونيتورينگىلەۋ جونىندەگى پارلامەنتتىك كوميسسيا قۇرىلدى. كوميسسيانى سەنات توراعاسى ماۋلەن اشىمباەۆ باسقارادى. پارلامەنت ورنىقتى دامۋ ماقساتتارىن ىسكە اسىرۋ ماسەلەسىن ءوز باقىلاۋىنا الدى, وعان گەندەرلىك تەڭدىكتى قامتاماسىز ەتۋگە جانە بارلىق ايەلدەر مەن قىزداردىڭ قۇقىقتارى مەن مۇمكىندىكتەرىن كەڭەيتۋگە باعىتتالعان 5 ماقسات كىرەدى», دەپ اتاپ ءوتتى دەپۋتات.
فورۋم بارىسىندا قاتىسۋشىلار ايەلدەردىڭ ەكونوميكالىق الەۋەتىنىڭ ءوسۋى, گەندەرلىك زورلىق-زومبىلىققا قارسى كۇرەس, گەندەرلىك تەڭدىك سالاسىنداعى زاڭنامانى جەتىلدىرۋ, كليماتتىڭ وزگەرۋى, سونداي-اق ەو-مەن پارلامەنتتىك ىنتىماقتاستىق سەكىلدى تاقىرىپتاردى تالقىلاۋدى جوسپارلادى.
