فوتو: parlam.kz
«پرەزيدەنت ماڭعىستاۋ وبلىسىنا بارعان ساپارىندا قاجەتتى 34 ناقتى تاپسىرما بەرگەن بولاتىن. سول تاپسىرما بويىنشا ماڭىزدى ءىس-شارالار جوسپارى بەكىتىلدى. ماڭعىستاۋ وبلىسىندا وسى جىلى ءبىر ەمەس ءۇش رەت ءىسساپاردا بولعانىڭىزبەن, وڭىردە پرەزيدەنت تاپسىرمالارىنىڭ ورىندالۋ ناتيجەسى ماردىمسىز. بۇگىنگى كۇندە سول تاپسىرمانىڭ تەك بەسەۋى عانا ىسكە اسىرىلىپ وتىر. قالعان 29 ءىس-شارا توقتاپ تۇر. ونىڭ ىشىندە ونەركاسىپ پەن قۇرىلىس مينيسترلىگىنە بەرىلگەن التى تاپسىرما, «سامۇرىق-قازىناعا» قاتىستى ءۇش تاپسىرما, «بايتەرەك» ۇلتتىق باسقارۋشى حولدينگىنە جۇكتەلگەن ءبىر تاپسىرما, ۇلتتىق ەكونوميكا مينيسترلىگىنە تيەسىلى جەتى, اۋىلشارۋاشىلىعى مينيسترلىگى اتقارۋى ءتيىس ەكى تاپسىرما دا ورىندالماعان. اتاپ ايتقاندا, اقتاۋ – فورت شەۆچەنكو, تاۋشىق – شەتپە جولدارىنىڭ جانە قۇيىلىس – اقتاۋ سۋ جەلىسىن سالۋ, تۋريزم ءۇشىن كاسپيدىڭ جاعالاۋىن دامىتۋ سەكىلدى ماڭىزدى جوبالار. وسىلاي ءتىزىمدى جالعاي بەرۋگە دە بولادى», دەدى ءماجىلىس دەپۋتاتى.
س.مۇساباەۆ توقتاپ قالعان وندىرىستەردى جانداندىرۋ جونىندە جۇكتەلگەن تاپسىرمالار دا ىسكە اسپاعانىن ايتتى. جۇمىسسىزدىق كۇن ساناپ ارتقان جەتىبايدا ىستەپ تۇرعان ارماتۋرا شىعاراتىن تسەح «سامۇرىق-قازىنا» مەن «قازمۇنايگازدىڭ» كەدەرگى كەلتىرۋىنەن توقتاپ قالعانىن جەتكىزدى. بۇل پرەزيدەنتتىڭ بيزنەستى قولداۋ جونىندەگى تاپسىرماسىن ورىنداۋعا قارسى سابوتاج ەمەس پە دەگەن ساۋالىن كولدەنەڭ تارتتى. ۇكىمەت باسشىسىنا مەملەكەتتىك جانە كۆازيمەملەكەتتىك مەكەمە باسشىلارىنان ەسەپ الۋدى, اتقارىلماعان تاپسىرما بويىنشا ناقتى شارانى ىسكە اسىرۋدى, بيۋدجەتتەن ءتيىستى قاراجات قاراستىرۋدى, ءار توقسان سايىن اتقارىلعان جۇمىس جونىندەگى ەسەپتى ماجىلىسكە جولداۋ جولعا قويىلۋى ءتيىس ەكەنىن ايتتى.
