قاراشا ايىنىڭ ورتاسىندا وتەتىن ونەر بايگەسىن تۇرىكمەنستاننىڭ مادەنيەت مينيسترلىگى مەن تۇركسوي حالىقارالىق ۇيىمى بىرلەسىپ ۇيىمداستىرىپ وتىر. ونداعى ماقسات ۇلتتىق تەاتر ونەرىن دامىتۋ جانە تەاترلاردىڭ شىعارماشىلىق باستامالارىن ىنتالاندىرۋ ەكەنىن العا تارتۋدا. سونداي-اق تۇركى حالىقتارىنىڭ باسىن ءبىر شاڭىراق استىنا قوسىپ, مادەنيەت ۇندەستىگىن ناسيحاتتاۋ. نەگە دەسەڭىز, تەاتر ارتىستەرى ءوزارا شىعارماشىلىق بايلانىستا بولىپ, ەل مەن جەردىڭ مادەني ومىرىنە بويلاۋى ماڭىزدى. وسىلايشا, الەمدىك ساحناعا جول اشىلماق.
اتالعان فەستيۆالدىڭ باستى تالاپتارىنىڭ ءبىرى قاتىسۋشى تەاترلاردان ۇسىنىلعان قويىلىم كلاسسيكالىق نەمەسە ۇلتتىق شىعارمادان بولۋعا ءتيىس. وڭىرلىك تەاتر قازاق ادەبيەتىنىڭ كلاسسيگى, ۇلى جازۋشى مۇحتار اۋەزوۆتىڭ «قورعانسىزدىڭ كۇنى» شىعارماسىنىڭ جەلىسىمەن ساحنالانعان قويىلىمدى ۇسىنىپ, قازاق ەلىنىڭ نامىسىن قورعايدى. سپەكتاكلدىڭ قويۋشى-رەجيسسەرى – فارحاد مولداعالي.
«قورعانسىزدىڭ كۇنى» شىعارماسى بيكەن ريموۆا اتىنداعى تالدىقورعان دراما تەاترىنىڭ رەپەرتۋارىنداعى شوقتىعى بيىك قويىلىمداردىڭ ءبىرى. سپەكتاكلدە اۆتور بايىرعى قازاق اۋىلىنداعى كەدەيلەر ءومىرىنىڭ ءبىر كورىنىسىن تامىر-تەرەڭىنەن قوپارىپ اكەلىپ, قورعانسىز جانداردىڭ تۇرمىس-تىرشىلىگىندەگى جان تۇرشىگەرلىك ازاپ پەن اۋىرتپالىقتى اسا شىنشىلدىقپەن اسەرلى باياندايدى.
حالىقارالىق فەستيۆالعا تاتارستان, قىرعىزستان, وزبەكستان, تاجىكستان, تۇرىكمەنستان مەملەكەتتەرىنەن تەاتر ۇجىمدارى قاتىسادى. ايتا كەتۋ كەرەك, بيكەن ريموۆا اتىنداعى تالدىقورعان دراما تەاترى – ەلىمىزدەن العاش رەت قاتىساتىن وبلىستىق تەاتر.
جەتىسۋ وبلىسى
