استانادا ماسا مەن شىبىن-شىركەيگە قارسى كۇرەس كۇشەيتىلدى

سۋ ايدىندارىن وڭدەۋدىڭ العاشقى كەزەڭى ءساۋىر ايىنىڭ باسىندا باستالعان. قازىرگى تاڭدا جۇمىستار ەكى اۋىسىمدا جۇرگىزىلىپ جاتىر. 150-دەن استام دەزينسەكتور مامان ماسانىڭ دەرناسىلدەرى انىقتالعان 8600 گەكتار سۋ ايدىنىن وڭدەگەن.

مامانداردىڭ مالىمەتىنشە, دەزينسەكتسيا كەزىندە زاماناۋي تەحنيكالار قولدانىلادى. اتاپ ايتقاندا, مەحانيكالىق روتورلى بۇرىككىشتەر, ارنايى دەزينسەكتسيالىق كولىكتەر, قامىستى جانە جەتۋى قيىن ايماقتاردى وڭدەۋگە ارنالعان كۆادروكوپتەرلەر, ال ءىرى سۋ ايدىندارىندا ارنايى جابدىقتالعان قايىقتار پايدالانىلادى. وسىعان بايلانىستى قالا تۇرعىندارىنا ساقتىق شارالارىن قاتاڭ ۇستانۋ ەسكەرتىلدى.

سۋ ايدىندارىنداعى جۇمىستار اياقتالعان سوڭ, 27-29 ءساۋىر ارالىعىندا قالا اۋماعىن تولىق وڭدەۋ كەزەڭى باستالادى. بۇل جۇمىستار الدىمەن ورتالىقتان باستالىپ, كەيىن شەت ايماقتارعا قاراي ىعىستىرۋ ادىسىمەن جۇرگىزىلەدى. سونىمەن قاتار, قاتارلاس تۇردە قورعانىس توسقاۋىلدارى قويىلادى.

جاندىكتەرگە قارسى وڭدەۋ جۇمىستارى تۇنگى ۋاقىتتا – 21.00-دەن 04.00-گە دەيىن ەكى اۋىسىممەن ىسكە اسىرىلادى. ءاربىر كەزەڭ ايىنا 20 كۇنگە سوزىلادى, ال جالپى ناۋقان التى كەزەڭنەن تۇرادى. مامانداردىڭ ايتۋىنشا, جۇرگىزىلىپ جاتقان شارالار ناتيجەسىندە ماسالاردىڭ سانىن 90%-عا دەيىن ازايتۋ كوزدەلىپ وتىر.