الاماننىڭ العاشقى كۇنى مادەني كەشكە ارنايى قاتىسقان ءماجىلىس سپيكەرى ەرلان قوشانوۆ مەملەكەت باسشىسى قاسىم-جومارت توقاەۆتىڭ ەڭبەك ادامىنىڭ مارتەبەسىن كوتەرۋدى ۇنەمى ايتىپ جۇرگەنىنە ەرەكشە نازار اۋدارىپ, رەسپۋبليكا كۇنى قارساڭىندا 700-دەن استام قاراپايىم ەڭبەككەردى مەملەكەتتىك ناگرادامەن ماراپاتتاعانىن اتاپ ءوتتى. بۇل ادال دا تاباندى جۇمىسىمەن تاۋەلسىزدىگىمىزدىڭ تۇعىرىن بەكەمدەپ كەلە جاتقان ازاماتتارىمىزعا دەگەن قۇرمەت ەكەنىن اتاپ ءوتتى.
«بيىلعى «التىن دومبىرا» اقىندار ايتىسىنىڭ وزىندىك ءمانى بار. وندا ەڭبەك ادامدارىنىڭ ونەگەسى وزەك بولدى. سەبەبى بەرەكە مەن مولشىلىقتىڭ باستاۋى – ەڭبەكتە. ال ونىڭ يەسى دە, كيەسى دە – قاراپايىم ەڭبەك ادامدارى. وسى رەتتە مەملەكەت باسشىسى «ادال ازامات» ۇعىمىن قوعام ساناسىنا ءسىڭىرۋدى ۇسىندى. اينالىپ كەلگەندە, مەملەكەتتى مەملەكەت, ەلدى ەل قىلىپ وتىرعان باي-باعلاندار ەمەس, قاتارداعى جۇمىسشىلار, مالشىلار, ديقاندار, ۇستازدار مەن دارىگەرلەر. قازىر ولارعا دەگەن قوعامنىڭ شىنايى قۇرمەتى ايرىقشا», دەدى ە.قوشانوۆ.
ايتىس تىزگىنىن ۇستاعان بەلگىلى اقىن, ءماجىلىس دەپۋتاتى امانجول ءالتاي كوپشىلىك كورەرمەنگە قازىلار القاسىنىڭ قۇرامىن جانە اقىندار قاۋىمىن تانىستىرا كەلە: «ايتىس – ۇرپاقتان-ۇرپاققا اكەنىڭ قانى, انانىڭ سۇتىمەن جەتكەن قاستەرلى ونەر. بۇگىن ەلوردا تورىندە ەڭبەك ادامىنىڭ قادىر-قاسيەتىن, ولاردىڭ قوعامداعى ايرىقشا ورنىن جىرعا قوسامىن دەپ ويى ورەلى, ءسوزى سۇبەلى ايتۋلى اقىندار باس قوسىپ وتىر. بارشاڭىزعا ساتتىلىك تىلەيمىن», دەدى.
ەكى كۇنگە سوزىلعان الامان ايتىستا ەلىمىزدىڭ تۇكپىر-تۇكپىرىنەن جينالعان 16 اقىن ونەر كورسەتىپ, كىل جۇيرىكتە كىم جۇيرىك ەكەنىن انىقتادى. جارىس سوڭىندا ءداستۇرلى دودانىڭ ءمانى مەن ماڭىزىنا توقتالعان «Amanat» پارتياسىنىڭ اتقارۋشى حاتشىسى داۋلەت كارىبەك پارتيا تاراپىنان الداعى ۋاقىتتا دا مادەنيەت پەن ونەرگە بارىنشا قولداۋ كورسەتىلە بەرەتىنىن جەتكىزدى. «مەملەكەت باسشىسى قاسىم-جومارت توقاەۆ ەڭبەك ادامىنىڭ مارتەبەسىن كوتەرۋدى ۇنەمى ايتىپ كەلەدى. ەسىلدىڭ جاعاسىندا ەكى كۇن بويى ەرەكشە ونەر كورسەتكەن اقىندارىمىز ەڭبەك ادامىنىڭ ابىرويىن اسقاقتاتىپ, ولاردىڭ ەل دامۋىنا قوسىپ جاتقان ولشەۋسىز ۇلەسىن جىرعا قوستى. ەلدى كوركەيتەتىن – ەڭبەك. ايتىس دەپ اتالاتىن اسىل ونەرىمىز توردەن تۇسپەسىن», دەدى ول.
ءوز كەزەگىندە مادەنيەت جانە اقپارات ۆيتسە-ءمينيسترى ارمان جۇدەباەۆ جىر دوداسىن تاماشالاۋعا كەلگەن قالىڭ كورەرمەن مەن اقىندار قاۋىمىنا شىنايى العىسىن ءبىلدىردى. «قازاق حالقى ەجەلدەن ايتىس ونەرىن جوعارى باعالاعان. ەل ىشىندەگى جاقسىلىقتى دا, كەمشىلىكتى دە ءسوز ارقىلى شەبەر جەتكىزىپ وتىرعان. مىنە ەكى كۇنگە سوزىلعان الامان ايتىستا ءبىزدىڭ ارقالى اقىندارىمىز دا ءوز شەبەرلىكتەرىن ورتاعا سالىپ, ەڭبەك ادامىنىڭ مارتەبەسىن اسىرىپ, مەرەيىن ۇستەم ەتتى. ولاردى قولداپ, قوستاپ كەلىپ وتىرعان بارشا ايتىسسۇيەر اعايىنعا راحمەت ايتامىن», دەدى ۆيتسە-مينيستر.
«ۇندەمەسەم وزىمە ءوزىم تورە, سويلەپ كەتسەم وزىمە ءسوزىم تورە», دەيدى قازاق حالقى. سول سوزگە بۇگىن ءادىل باعاسىن بەرگەن قازىلار القاسىنىڭ ارى تازا دەگەن ويدامىن. كۇمىس كومەيىنەن جاقۇتتاي جىر توككەن اقىندارىمىزعا شالقار شابىت تىلەيمىن. ۇلتتىق ونەرىمىزدىڭ بەدەلى بيىك, ابىرويى اسقاق بولعاي», دەگەن قازىلار القاسىنىڭ توراعاسى, قازاقستاننىڭ حالىق اقىنى ءاسيا بەركەنوۆا اقىنداردىڭ ونەرىن باعالاۋدا ادەپتەن وزباي, اردان اتتاماي ءادىل شەشىم بولعانىن اتاپ ءوتتى.
وسىلايشا قازىلار القاسىنىڭ شەشىمىمەن جارىستىڭ باس جۇلدەسىن قاراعاندىلىق اقىن ماقسات احانوۆ يەلەنىپ, وعان «التىن دومبىرا» مەن اۆتوكولىك تابىستالدى. ال جۇلدەلى 1-ورىن جانە «ايتىس اقتاڭگەرى» اتاعى قىزىلوردالىق مەيىربەك سۇلتانحانعا, 2-ورىن پاۆلودارلىق اسپانبەك شۇعاتايعا بۇيىردى. 3-ورىندى ۇلىتاۋلىق تولەگەن جامانوۆ پەن باتىس قازاقستان وبلىسىنان كەلگەن جانسايا مۋسينا ءوزارا ءبولىستى.
سونداي-اق, جامبىلدىق الينا ايدارالى, باتىس قازاقستان وبلىسىنىڭ ايتىسكەرى مۇرادىم مەيرلانوۆ جانە الماتىلىق شۇعايىپ سەزىمحان ارنايى جۇلدە يەلەندى. سايىسقا تۇسكەن بارشا اقىنعا قوماقتى سىي-سياپات تابىستالدى.
