قوستاناي وبلىسى پد وقيعانىڭ ءمان-جايىن حابارلادى.
«12 قاراشادا قارابالىق اۋدانىندا پوليتسيا قىزمەتكەرلەرى ساعات 21:00-دە الماتى – ەكاتەرينبۋرگ اۆتوجولىندا, پريۋرالسك كەنتىنىڭ اۋماعىندا گاباريتتىك شامدارىن قوسپاي ءجۇرىپ كەلە جاتقان ۋاز اۆتوكولىگىن بايقادى. بۇل جاعدايدا جۇرگىزۋشىنىڭ مىنەز-قۇلقى پوليتسيا قىزمەتكەرلەرىنە كۇدىك تۋدىردى. پوليتسەيلەردىڭ كولىك قۇرالىن توقتاتۋ تۋرالى زاڭدى تالابىنا جۇرگىزۋشى جاۋاپ بەرمەدى جانە ءرولدى باسقارا الماي, كيۋۆەتكە شىعىپ كەتتى. سونداق-اق جۇرگىزۋشى قاشپاق بولىپ, ءتارتىپ ساقشىلارىنا قاراي بىرنەشە رەت قارۋمەن وق اتقان. كولىكتى تاستاپ, جۇرگىزۋشى وقيعا ورنىنان قاشىپ, قارۋدى وزىمەن بىرگە الىپ كەتتى. اۋدان اۋماعىندا «سيرەنا» جوسپارى جاريالانىپ, جەكە قۇرام دابىل بويىنشا كوتەرىلدى.
قوستاناي وبلىسى پد ارنايى بولىمشەسىنىڭ قاتىسۋىمەن وتكەن ىزدەستىرۋ ءىس-شارالارى بارىسىندا اۋداننىڭ 35 جاستاعى تۇرعىنى ماس كۇيىندە, ءوزىنىڭ تانىسىنىڭ پاتەرىندە ۇستالدى.
قازىرگى ۋاقىتتا قر قك-ءنىڭ 380-1-بابى بويىنشا باستالعان سوتقا دەيىنگى تەرگەپ-تەكسەرۋ شەڭبەرىندە تەرگەۋ ءىس-شارالارى جۇرگىزىلىپ جاتىر. پوليتسيا قىزمەتكەرلەرى جاۋاپ رەتىندە قارۋ قولدانباعان, وقيعادا ەشكىم زارداپ شەككەن جوق. ءىس بويىنشا اڭشىلىق قوس ۇڭعىلى مىلتىق, پاتروندار مەن سپيرتتىك ىشىمدىكتەر تاركىلەندى. قازىرگى ۋاقىتتا قارۋ بالليستيكالىق ساراپتاماعا جىبەرىلدى. سول كۇنى قىلمىسكەر كۇدىكتى دەپ تانىلىپ, قارابالىق پوليتسيا ءبولىمىنىڭ ۋاقىتشا ۇستاۋ يزولياتورىنا قامالدى.
پوليتسەيلەر ۇستالعان ادام بۇرىن ءتارتىپ ساقشىلارىنىڭ كولىك قۇرالىن توقتاتۋ تۋرالى زاڭدى تالاپتارىن ەسكەرمەگەنى ءۇشىن اكىمشىلىك جاۋاپكەرشىلىككە تارتىلعانىن اتاپ ءوتتى. ۆەدومستۆودا تۇرعىندارعا پوليتسيا قىزمەتكەرلەرىنىڭ زاڭدى تالاپتارىنا باعىنباۋ فاكتىلەرى ءۇشىن اكىمشىلىك جانە قىلمىستىق جازا تۋرالى ەسكە سالادى.
