بايقاۋدى د.نۇرپەيىسوۆا اتىنداعى اكادەميالىق قازاق حالىق اسپاپتار وركەسترى ۇيىمداستىردى. وركەستر باسشىسى باقىتبەك سارتباەۆتىڭ ايتۋىنشا, ۇلى كومپوزيتوردىڭ كۇيشىلىك ونەرى جالعاسىن تابۋى قاجەت. سول سەبەپتەن, جاس تالانتتار مەن شەبەر ورىنداۋشىلاردى تابۋ, دارىندى ونەرپازداردىڭ كاسىبي شەبەرلىگىن ارتتىرۋ ماقساتى كوزدەلىپتى.
قازىلار القاسىنا جەتەكشىلىك ەتكەن تانىمال كومپوزيتور, قازاقستاننىڭ ەڭبەك سىڭىرگەن قايراتكەرى ايتقالي جايىموۆتىڭ ايتۋىنا قاراعاندا, دومبىراشىلار بايقاۋى جاڭا باعىتتا, جوعارى دەڭگەيدە وتكەن.
«دومبىراشىلارعا وزگەشە تالاپ قويىلدى. بۇل – بۇرىننان ءجيى ورىندالىپ جۇرگەن كۇيلەردى ەمەس, كەرىسىنشە, كوپ ەستىلمەي جۇرگەن تۋىندىلارعا كوبىرەك ءمان بەرۋ. مۇنداي تالاپ سيرەك ورىندالاتىن شىعارمالارعا جاڭا لەپ بەرىپ, كيەلى ساحناعا قايتا ورالۋىنا جول اشتى. ءبىزدىڭ كۇيشى بابالارىمىزدىڭ ءارتۇرلى تاقىرىپتى قامتيتىن شىعارمالارى وتە كوپ. سولاردىڭ بارلىعىن دەرلىك جاس ۇرپاققا دارىپتەپ, ءستيلى مەن ورىندالۋ ەرەكشەلىگىن كورسەتۋ قاجەت. سول سەبەپتەن, وسىنداي ءىس-شارالار كوبىرەك وتۋگە ءتيىس» دەيدى ا.جايىموۆ.
دومبىراشىلاردىڭ ورىنداۋشىلىق شەبەرلىگىن, ساحنا مادەنيەتىن ساقتاۋ مانەرىن سارالاعان قازىلار بايقاۋدىڭ باس جۇلدەسىنە الماتىلىق مەيىربەك ازىمباەۆتى لايىق دەپ تانىدى. وعان 1 ملن تەڭگە تابىس ەتىلدى.
ال اتىراۋ قالاسىنىڭ ونەرپازى اقبوكەن تەمىر ءبىرىنشى ورىننىڭ جۇلدەسى – 800 مىڭ تەڭگەنى يەمدەندى. ەكىنشى جۇلدەگە جەرگىلىكتى ەكى دومبىراشى – نۇرلىبەك ناجەكەنوۆ پەن نازەركە بازارباەۆا يە بولىپ, ارقايسىسىنا 600 مىڭ تەڭگە بەرىلدى. ءۇشىنشى ورىننىڭ 400 مىڭ تەڭگەسىن الماتىلىق ءلاززات اقيحات پەن نۇراي زينور يەلەندى.
اتىراۋلىق سەرىك الىبەكوۆكە بايقاۋدىڭ ءۇشىنشى ورنى, قۇرمانعازى اتىنداعى قازاق مەملەكەتتىك اكادەميالىق حالىق اسپاپتارى وركەسترiنىڭ ارنايى جۇلدەسى مەن اقشالاي سىيلىعى تابىستالدى. سونداي-اق قۇرمانعازى اتىنداعى ارنايى جۇلدەنىڭ 200 مىڭ تەڭگەلىك سىياقىسىمەن استانالىق قايرات جۇماعاليەۆ پەن الماتىلىق ارسەن تۇرسىن ماراپاتتالدى.
«مۇندا قازاقتىڭ بەلگىلى ونەر مايتالماندارىنىڭ الدىندا ونەر كورسەتۋ وڭاي بولمادى. بايقاۋداعى ءار كەزەڭنىڭ وزىندىك قيىندىعى بار. قوبالجىدىق, ۋايىمدادىق. وسىنداي سەزىمدى باستان كەشتىك. سونىڭ ءبارى ارتتا قالدى. باس جۇلدەگەر اتانىپ, قۋانىپ تۇرمىن. ەڭ باستىسى بۇل بايقاۋدا شەبەرلىك شىڭدادىق», دەيدى م.ازىمباەۆ.
اتىراۋ وبلىسى
