ورتوپەديا سالاسىنىڭ تانىمال مامانى ميرامبەك جۇماعۇلوۆتىڭ جەتەكشىلىگىمەن, ماسكەۋدەگى پريوروۆ اتىنداعى عىلىمي-مەديتسينالىق زەرتتەۋ ورتالىعى مامانى الەكسەي شۋمسكيدىڭ قاتىسۋىمەن العاش رەت ەلىمىزدە جالپى تىزە مەن جامباس بۋىندارىن ەندوپروتەزدەۋ, سونداي-اق تىزە بۋىنىن ءبىر ايدارشىقتى پروتەزدەيتىن العاشقى وپەراتسيالار جاسالدى. روبوتتىڭ كومەگىنە جۇگىنگەن كەزدە ءاربىر ناۋقاسقا جەكە ەمدەۋ ءتاسىلى ساقتالىپ, روبوت وپەراتسياعا دەيىن جاساندى بۋىننىڭ ءدال 3D-جوسپارى مەن يمپلانتتىڭ دۇرىس ولشەمىن جاساپ, ونى ورناتاتىن ورىندى تۋرا تاڭدايدى.
«3-7 قاراشا ارالىعىندا ءبىز ەندوپروتەزدەۋگە مۇقتاج 9 ناۋقاستى تاڭداپ, ەلىمىزدە روبوتتىڭ كومەگىمەن تىزە جانە جامباس بۋىندارىن اۋىستىرۋدىڭ العاشقى وپەراتسيالارىن جاسادىق. ۇمىتكەرلەردى ىرىكتەۋ بىرنەشە اي بويى ىجداعاتتىلىقپەن جۇرگىزىلدى. دارىگەرلەر كونسيليۋمى ءوتىپ, جاساندى بۋىندى ءدال 3D-جوسپارلاۋ ءۇشىن كت زەرتتەۋدىڭ تسيفرلىق ناتيجەلەرى اقش ماماندارىنا جىبەرىلدى. روبوتتىڭ ارقاسىندا وپەراتسيا الدىن الا جوسپارلانعانداي – 1 مم-دەن دە كەم قاتەلىكپەن جۇزەگە اسىرىلادى. سونداي-اق جۇمساق تىندەردىڭ ساقتالۋى بارىنشا قامتاماسىز ەتىلىپ, بايلام اپپاراتىنىڭ وڭتايلى تەپە-تەڭدىگىنە قول جەتكىزىلەدى», دەيدى الماتى №4 قكا حيرۋرگيا بولىمشەسىنىڭ مەڭگەرۋشىسى م.جۇماعۇلوۆ.
وسى ارادا «Stryker» كومپانياسى ۇسىنعان Mako تەحنولوگياسى دالىرەك ءارى بولجامدى حيرۋرگيالىق ناتيجە بەرىپ, ناۋقاستىڭ دەنساۋلىعىن تەز قالپىنا كەلتىرىپ, پروتەزدىڭ دە مەرزىمىن ۇزارتا الاتىنىنا توقتالا كەتكەن ءجون. Mako تەحنولوگياسىمەن ءبىر ايدارشىقتى ەندوپروتەز جاساتقان ناۋقاستار ونىڭ زاقىمى از ەكەنىن, قالپىنا ورالۋ مۇمكىندىگى تەز جانە جاساندى پروتەزدى ءوز بۋىنىنداي سەزىنگەندەرىن ايتادى.
«بۇگىندە مۇنداي تەحنولوگيا دامىعان ەلدەردە تانىمال, مۇنى اقش, كانادا, جاپونيا, كورەيانىڭ جەتەكشى كلينيكالارى قولدانىپ كەلەدى. الماتى قالاسى اكىمدىگىنىڭ قولداۋىمەن ءبىز قازاقستاندا روبوتتىڭ كومەگىمەن العاشقى تىزە جانە جامباس بۋىندارىن اۋىستىرۋ وپەراتسيالارىن جاسادىق. بۇل – يننوۆاتسيالىق ورتوپەديا ءۇشىن ءارى تراۆماتولوگيالىق-ورتوپەديالىق كومەكتى جەتىلدىرۋدىڭ جاڭا كەزەڭى. جىل سايىن مۇنداي وپەراتسيانى قاجەت ەتەتىن ناۋقاستار سانى ارتىپ كەلەدى. ماسەلەن, وسى جىلدىڭ 10 ايىندا ءبىزدىڭ اۋرۋحانادا 1,5 مىڭنان اسا بۋىن اۋىستىرۋ وپەراتسياسى جاسالسا, ەندىگى ماقساتىمىز – قىزمەتىمىزدى جەتىلدىرىپ, ساپالى مەديتسينالىق كومەك كورسەتۋ», دەيدى الماتىداعى №4 قكا ديرەكتورى, مەديتسينا عىلىمدارىنىڭ كانديداتى, MBA, DBA پروفەسسورى ءبىرجان دوسمايلوۆ.
ايتقانداي, 2012 جىلى وسى اۋرۋحانادا جامباس, تىزە, يىق, شىنتاق بۋىندارىن, سونىمەن قاتار اياق-قولدىڭ ءىرى بۋىندارىنداعى ەندوپروتەزدى تولىق جانە جارتىلاي اۋىستىرۋدى جۇزەگە اسىراتىن مامانداندىرىلعان ەندوپروتەزدەۋ بولىمشەسى اشىلعانىن ايتا كەتۋ كەرەك. اۋرۋحاناداعى ەندوپروتەزدەۋ تاجىريبەسى 1975 جىلى اناتولي چۋچۋلو №4 قكا-دا جامباس بۋىنىن ءبىر ءپوليۋستى ەندوپروتەزدەۋ وپەراتسياسىن جاساعان كەزدەن باستاۋ الادى. وسى جىلدار ىشىندە 20 مىڭنان اسا پاتسيەنتكە بۋىن اۋىستىرۋ وپەراتسيالارى جاسالعان.
الماتى
