«كەز كەلگەن قايشىلىقتى بۇۇ جارعىسىنىڭ نورمالارى مەن قاعيداتتارىنا ساي شەشۋگە بولاتىنىنا كامىل سەنەمىن. بۇل قۇجاتتى الەمدىك قوعامداستىق ادامزات تاريحىنداعى ەڭ قانقۇيلى سوعىستان كەيىن قابىلدادى. مۇنداي قاسىرەت ەندى قايتالانباۋى ءۇشىن حالىقارالىق ارەنادا بارىنە تۇسىنىكتى, ورتاق ويىن ەرەجەسى قابىلداندى. بۇل ىزگىلىك پەن ادامگەرشىلىك قاعيداتتارىنىڭ زور جەڭىسى ەدى. ازىرگە الەم قاقتىعىستاردى ەڭسەرۋدىڭ بۇدان ارتىق ءتاسىلىن ويلاپ تاپقان جوق», دەدى پرەزيدەنت.
پرەزيدەنتتىڭ ايتۋىنشا, جەر كولەمى, قۋاتى مەن ەكونوميكالىق الەۋەتىنە قاراماستان, بارلىق مەملەكەت تەڭ.
«حالىقارالىق قۇقىق ەشقانداي بۇرا تارتۋسىز, تەڭدەي جانە بارىنە بىردەي قولدانىلادى. سوندىقتان اشۋدى اقىلعا جەڭدىرىپ, حالىقارالىق قۇقىق نورمالارىن مۇلتىكسىز ساقتاعان ساتتەن باستاپ, الەمدە تەپە-تەڭدىك قايتا ورنايدى دەپ سانايمىن. بۇل فورمۋلا ساياسي جۇيەلەر ءۇشىن دە, قازىرگى زامانداعى ەكونوميكالىق, ەكولوگيالىق جانە گۋمانيتارلىق ماسەلەلەردى شەشۋدە دە وزەكتىلىگىن جويمايدى», دەيدى ەل پرەزيدەنتى.
مەملەكەت باسشىسى ءبىز بۇرىن-سوڭدى بولماعان گەوساياسي بولشەكتەنۋ جانە الەۋمەتتىك-ەكونوميكالىق تۇرعىدان جىككە ءبولىنۋ جاعدايىنا كۋا بولىپ وتىرعانىمىزدى اتاپ ءوتتى.
«ساياسات پەن ەكونوميكادا جاھاندىق جانە ايماقتىق دەڭگەيدە وزگەرىستەر ءجۇرىپ جاتىر. بۇل مەملەكەتتەر مەن قۇرلىقتاردىڭ قاۋىپسىزدىگىنە الاڭداۋشىلىق تۋعىزادى. ۇيلەسىمدى الەمدىك ەكونوميكا قۇرۋ ءۇشىن جاھاندىق وڭتۇستىك جانە جاھاندىق سولتۇستىك ەلدەرى ءوزارا سەنىمگە, ءبىر-ءبىرىنىڭ مۇددەسىن قۇرمەتتەۋگە, سونداي-اق كوپجاقتى ىنتىماقتاستىق قاعيداتتارىنا نەگىزدەلگەن ورتاق مامىلەگە كەلۋى كەرەك. وسىنداي كۇردەلى ۇدەرىستە بۇۇ ماڭىزدى ءرول اتقارۋعا ءتيىس. قازىرگى تاڭدا ول بارلىق ادامزاتتى بىرىكتىرەتىن بالاماسى جوق جالعىز جاھاندىق ۇيىم سانالادى», دەدى ق.توقاەۆ.
