كەيدە باۋىرى بۇلاق بابالارىمىزدىڭ ۇلاعاتىنا شولدەگەندە تاريحتىڭ ساباسىندا پىسكەن اساۋ دا اششى قىمىزدى قوتارا ىشكىڭ كەلەدى. قوڭىراۋلى نايزا الىپ قول توڭكەرمەسەڭ دە, رۋحىڭا توڭكەرىس جاسارداي ءال-دارمەن الاسىڭ. نوسەر ويدىڭ جاڭبىر ۇشىعىنداي عانا بولسا دا نامىسىڭا تامىزىق, ارمانىڭا جەلكەن بولاتىن دارۋمەنگە يە قوردالى دا قايماقتى تىركەستەر ءتىل ۇشىنا بايلانىپ, ماقساتىڭا مىنبەر بولاتىنى ءسوزسىز. قازاق-قالماق اراسىنداعى عاسىرلار بويعى سۇراپىل شايقاستا ەلىنە ەس بولعان ۇلىلار ساپىنان ەسكەلدى بي جىلكەلدى ۇلى دا تابىلىپ, باتىرلىعىمەن, قولباسشىلىعىمەن, بي-شەشەندىگىمەن تانىلعان. مىنە, سول بابامىزدىڭ تۋعانىنا 330 جىل تولعان ۇلى دۋماندى جەتىسۋلىق جۇرتشىلىق ايرىقشا اتاپ ءوتتى. الدىمەن زيالى قاۋىم وكىلدەرى ەسكەلدى بابا كەسەنەسىنە بارىپ قۇران باعىشتاپ, رۋحىنا تاعزىم جاسادى.
بولاشاققا دەگەن كەمەل قادامنىڭ باسى وتكەندى تانىپ, كەشەگىگە تاعزىم ەتۋ شاراسىمەن باستالسا كەرەك. الماعايىپ زاماندا الاشىنا پانا بولعان بابالاردىڭ ءومىرى مەن شىعارماشىلىعىن دارىپتەۋ – ءبىز ءۇشىن پارىز. سول پارىزدى پاراسات بيىگىندە سەزىنگەن جەتىسۋلىقتار ەسكەلدى جىلكەلدى ۇلىنىڭ 330 جىلدىق مەرەيتويىن ب.ريموۆا اتىنداعى تالدىقورعان دراما تەاترىندا دۇبىرلەتتى. الدىمەن «ەل قورعانى – ەسكەلدى» رەسپۋبليكالىق عىلىمي-تاجىريبەلىك كونفەرەنتسيا ءوتىپ, سوڭىنان بابا ەرلىگىن قالامعا ارقاۋ ەتكەن جازبا اقىندار ءمۇشايراسىنىڭ جەڭىمپازدارى ماراپاتتالدى.
سالتاناتتى ءىس-شارانىڭ شىمىلدىعىن مۇزارت تاۋدىڭ مۇزبالاق اقىنى مۇقاعالي ماقاتاەۆتىڭ اقىق جىرىمەن اشىپ, بابالار ەرلىگىن اسقاقتاتا جەتكىزگەن مادەنيەت قايراتكەرى, «Jetisy» گازەتىنىڭ باس رەداكتورى جۇماتاي وسپان ۇلى رۋحاني جيىننىڭ ءمانى مەن مازمۇنىنا توقتالدى. ءوز كەزەگىندە وبلىس اكىمىنىڭ ورىنباسارى رۋستام اليگە ءسوز بەردى.
ەسكەلدى بابا اتىمەن اتالاتىن اۋداندا تۋىپ, سول جەردە اكىم رەتىندە قىزمەت ەتكەنىن ەرەكشە ماقتانىش تۇتاتىنىن جەتكىزىپ, ۇلى بابا ەرلىگى مەن ورلىگى جونىندە, تاريحتى قۇرمەتتەۋ, قاسيەتتى دۇنيەلەرىمىزدى قاستەرلەۋ بۇگىنگىلەردىڭ بورىشى ەكەنىن ايتقان رۋستام ءالي ۇلى وبلىس اكىمى بەيبىت يساباەۆتىڭ قۇتتىقتاۋحاتىن وقىدى.
تارلان تاريح تاراۋلارىنداعى ىزگىلىك پەن مەيىرىمگە, ورلىك پەن ەرلىككە شاقىراتىن شەجىرەلى وقيعا, شالقار سىرلاردىڭ قاي-قايسىسى دا ۇرپاق ءۇشىن قاجەت. سولاردىڭ قاتارىندا ەسكەلدى جىلكەلدى ۇلى باستاعان تاريحي تۇلعالاردىڭ ءاربىر ونەگەلى ءىسى ۇرپاققا عيبرات شاشاتىنى حاق. سوناۋ «اقتابان شۇبىرىندى» كەزەڭىندە كەۋدەمسوقتىق جاساعان, مۇزداي قۇرسانىپ كەلگەن جاۋدىڭ سۇراپىل ەكپىنىنە توتەپ بەرىپ, جەرىنەن شىم-شىم توپىراق, شوكىم تاس بەرمەي قۋىپ شىققان بابالار قاتارىنداعى ەسكەلدىنىڭ تاريحي ەرلىكتەرى مەن بي-شەشەندىك ونەردە قالدىرعان ولجاسىن دارىپتەگەن عالىمدار عىلىمي-تاجىريبەلىك كونفەرەنتسيادا
بايانداما جاسادى.
ءال-فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى, فيلولوگيا عىلىمدارىنىڭ كانديداتى انار بۇلدىباي, قازاقستان مۇسىلماندارى ءدىني باسقارماسى عۇلامالار كەڭەسىنىڭ مۇشەسى, اراب, پارسى جانە شاعاتاي تىلدەرىنىڭ مامانى ءزارىپباي ورازباي, قازاقستاننىڭ قۇرمەتتى ءجۋرناليسى, «قۇرمەت» وردەنىنىڭ يەگەرى, ەسكەلدى بابانىڭ ۇرپاعى ءسابيت بيبولوۆ, قازاقستان جۋرناليستەر وداعىنىڭ مۇشەسى, قازاق ۇلتتىق سالت-ءداستۇر اكادەمياسىنىڭ پروفەسسورى, حالىقارالىق ج.جاباەۆ اتىنداعى سىيلىقتىڭ لاۋرەاتى, «قۇرمەت» وردەنىنىڭ يەگەرى قوشان مۇستافا ۇلى سىندى زيالى قاۋىم وكىلدەرى كونفەرەنتسيادا ۇلى بابا ەرلىكتەرىن پاش ەتىپ, تىڭ جاڭالىقتارمەن ءبولىستى. قازاق تاريحىنىڭ, جالايىر رۋىنىڭ ارعى-بەرگى شەجىرەسىنەن سىر شەرتىپ, راشيد اد-ءديننىڭ «جاميع ات تاۋاريح» اتتى كىتابى, جالپى, سان تاراۋلى كىتاپتار, الاش جۇرتىنىڭ وتكەنى ۇلكەن بۇرمالاۋعا ۇشىراعانىن جەتكىزدى. جاڭا تاريح جىلناماسى قايتا جازىلىپ جاتقانىن, ءار قازاقتىڭ تۇپكى شەجىرەسى شالقار ەكەنىن تەرمەلەدى. وسىنداي رۋح جاڭعىرتقان جيىننان كەيىن «ەل قورعانى – ەسكەلدى» تاقىرىبىنداعى رەسپۋبليكالىق ءمۇشايرانىڭ جەڭىمپازدارى ماراپاتتالدى.
قارا ولەڭمەن بابا ءمۇسىنىن قاشاپ, ەرلىگىن اسقاقتاتقان اقىندار دوداسىنا 60-تان اسا ءوتىنىم كەلىپ ءتۇسىپتى. سولاردىڭ اراسىندا اسىلىن ايشىقتاپ, سالماقتىسىن سارالاپ شىعارعان امىرە ءارىن, ءنۇسىپباي ءابدىراحىم, نۇريلا بەكتەمىروۆا, ساعىنىش نامازشاموۆا, جانگەلدى نەمەرەباي سىندى بەلگىلى اقىندار قازىلىق ەتكەن دودادا جومارت يگىمان, ايتاقىن بۇلعاقوۆ, قالقامان ءابدىراحماندار ارنايى قابان جىراۋ, ءى. جانسۇگىروۆ, ج. جاقىپباەۆ اتىنداعى جۇلدەگە (150 مىڭ تەڭگە) يە بولدى. ءىىى ورىندى (300 مىڭ تەڭگە) استانالىق ابدىعاني ءبازىلحان, تارازدىق حاميت ەسەنامان, تالدىقورعاندىق گۇلباقىت قاسەن يەلەنسە, ءىى ورىندى (400 مىڭ تەڭگە) الماتى وبلىسىنىڭ اقىنى احمەت ومىرزاق پەن جەتىسۋلىق اسىل سۇلتانعازى ءوزارا ءبولىستى. ال ءى ورىن (700 مىڭ تەڭگە) يەگەرى دەپ الماتىلىق قۇرمانعازى جۇماعۇل تانىلسا, «قازاق پوەزياسىنىڭ ەڭلىكگ ۇلى» اتانعان زايدا ەلعوندينوۆا باس بايگەنى ەنشىلەپ, 1 ملن تەڭگەنىڭ سەرتيفيكاتىمەن ماراپاتتالدى. وسىلايشا, عالىمدار تاريحتان سىر شەرتىپ, اقىندار جىر تولعاعان مەرەيتوي جەتىسۋ جەرىنىڭ ونەرپازدارى سالعان اسەم انمەن اسقاقتاپ, كۇمبىر كۇيمەن شىرايلاندى.
جەتىسۋ وبلىسى
