«توبىل» – ەل كۋبوگىنىڭ يەگەرى

كەزدەسۋدىڭ العاشقى مينۋتىنان ەكى كوماندا بىردەن شابۋىلعا كوشتى. بيىل چەمپيوندىق اتاققا قول جەتكىزگەن شىمكەنتتىك كلۋب كۋبوكتى الۋدى الدىنا مەجە ەتتى. ال ەل بىرىنشىلىگىندە سەگىزىنشى ورىندى مىسە تۇتقان قوستانايلىق كلۋب الداعى جىلى ەۋروكۋبوكتا سىنعا ءتۇسۋ ءۇشىن كۋبوكتى جەڭىپ الۋى قاجەت ەدى. ءبىرىنشى كەزەڭدە ەكى كوماندا شابۋىلعا كوبىرەك شىقتى. دەسە دە تابلوداعى ەسەپكە وزگەرىس ەنگەن جوق.

ەكىنشى كەزەڭدە دە كوماندالار گول سوعاتىن مۇمكىندىكتى ىزدەدى. ناتي­جەسىندە, ويىننىڭ 67-مينۋتتا يسلام چەسنوكوۆ مەرگەندىك تانىتتى. وسىلايشا, «توبىل» قارسىلاسىنان 1:0 ەسەبىمەن جەڭىپ, ەل كۋبوگىنىڭ يەگەرى اتاندى.

مۇنداي اتاققا قوستانايلىق كلۋب سوڭعى رەت 2006 جىلى قول جەتكىزگەن ەدى. ەندى ولار الداعى جىلى ەۋروپا ليگاسىندا ەكىنشى ىرىكتەۋ ساتىسىنان سىنعا تۇسەدى.

ال «ورداباسى» چەمپيون­دار ليگاسىندا ەل نامىسىن قور­عا­سا, «استانا» مەن «اقتوبە» كونفە­رەنتسيا ليگاسىندا باق سىنايدى.

ويىننان كەيىن كۋبوك يەگەر­لەرىن قازاقستان كاسىبي فۋتبول ليگاسىنىڭ پرەزيدەنتى رافاەل گاريبيان قۇتتىقتاپ, راحمەتىن ايتتى.

– «توبىلدى» فينالداعى لا­يىقتى جەڭىسىمەن قۇتتىقتايمىن. ادە­مى ويىنىمەن جانكۇيەرلەرگە فۋتبول مەرەكەسىن سىيلاعان كومان­دالارعا, ەڭ باستىسى, قولداۋعا كەل­گەن مىڭداعان جانكۇيەرگە راحمەت ايت­قىم كەلەدى. سىزدەردىڭ ارقا­لا­رىڭىزدا قازاقستانداعى فۋتبولعا دەگەن قىزىعۋشىلىق دامۋدا. سىز­دەردىڭ شىنايى قولداۋلارىڭىز, ءبىزدىڭ كوماندالار مەن ويىنشىلار ءۇشىن باستى سىيلىق, – دەدى ر.گاريبيان.

ايتا كەتسەك, قازاقستان كۋبوگى 1992 جىلدان بەرى تۇراقتى تۇردە وتكىزىلىپ كەلەدى. بۇگىنگە دەيىن «قاي­رات» 9 مارتە كۋبوكتى توبەسىنە كوتەردى. «جەڭىس» (استانا) پەن «استانا» – 3, «قايسار» (قىزىلوردا) مەن «ورداباسى» (شىمكەنت) – 2, «ەرتىس» (پاۆلودار), «تاراز», «شاحتەر» (قاراعاندى), «ۆوستوك» (وسكەمەن), «اقتوبە», «الماتى», «توبىل» (قوستاناي), «دوستىق» (الماتى), «ەلىماي» (سەمەي) ءبىر مارتەدەن كۋبوك يەگەرى اتاندى.