جۋىردا تۇركىستان وبلىسىندا مال ۇرلاۋدى كاسىپ قىلعان ەكى ازامات ۇستالدى. كەلەس اۋداندىق پوليتسيا بولىمىنە 6 اۋىل تۇرعىنى ارىز قالدىرعان. ولاردىڭ ايتۋىنشا, بەلگىسىز بىرەۋلەر ولاردىڭ ءىرى قارا مالدارىن قولدى ەتكەن. جوعالعان مالدارىن تۇرعىندار ءوز كۇشتەرىمەن ىزدەگەنىمەن, ناتيجە بولماعان سوڭ پوليتسياعا شاعىمدانعان.
جەدەل-ىزدەستىرۋ شارالارىنىڭ ناتيجەسىندە پوليتسيا قىزمەتكەرلەرى مال ۇرلىعىن جاساعانداردىڭ ىزىنە شىعىپ, ەكى كۇدىكتى ەر ازاماتتى ۇستادى. ولار جۇمىسسىز جۇرگەن جاس جىگىتتەر بولىپ شىقتى. ايىپتالۋشىلار جابىرلەنۋشىلەرگە 2,5 ميلليون تەڭگە كولەمىندە شىعىن كەلتىرگەن. پوليتسيا قىزمەتكەرلەرى اتالعان فاكتىنى قىلمىستىق كودەكستىڭ 188-1-بابى (مال ۇرلىعى) بويىنشا تىركەدى.
انىقتالعانداي, ۇرىلار جەرگىلىكتى تۇرعىنداردىڭ جايىلىمداردا قاراۋسىز قالعان جانە قورادا تۇرعان ءتورت ت ۇلىگىن جىمقىرىپ, جۇك كولىگىمەن ارتىپ اكەتكەن. سودان سوڭ ۇرلانعان مالدى ارزان باعامەن ساتىپ, تۇسكەن اقشانى ءوزارا ءبولىپ العان. قازىرگى تاڭدا كۇدىكتىلەر قاماۋعا الىنىپ, ولارعا قاتىستى سوتقا دەيىنگى تەرگەۋ امالدارى جۇرگىزىلىپ جاتىر.
جالپى, جىل باسىنان بەرى ەلىمىزدە 42 مال جوعالۋ دەرەگى تىركەلدى. دەگەنمەن ولاردىڭ جارتىسىنان كوبىندە ۇرلىقتىڭ ورىن الماۋىنا بايلانىستى قىلمىستىق ىستەر توقتاتىلعان. بارلىق فاكت بويىنشا ىزدەۋ جۇمىستارى جۇرگىزىلىپ, مال جوعالۋىنىڭ باستى سەبەبى – يەلەرىنىڭ ونى قاراۋسىز قالدىرۋى ەكەنى انىقتالدى.
سونداي وقيعانىڭ ءبىرى جۋىردا اقتوبە وبلىسىندا تىركەلدى. قارعالى اۋدانىنىڭ پوليتسيا بولىمىنە 76 جاستاعى اۋىل تۇرعىنى شاعىمدانىپ, 130 باس جىلقىسىنىڭ جوعالعانى تۋرالى ارىز بەرگەن. زالالدىڭ جالپى سوماسى – 65 ملن تەڭگە. جابىرلەنۋشىنىڭ ارىزى تىركەلىپ, قىلمىستىق كودەكستىڭ 188-بابىنىڭ 4-بولىگى (ۇرلىق) بويىنشا قىلمىستىق ءىس قوزعالدى. جوعالعان جىلقىلاردى ىزدەۋ ءۇشىن پوليتسيا قىزمەتكەرلەرى جەدەل شارالار قابىلدادى. اۋا رايىنىڭ قولايسىزدىعىنا قاراماستان, ءتارتىپ ساقشىلارى قارعالى اۋدانىندا عانا ەمەس, وبلىستىڭ كورشى اۋداندارىندا دا ىزدەستىرۋ شارالارىن جۇزەگە اسىردى. ءۇش كۇننەن كەيىن جوعالعان مال شارۋاشىلىقتان 60 شاقىرىم جەردەن تابىلىپ, ۇرلىقتىڭ ورىن الماعانى انىقتالدى. وسىعان بايلانىستى تەرگەۋ توقتاتىلدى. دەگەنمەن مۇنداي جاعدايلار, بىرىنشىدەن, ءتارتىپ ساقشىلارىنىڭ قىمبات ۋاقىتىن الاتىندىقتان, ەكىنشىدەن, وعان قانشاما شىعىن كەتەتىندىكتەن, پوليتسيا قىزمەتكەرلەرى حالىققا ءوز مالدارىنا مۇقيات قاراۋ كەرەكتىگىن ەسكەرتتى.
