فوتو: اقوردا
مەملەكەت باسشىسى تۇركيا پرەزيدەنتىنىڭ قازاقستانعا ساپارىنىڭ ءمانى زور ەكەنىن اتاپ ءوتىپ, بۇگىنگى كەزدەسۋ ەكى ەلدىڭ كوپجاقتى قارىم-قاتىناسىن نىعايتۋعا جانە تۇركى الەمىن دامىتۋعا تىڭ سەرپىن بەرەتىنىنە نازار اۋداردى. قاسىم-جومارت توقاەۆ سامميت بارىسىندا كوتەرگەن ماڭىزدى باستامالارى مەن سالماقتى وي-پىكىرلەرى ءۇشىن رەجەپ تايپ ەردوعانعا العىس ايتتى.
«قادىرلى باۋىرىم, اتاجۇرتقا قوش كەلدىڭىز! تۇركيا – ءبىزدىڭ ەجەلدەن ەنشىسى ءبىر, تامىرلاس تۋىسىمىز. سونداي-اق قازاقستاننىڭ ەڭ جاقىن ءارى سەنىمدى ستراتەگيالىق سەرىكتەسى. ءسىز ءوزارا قارىم-قاتىناستى دامىتۋعا وراسان زور ۇلەس قوسىپ كەلەسىز. مەن ونى جوعارى باعالايمىن. اراداعى تۇراقتى كەلىسسوزدەردىڭ ارقاسىندا بۇگىندە كوپتەگەن كەلىسىمدەرىمىز تابىستى جۇزەگە اسىرىلۋدا. بىلتىر ەكىجاقتى تاۋار اينالىمى 54 پايىزعا ءوسىپ, 6,3 ميلليارد دوللار بولدى. وسى كورسەتكىشتى 10 ميلليارد دوللارعا دەيىن جەتكىزۋدى كوزدەپ وتىرمىز. تۇركيا – ەلىمىزدىڭ نەگىزگى ءتورت ساۋدا سەرىكتەسىنىڭ ءبىرى. ينۆەستيتسيالىق ىنتىماقتاستىق قارقىندى دامىپ كەلەدى. ەلىمىزدە تۇرىك كاپيتالىنىڭ ۇلەسى بار 4300-دەن استام كومپانيا جۇمىس ىستەپ جاتىر», دەدى قاسىم-جومارت توقاەۆ.
كەزدەسۋدە قاسىم-جومارت توقاەۆ رەجەپ تايپ ەردوعاندى جانە تۇرىك حالقىن تۇركيانىڭ 100 جىلدىعىمەن قۇتتىقتادى. سونداي-اق مەملەكەت باسشىسى باۋىرلاس ەلدىڭ مەرەيتويىنا وراي استانادا انادولى كوشەسىن, شىمكەنتتە تۇركيا داڭعىلى مەن ساياباعىن جانە الماتىدا مۇستافا كەمال اتاتۇرىكتىڭ ەسكەرتكىشىن اشۋ جوسپارلانىپ وتىرعانىن ايتتى.
ءوز كەزەگىندە رەجەپ تايپ ەردوعان تۇركى مەملەكەتتەرى ۇيىمىنىڭ مەرەيتويلىق ءسامميتىن جوعارى دەڭگەيدە وتكىزگەنى ءۇشىن قاسىم-جومارت توقاەۆقا العىس ايتىپ, ەكى ەل اراسىنداعى ءوزارا ءتيىمدى ىنتىماقتاستىقتى نىعايتۋ ماڭىزدى ەكەنىن جەتكىزدى.
ء«سامميتتى تابىستى وتكىزۋىڭىزبەن قۇتتىقتايمىن. بيىل 6 اقپاندا جەر سىلكىنىسىنەن زارداپ شەككەن گازيانتەپ پروۆينتسياسىنىڭ نۋرداگى اۋدانىندا مەكتەپ سالۋ تۋرالى شەشىمىڭىز ءۇشىن تاعى دا العىسىمدى بىلدىرەمىن. بۇل مەكتەپ تۇرىك-قازاق باۋىرلاستىعىنىڭ ۇرپاقتان-ۇرپاققا جالعاساتىن سيمۆولدارىنىڭ بىرىنە اينالادى دەپ سەنەمىن. جاھانداعى جانە ايماقتاعى وقيعالار تۇركى الەمىنىڭ ءوزارا تىعىز قارىم-قاتىناستا بولۋىن تالاپ ەتەدى. 2021 جىلى ىستانبۇلدا وتكەن سامميتتە ءبىز وزگەرىس پروتسەسىن باستادىق ءارى ءبىزدىڭ ۇيىمعا مىقتى ينستيتۋتسيونالدىق قۇرىلىم سيپاتىن بەرۋ تۋرالى شەشىم قابىلدادىق. وسى ۋاقىت ارالىعىندا ءبىز ماڭىزدى قادامدار جاسادىق. ول ءالى جالعاسادى. اتاجۇرتتا ماعان جانە مەنىڭ دەلەگاتسياما كورسەتكەن قۇرمەتىڭىز ءۇشىن سىزگە ريزاشىلىعىمدى بىلدىرەمىن», دەدى تۇركيا پرەزيدەنتى.
كەزدەسۋ بارىسىندا مەملەكەتتەر باسشىلارى قازاق-تۇرىك ستراتەگيالىق سەرىكتەستىگىنىڭ قازىرگى جاعدايى مەن دامۋ پەرسپەكتيۆالارىن تالقىلادى. ساياسي ديالوگتى نىعايتۋعا, ساۋدا-ەكونوميكالىق, ينۆەستيتسيالىق, ەنەرگەتيكالىق, كولىك-لوگيستيكالىق, اگرارلىق جانە مادەني-گۋمانيتارلىق سالالارداعى ىنتىماقتاستىقتى تەرەڭدەتۋگە باسا ءمان بەرىلدى. پرەزيدەنتتەر قازاقستان مەن تۇركيانىڭ جان-جاقتى ىقپالداستىعىن جاڭا دەڭگەيگە كوتەرۋگە بايلانىستى بارلىق جاعداي جاسالعانىن اتاپ ءوتتى.
سونىمەن قاتار قاسىم-جومارت توقاەۆ پەن رەجەپ تايپ ەردوعان حالىقارالىق جانە ايماقتىق كۇن تارتىبىندەگى وزەكتى ماسەلەلەر جونىندە پىكىر الماستى.
