ءبىر بۇرىشتا ءبۇرىسىپ جاتقان بۇركىتكە جالعىز جاقىنداپ بارۋدان تايسالعان ءۇي يەسى «Ikomek» ورتالىعىنان جاردەم سۇراعان. كوپ ۇزاماي قىران قونعان ۇيگە ورمان شارۋاشىلىعى جانە جانۋارلار الەمى ينسپەكتسياسىنىڭ مامانى رۋستام بيدىباەۆ, «قوستاناي زووپۋلس» قوعامدىق بىرلەستىگىنىڭ جەتەكشىسى ۆيكتوريا ماشيديەۆا, تابيعات قورعاۋ پوليتسياسىنىڭ كاپيتانى قانات شيقانوۆ جەتەدى.
بۇركىت بىردەن ۇستاتا قويماعانمەن, ادام اڭدىسا, الماي قويمايدى. قۇستى قالىڭ ماتامەن قاقپاقىلداپ ءجۇرىپ ورمان شارۋاشىلىعى جانە جانۋارلار الەمى ينسپەكتورى رۋستام بيدىباەۆ ۇستاپ العان.
«بۇل – قىزىل كىتاپقا ەنگەن دالا قىرانى. ورنيتولوگ ماماندار بۇركىتتىڭ شامامەن ءبىر جارىم جاستا ەكەنىن ايتىپ وتىر. دالا بۇركىتتەرى, ادەتتە, وسى وڭىردەن سوناۋ يرانعا دەيىن ۇشىپ بارادى. مەكەن ەتەتىن ارەالى وتە كەڭ. قىراندار نەگىزىنەن قيانى مەكەندەيدى. ەلدى مەكەندەرگە وتە سيرەك قونادى. بۇل بۇركىت جەمتىگىن قۋىپ ءجۇرىپ, جازاتايىم قاناتىن قايىرىپ الۋى مۇمكىن, – دەيدى رۋستام.
«قوستاناي زووپۋلس» قوعامدىق بىرلەستىگىنىڭ جەتەكشىسى ۆيكتوريا ماشيديەۆانىڭ ايتۋىنشا, ۇشا الماي قالعان قىراندى قازىر ۆەتەرينارلىق كلينيكالاردىڭ ءبىرى تەكسەرىپ جاتىر. ۆەتەرينار ماماندار قۇستىڭ قوس قاناتىن رەنتگەنگە تۇسىرمەك. ەگەر اۋىر جاراقات العانى انىقتالسا, قاناتى ابدەن قاتايعاننان كەيىن عانا ەركىنە جىبەرىلەدى.
قوستاناي وبلىسى
