فوتو: ا.بايجۇمانوۆ
زاڭدى تانىستىرۋ كەزىندە قارجى ءمينيسترىنىڭ ورىنباسارى ابزال بەيسەمبەك ۇلى جانە ۇلتتىق ەكونوميكا ءمينيسترىنىڭ ورىنباسارى ازامات ءامرين بايانداما جاسادى. قارجى ءمينيسترىنىڭ ورىنباسارى بيۋدجەت شىعىستارىنىڭ نەگىزگى ۇلەسى الەۋمەتتىك سالاعا تيەسىلى ەكەنىن ايتا كەلىپ, ول 2024 جىلى بيۋدجەتتىڭ جالپى شىعىستارىنىڭ 40%-دان استامىن قۇرايتىنىن حابارلادى. وسىلايشا, حالىقتىڭ تابىسىن ارتتىرۋ باعدارلاماسى اياسىندا 129 مىڭ جۇمىس ورنى اشىلىپ, 1,5 ملن ادامنىڭ ەڭبەكاقىسى كوبەيەدى. 163 مىڭ وقۋشىعا ارنالعان 160 جاڭا مەكتەپ پەن 556 العاشقى مەديتسينالىق-سانيتارلىق كومەك نىسانى سالىنادى جانە اشىلۋى ءتيىس. ءمينيستردىڭ ورىنباسارى 417 مىڭ شارشى مەتر تۇرعىن ءۇيدى پايدالانۋعا بەرۋ جوسپارلانىپ وتىرعانىن ايتتى. 7 مىڭعا جۋىق وتباسى تۇرعىن ءۇي جاعدايىن جاقسارتاتىن بولادى.
ۇلتتىق ەكونوميكا ءمينيسترىنىڭ ورىنباسارى ءوز كەزەگىندە رەسپۋبليكالىق بيۋدجەت پەن ۇلتتىق قوردىڭ كورسەتكىشتەرىن انىقتاۋداعى نەگىزگى ءۇش مىندەتتى اتادى. ء بىرىنشىسى – بيۋدجەت كورسەتكىشتەرىنىڭ تۇراقتىلىعىن قامتاماسىز ەتۋ جانە ۇلتتىق قوردىڭ جيناقتاۋ فۋنكتسياسىن كۇشەيتۋ. ەكىنشىسى – ورتا جانە ۇزاق مەرزىمدى كەزەڭدە بيۋدجەت ساياساتىنىڭ ىقتيمال تاۋەكەلدەرىن باعالاۋدى جۇزەگە اسىرۋ. ءۇشىنشىسى – مەملەكەتتىك قارجىنىڭ نىسانالى باعدارلارىنىڭ تەڭگەرىمدىلىگى. اتالعان زاڭ سەنات كوميتەتىنىڭ جۇمىس توپتارى مەن وتىرىستارىندا تالقىلانعاننان كەيىن پالاتانىڭ قاراۋىنا ۇسىنىلادى.
